Napukaw ang Halandomong mga Kagahapon
Human makadawat sa librong Pagkakat-on Gikan sa Dakong Magtutudlo, nakahukom ang usa ka babaye nga iyang dad-ag kopya ang iyang magulang nga babaye. Mga 85 anyos na ang iyang igsoon, nga nag-antos sa sakit nga Alzheimer. Apan, sa miaging 70 ka tuig, usa siya ka masibotong estudyante ug magtutudlo sa Bibliya. Apan wala na kaayo siyay mahinumdoman nga bag-ong mga hitabo ug talagsa ra kaayong mouna sa pagpakig-estorya.
“Sa unang adlaw,” matod pa sa manghod nga babaye, “akong gipatin-aw nga kining libroha gidisenyo aron tabangan ang mga ginikanan nga masilsil ang mga prinsipyo ug mga pagtulon-an sa Bibliya diha sa ilang mga anak ug buot nakong basahon kini ngadto kaniya. Wala siyay timik. Apan, sa nagsugod na ako sa pagbasa, siya nabibo ug mitubag sa matag pangutana nga gisukna diha sa basahon. May mga higayon nga samtang nagkutlo kog usa ka teksto, iya kadtong gipadayon sumala sa iyang namemorya—apan sumala sa King James Version, nga maoy iyang nahinumdoman sukad pa sa iyang pagkabatan-on. Usahay, iyang kuptan ang akong bukton samtang nag-asoy ako ug usa ka estorya sa Bibliya ug moingon siya, ‘Ay, nakahinumdom ko ana!’
“Sa hapit na kaming mamauli—human nako mabasa ang kapin sa katunga sa libro ngadto kaniya—siya miingon nga gusto pa siyang makadungog ug dugang. Ang iyang bana, nga maoy nag-atiman pag-ayo kaniya, maoy mipadayon sa pagbasa sa libro ngadto kaniya. Kini nga kasinatian uban sa akong magulang nga babaye nakatabang kanako sa pagkaamgo sa kaayohan sa pagbasa ug sama niini nga mga publikasyon ngadto sa mga tigulang ug mga maluyahon.”
Kining matahom nga pagkailustrar nga libro nga may 256 ka panid, nga samag gidak-on niining magasina, nagustohan sa mga bata ug mga tigulang. Bisan tuod ang mga leksiyon niini nga gipasukad sa mga pagtulon-an ni Jesu-Kristo giasoy sa yanong pinulongan, ang gihisgotang mga ulohan maoy alang sa tanang pangedaron. Makahangyo kag kopya pinaagi sa pagpil-ap sa nagaubang kupon ug pagpadala niana ngadto sa adres nga gitagana o sa nahiangayng adres nga gilista sa panid 5 niining magasina.
□ Interesado akong makadawat ug kopya sa librong Pagkakat-on Gikan sa Dakong Magtutudlo.
□ Palihog kontaka ako mahitungod sa usa ka libreng pagtuon sa Bibliya sa balay.