Gikan sa Among mga Magbabasa

Ang Lit-ag sa Pag-inom​—Nameligro Ka Bang Malit-agan? (Oktubre 8, 2005) Daghan na akog nabasang mga sulat gikan sa mga magbabasa nga nag-ingong: “Kini miabot sa tukma gayod nga panahon.” Wala nako damha nga ingon niana usab ang akong bation, apan mao gayod kanay akong naingon sa akong kaugalingon sa gibasa nako kini nga serye. Dugaydugay na ako nga nabalaka sa akong adlaw-adlaw nga pag-inom ug alkoholikong ilimnon, bisan ug dili ako mahubog. Dayon miabot kini nga serye. Human mabasa ang mga kapeligrohan, gibati nako nga panahon na nga molingkawas niini nga problema.

K. W., Alemanya

Kini nga serye naghisgot sa kasinatian ni Hilario, nga nag-inom sulod sa 30 ka tuig ug ‘makadaghang mihunong ug mibalik sa pag-inom.’ Siya nag-ingon nga ang mga igsoon diha sa kongregasyon “anaa . . . kanunay sa paghatag kanako ug pagdasig.” Apan dili ba angay unta nga siya gibadlong o gipalagpot sa Kristohanong kongregasyon?

R. L., Tinipong Bansa

Ang “Pagmata!” nagtubag: Ang mubong asoy sa kasinatian ni Hilario wala maghisgot kon kanus-a siya nahimong bawtismadong Kristohanon sa iyang 30-ka-tuig nga pakigbisog sa alkoholikong ilimnon. Ug wala usab kini maghisgot kon siya ba gibadlong kaniadto sa mga ansiyano sa kongregasyon. Ang artikulo nag-ingon nga siya gihatagan ug “nunot-sa-panahong tambag sa Bibliya,” nga usahay maoy ginahimo sa hudisyal nga kaso. Sa pagbuntog sa alkoholismo, usahay dili kalikayan nga ang usa mobalik sa pag-inom, sama sa nahitabo kang Hilario. Kon unsaon pagdumala ang ingon niana nga kahimtang sa dihang malangkit ang usa ka bawtismadong Kristohanon, palihog tan-awa “Ang Bantayanang Torre,” Mayo 1, 1983, mga panid 8-11.

Mga Batan-on Nangutana . . . Nganong Ganahan man Kong Makigsuod sa Kuwestiyonableng mga Tawo? (Hulyo 22, 2005) Kini nga artikulo nakatabang kanako sa pagkaamgo nga kinahanglang akong isentro ang akong pagtagad sa akong tumong. Kini nagtukmod kanako sa pagporsigir gayod sa pagpahilayo sa daotang mga kauban. Ako suod na karon sa daghang igsoon sa kongregasyon, batan-on man o tigulang, nga tungod niana akong nabati nga ako gihigugma niadtong nahigugma kang Jehova ug sila nagdasig kanako sa pagpadayon sa dalan sa kinabuhi.

M. D., Mexico

Determinado sa Pagkab-ot sa Akong Tumong (Hunyo 22, 2005) Midagayday ang mga luha sa akong aping samtang nagbasa sa kasinatian ni Martha. Ako usab adunay patol. Ako usa ka bug-os-panahong magwawali sulod na sa napulo ka tuig, ug usahay lisod kana—ilabina kon atakehon ako. Ang sugilanon ni Martha nakapalig-on sa akong determinasyon nga dili molunga. Kini nakahupay gayod kanako.

J. S., Polandia

Ako nakigbisog sa sakit nga sama nianang kang Martha. Human mabasa ang iyang sugilanon, nag-amping na ako sa akong ginakaon. Kapin sa napulo ka tuig nga gitugotan nako ang akong sakit nga patol sa pagpugong kanako sa pag-alagad kang Jehova nga mas bug-os pa. Apan mga tulo ka tuig kanhi, nakahukom ako nga mahimong bug-os-panahong magwawali, ug wala gayod ako magbasol. Hinaot nga panalanginan kamo ni Jehova tungod sa pagpatik ug makapadasig nga mga kasinatian!

B.C.C., Brazil

Ang nakapadasig gayod kanako niini nga artikulo mao nga si Martha wala gayod molunga. Nalipay ako nga bisag kinahanglan siyang moundang sa pagpayunir, siya may timbang nga tinamdan ug pagsalig nga si Jehova nalipay sa atong bug-os-kalag nga pag-alagad.

S. H., Japan

Ako nasugamak sa situwasyon nga sama nianang kang Martha, ug kinahanglang dawaton nako ang akong mga limitasyon. Sama kang Martha, nakahimo usab ako sa pag-alagad ingong bug-os-panahong magwawali. Busa ang iyang sugilanon nakapadasig kaayo kanako.

F. G., Switzerland