Tinumotumo o Tinuod?

Ang mga tawo nga buot mosimba sa matuod nga Diyos gipasidan-an sa Kristohanong ansiyano nga si Timoteo sa dili pagpamati sa “nagkasumpaki nga mga ideya” ug “mga tinumotumo.” (1 Timoteo 1:3, 4, Byington) Kinahanglan bang magbantay usab kita karon? Oo, tungod kay ang sayop nga mga ideya bahin sa Bibliya ug sa mga pagtulon-an niini magpahilayo sa mga tawo sa matuod nga pagsimba. Sa ubos makita ang kasagarang gituohan sa mga tawo bahin sa Bibliya. Matikdi ang giingon mismo sa Bibliya. Kini makatabang kanimo sa pag-ila kon unsay tinumotumo ug kon unsay tinuod.

◼ Tinumotumo: Ang mga milagro nga giasoy sa Bibliya dili tinuod.

Tinuod: Ang mga tawo daghan pa kaayog pagatun-an bahin sa kalalangan sa Diyos. Wala gayoy siyentipiko nga makapatin-aw sa grabidad, tukmang makahubit sa mga elemento sa usa ka atomo, o makatukib sa takna o panahon. “Makatugkad ka ba sa lawom nga mga butang sa Diyos, o makatugkad ka ba sa kinutbanan gayod sa Labing Gamhanan?” (Job 11:7) Kay dili man nato matugkad ang kalalangan, ang hawod nga mga siyentipiko nanagana sa pagsulti nga imposible ang usa ka butang.

◼ Tinumotumo: Ang tanang relihiyon paingon sa Diyos.

Tinuod: “Kon magpabilin kamo sa akong pulong,” si Jesus miingon, “kamo tinuod gayod nga akong mga tinun-an, ug kamo mahibalo sa kamatuoran, ug ang kamatuoran magpagawas kaninyo.” (Juan 8:31, 32) Kon ang tanang relihiyon paingon pa sa Diyos, kinahanglan pa bang hatagag kagawasan ang mga membro niini? Ang tinuod, si Jesus nagtudlo nga diyutay lang ang naglakaw sa “dalan padulong sa kinabuhi.”—Mateo 7:13, 14.

◼ Tinumotumo: Ang tanang tawong buotan moadto sa langit inigkamatay.

Tinuod: “Ang mga maaghop magapanag-iya sa yuta, ug sila makakaplag gayod sa ilang tumang kalipay sa kadagaya sa pakigdait. Ang mga matarong magapanag-iya sa yuta, ug sila magapuyo sa ibabaw niini hangtod sa kahangtoran. Laom kang Jehova ug bantayi ang iyang dalan, ug siya magabayaw kanimo aron sa pagpanag-iya sa yuta.” (Salmo 37:11, 29, 34) Gipadayag sa Bibliya nga 144,000 lang ka matinumanong tawo ang moadto sa langit. Ang asaynment nga gihatag sa Diyos kanila mao ang ‘pagmando ingong mga hari ibabaw sa yuta.’—Pinadayag 5:9, 10; 14:1, 4.

◼ Tinumotumo: Ang “Daang Tugon” dili na kinahanglan sa mga Kristohanon.

Tinuod: “Ang tibuok Kasulatan inspirado sa Diyos ug mapuslanon sa pagpanudlo.” (2 Timoteo 3:16, 17) “Ang tanang butang nga gisulat kanhi gisulat alang sa pagtudlo kanato, aron nga pinaagi sa atong pag-antos ug pinaagi sa paghupay gikan sa mga Kasulatan kita makabatog paglaom.” (Roma 15:4) Ang “Daang Tugon” (Hebreohanong Kasulatan) maoy pangunang tuboran sa pagtulon-an bahin sa Diyos ug sa iyang katuyoan ug maoy atong basehanan sa atong pagtuo sa “Bag-ong Tugon” (Kristohanon Gregong Kasulatan).

◼ Tinumotumo: Ang dakong bahin sa basahon sa Genesis, lakip sa asoy bahin kang Adan ug Eva, maoy inimbento lang nga mga estorya.

Tinuod: Ang rekord sa kaliwatan ni Jesus nga nagsugod kang Adan girekord sa magsusulat sa Ebanghelyo nga si Lucas. (Lucas 3:23-38) Kon inimbento pa ang Genesis, hain nianang mga ngalan diha sa listahan ang tinuod, ug hain niana ang inimbento? Si Jesus, nga naglungtad sa langit una pa mianhi sa yuta, nagtuo sa nasulat diha sa Genesis, lakip sa mga asoy bahin kang Adan ug Eva. (Mateo 19:4-6) Sa ato pa, kon dili tinuod ang asoy sa Genesis, dili usab tinuod ang giingon ni Jesus ug sa ubang mga magsusulat sa Bibliya.—1 Cronicas 1:1; 1 Corinto 15:22; Judas 14.