Mga Batan-on Nangutana . . .

Nganong Angay Sundon ang mga Prinsipyo sa Bibliya?

ANAA ka sa kantina sa eskuylahan nga naniudto uban sa imong duha ka amiga. Gitutokan sa usa kanila ang bag-ong estudyanteng lalaki.

“Sa tan-aw nako, naibog gyod na siya nimo,” miingon ang usa nimo ka amiga. “Klaro kaayo sa iyang tinan-awan nga siya naibog nimo. Pilit kaayo siyag tinan-awan nimo!”

“Ug nahibalo ka ba?” mihunghong ang imong ikaduhang amiga. “Wala siyay trato!”

“Anugon da nga duna na koy trato,” miingon ang una nimong amiga. “Kay kon wala pa, dili gyod ko mobalibad kon iya kong hagaron!”

Dayon gisulti sa imong unang amiga ang dili nimo gustong madunggan.

“Nganong wala ka pa may trato?”

Nahibalo ka nga iya kanang ipangutana. Ang tinuod, gusto ka nga makatrato. Apan gitambagan ka nga mas maayong maghulat hangtod nga andam ka nang magminyo una ka pa magsugod sa pagpakigdeyt. Kon dili pa unta . . .

“Tungod na sa imong relihiyon, no?” miingon ang imong ikaduhang amiga.

‘Nabasa ba niya ang akong hunahuna?’ nangutana ka sa imong kaugalingon.

“Pulos ka lang Bibliya, Bibliya, Bibliya,” mabiaybiayong miingon ang imong unang amiga. “Nganong dili ka maglingaw-lingaw panagsa?”

Sama ba usab niini ang imong kahimtang—gibiaybiay tungod kay nagsunod ka sa mga prinsipyo sa Bibliya? Unsay imong reaksiyon?

◼ Imong gidepensahan ug maayo ang imong baroganan sa moral.

◼ Gilainan ka, apan imong gipatin-aw ug maayo ang imong tinuohan.

◼ Nakaingon ka sa imong kaugalingon nga husto ang imong mga amiga—dunay kulang kanimo!

Ikaw ba nakapangutana, ‘Mapuslanon ba ang pagsunod sa mga prinsipyo sa Bibliya?’ Nakapalandong niana ang usa ka batan-on nga ginganlag Deborah.a “Ang akong mga higala makapatuman sa ilang gusto,” siya miingon. “Walay mopugong kanila. Ang mga prinsipyo sa Bibliya mapig-oton ra kaayo. Naibog ko sa akong mga amiga kay makapatuyang sila sa ilang gusto.”

Sayop ba Kon Magduhaduha?

Dihay panahon sa kinabuhi sa magsusulat sa Bibliya nga si Asap nga siya nagduhaduha kon maayo bang magkinabuhi sa paagi nga makapalipay sa Diyos. Siya misulat, “Nasina ako sa mga hambogiro, sa dihang nakita ko ang kalinaw sa mga tawong daotan.” Siya miingon pa gani: “Kawang lamang gayod nga gihinloan ko ang akong kasingkasing ug gihunawan ko ang akong mga kamot sa pagkainosente.”—Salmo 73:3, 13.

Klaro nga si Jehova nga Diyos nakasabot nga usahay magduhaduha ang uban sa pagsunod sa iyang mga prinsipyo. Sa pagkatinuod, giparekord ni Jehova ang mga hunahuna ni Asap diha sa Bibliya. Sa ngadto-ngadto, nakaingon si Asap nga ang pagsunod sa mga balaod sa Diyos mao ang labing maayong paagi sa pagkinabuhi. (Salmo 73:28) Nganong nakaingon man siya niana? Kay maalamon man god si Asap. Siya nakasulti niana, dili tungod sa iyang naagomang kasakit, kondili tungod kay nakakat-on siya gikan sa sayop nga nahimo sa uban. (Salmo 73:16-19) May makat-onan ka ba usab sa sayop sa uban?

Usa ka Pahinumdom sa Pagtul-id sa Sayop nga Hunahuna

Dili sama kang Asap, si Haring David nakakat-on ug leksiyon sa mapait nga paagi nga kadtong dili mosunod sa mga prinsipyo sa Diyos makaagom ug kadaot. Si David nanapaw sa asawa sa usa sa iyang mga alagad ug misulay pa gani sa pagtago sa iyang sala. Tungod niini, siya nakahatag ug kasakit sa Diyos ug sa uban, ug nag-antos ug tumang kaguol. (2 Samuel 11:1–12:23) Human nga naghinulsol si David, siya gitugahan ug balaang espiritu ni Jehova sa pagpahayag sa iyang pagbati pinaagig awit ug kining mga pulonga napreserbar diha sa Bibliya alang sa atong kaayohan. (Salmo 51:1-19; Roma 15:4) Busa maalamon ug angay sumala sa Bibliya ang pagkat-on gikan sa sayop nga nahimo sa uban.

Aron matabangan ka sa pagsundog sa panig-ingnan ni Asap ug makalikay sa sayop nga nahimo ni David, palandonga ang mga komento sa pipila ka batan-on gikan sa nagkalainlaing kayutaan nga kaniadto wala mosunod sa mga prinsipyo sa Bibliya. Sila nakasulay sa pagpakigsekso una pa maminyo. Sama kang David, ilang gihinulsolan ang ilang nahimong kasaypanan ug hinlo na usab ug baroganan sa Diyos. (Isaias 1:18; 55:7) Palandonga ang ilang gisulti.

Pagmata!: Unsay nakaimpluwensiya sa imong hunahuna ug mga buhat?

Deborah: “Sa eskuylahan makita nako ang tanan nga dunay mga trato, ug sila morag malipayon. Dihang makig-uban ako nila ug makita sila nga naghalokay ug naggaksanay, nasina ako ug mibatig kamingaw. Gihanduraw nako kanunay ang usa ka lalaki nga akong naibgan. Tungod niini napukaw ug samot ang akong tinguha nga makauban siya ug sa paghimo sa tanan aron lang makauban siya.”

Mike: “Mobasa ako ug mga basahon ug motan-aw ug mga programa maylabot sa sekso. Ang pag-estoryahay bahin sa sekso uban sa akong mga higala nakapukaw ug samot sa akong kaibog. Dayon, sa nakauban nako ang usa ka dalaga, abi nakog puwede ra nga maggaksanay ug maghalokay kami nga dili mosangpot sa pagpakigsekso kay nagtuo ko nga makapugong ra ko.”

Andrew: “Naanad na ako sa pagtan-aw ug pornograpiya diha sa Internet. Nagsugod ako sa pag-inom-inom. Ug moadto ako ug mga parti uban sa mga batan-on nga walay pagtahod sa prinsipyo sa Bibliya labot sa paggawi.”

Tracy: “Sa 16 anyos pa ako, gusto ko nga magkuyog-kuyog lang pirme sa akong trato. Ako nahibalo nga daotan ang pakigsekso nga dili pa minyo, apan wala ko kini bale-baleha. Wala koy intensiyon nga makigsekso una pa maminyo, apan nadala ako sa bul-og sa akong emosyon. Sa primero wala ako tulisoka sa akong konsensiya.”

Pagmata!: Nalipay ka ba sa imong paagi sa pagkinabuhi?

Deborah: “Sa primero, nalipay ko sa akong kagawasan nga sa kataposan makahimo na akog bisan unsa sama sa akong mga higala. Apan wala magdugay kining pagbatia. Mibati ko nga hugaw ako, nabuongan ug kadungganan, ug walay kahulogan ang akong kinabuhi. Nagbasol gayod ako nga nabuong ko ang akong pagkadalaga nga dili na gayod nako mabawi pa. Sukad niadto, pangutan-on nako kanunay ang akong kaugalingon, ‘Nganong nahimo man to nako nga wala maghunahuna sa epekto sa akong kagahig ulo?’ Ug ‘Ngano ba intawon nga wala ako mosunod sa mahigugmaong mga prinsipyo ni Jehova?’”

Mike: “Mibati ako nga daw dunay bahin kanako nga namatay. Wala nako panumbalinga ang epekto sa akong mga buhat diha sa uban, apan apektado gihapon ako. Naguol ako nga nakasakit ako sa uban tungod sa akong pagpangitag kalipay. Dili ako makatulog. Sa ngadto-ngadto, ang kalalim nga bation sa pagpakigsekso una pa maminyo nawala, ug gihasol ako sa kasakit ug kaulaw.”

Andrew: “Dili na ako managana nga panungtan ang akong mga kailibgon. Apan sa samang higayon, gitulisok ako sa akong konsensiya ug nagmasub-anon.”

Tracy: “Nakaamgo ako nga sayop ang akong gibuhat. Ang akong pagkabatan-on nadaot sa imoralidad. Abi nakog magmalipayon kami sa akong trato. Apan dili diay. Nakahatag hinuon kami ug kasub-anan, kalisdanan, ug kasakit sa dughan sa usag usa. Kada gabii ako nga maghilak, nga nagmahay nga wala ako mosunod sa dalan ni Jehova.”

Pagmata!: Unsang tambag ang imong ikahatag sa mga batan-on nga naghunahuna nga mapig-oton ra ang mga prinsipyo sa Bibliya bahin sa paggawi?

Deborah: “Dili moarang-arang ang imong kinabuhi kon imong talikdan ang mga prinsipyo sa Bibliya. Palandonga kon unsay bation ni Jehova kon mosunod ka sa iyang tambag. Ug palandongag maayo ang mga resulta nga imong maagoman kon dili ka mosunod sa iyang tambag. Hinumdomi, ang imong buhat dili lamang makaapektar kanimo kondili makaapektar usab kini sa uban. Ug kon dili ka mosunod sa tambag sa Diyos, madaot ka gayod.”

Mike: “Sa pagkatinuod, ang paagi sa pagkinabuhi sa imong mga higala morag nindot tan-awon. Apan, pamalandong unag maayo sa dili pa mosundog nila. Lakip sa labing bililhong butang nga gihatag kanimo ni Jehova mao ang imong dignidad ug pagkaulay. Kon dili nimo hatagan ug importansiya kining maong mga gasa tungod kay dili ka makakontrolar sa imong kaugalingon, imo lamang gipakaubos ang imong kaugalingon. Pakigsulti sa imong mga ginikanan ug ubang hamtong bahin sa imong mga problema. Kon makasala ka, isulti dayon kini ug tul-ira ang kahimtang. Kon mosunod ka sa dalan ni Jehova, motawhay ang imong kinabuhi.”

Andrew: “Kon kulang ka ug eksperyensiya, maibog ka gayod sa paagi sa pagkinabuhi sa imong mga higala. Matakdan ka sa ilang tinamdan. Busa piliag maayo ang imong mga higala. Salig kang Jehova, ug dili ka gayod magbasol.”

Tracy: “Ayaw pag-ingong ‘Dili kana mahitabo kanako.’ Giprangkahan ako sa akong Mama nga ang akong gihimo moresulta unya ug kasakit sa dughan. Nasuko kaayo ko! Abi nakog may buot na ako nga dili ako madala sa tentasyon. Apan wala gayod diay akoy buot. Sunda ang mga prinsipyo ni Jehova, ug pakig-uban sa mga tawo nga nagsunod usab niini. Mas magmalipayon ka nianang paagiha.”

Mga Prinsipyo sa Bibliya—Galong o Panagang?

Kon bugalbugalan ka sa imong higala kay nagsunod ka sa mga prinsipyo sa Bibliya, pangutan-a ang imong kaugalingon: ‘Nganong dili man sila mosunod sa mga prinsipyo sa Bibliya labot sa paggawi? Nakabasa ba sila ug Bibliya ug nakasusi sa mga benepisyo sa pagsunod sa mga balaod sa Diyos? Ila bang napalandong pag-ayo ang mga sangpotanan sa ilang pagsalikway niini nga mga prinsipyo? O, nagsunod-sunod lang ba sila sa ginahimo sa tanan?’

Tingali may nailhan ka nga ‘nagsunod-sunod lang sa ginahimo sa uban.’ (Exodo 23:2) Dili ka ba gustong mohimog mas maayo kay sa pagsunod-sunod lang? Sa unsang paagi? Pinaagi sa pagpamati sa tambag sa Bibliya sa ‘pagpamatuod sa imong kaugalingon kon unsa ang maayo ug dalawaton ug hingpit nga kabubut-on sa Diyos.’ (Roma 12:2) Si Jehova maoy “malipayong Diyos,” ug buot niya nga magmalipayon ka usab. (1 Timoteo 1:11; Ecclesiastes 11:9) Ang mga prinsipyo nga giparekord diha sa Bibliya maoy alang sa imong kaayohan. Tinuod, isipon nimo kini nga usa ka galong nga maglimite sa imong kagawasan. Apan ang tinuod, ang balaod sa Bibliya labot sa paggawi daw samag panagang nga makapanalipod kanimo gikan sa kadaot.

Makasalig ka gayod sa Bibliya. Kon imong sundon ang mga prinsipyo niini, dili lang malipay si Jehova kanimo kondili makabenepisyo ka pa.—Isaias 48:17.

Ang ubang mga artikulo gikan sa seryeng “Mga Batan-on Nangutana . . .” makita diha sa Web site nga www.watchtower.org/ype

[Footnote]

MGA BUTANG NGA ANGAYNG PALANDONGON

◼ Nganong naglisod ka sa pagsunod sa mga prinsipyo sa Bibliya?

◼ Nganong kinahanglang pamatud-an nimo sa imong kaugalingon nga ang pagsunod sa mga prinsipyo sa Diyos mao ang labing maayong paagi sa kinabuhi?