Walay Paglubad nga Pasundayag sa Gugma sa Diyos
ANG pito ka gibantog nga obra maestra sa karaang kalibotan giisip sa mga tawo nga talagsaon kaayo tungod kay nakapahibulong kaayo kini kanila. Apan kining maong mga obra maestra wala na maglungtad, gawas sa mga piramide. Sa laing bahin, ang Bibliya, bisag gisulat sa tinamay nga mga tawo diha sa madugta nga materyales, naglungtad gihapon ug ang mensahe niini wala gayod mausab hangtod karon. Busa makasalig gayod kita niining maong talagsaong basahon.—Isaias 40:8; 2 Timoteo 3:16, 17.
Sa gipasulat niya ang iyang mga hunahuna, gitino ni Jehova nga Diyos nga ang iyang mensahe tukma nga pagkasulat sa mga tawo nga dili hingpit. Dugang pa, tungod sa simpleng pinulongan nga gigamit sa mga magsusulat sa Diyos, ang Bibliya masabtan dayon sa mga tawo nga kulang ug edukasyon. (Buhat 4:13) Dili ba mao man kanay imong madahom sa Maglalalang ug sa iyang mga magsusulat nga gitugahan ug balaang espiritu? Gawas pa niana, ang kaylap nga pagkaapod-apod sa Bibliya nagpamatuod sa dakong gugma sa Diyos alang sa iyang tawhanong linalang, bisag hain pa silang suoka nagpuyo o bisag unsa pang pinulongan ang ilang gisulti. (1 Juan 4:19) Sa pagkatinuod, ang pagkadaghan sa Bibliya wala makapaubos sa pagkahamili niini, kondili nakapatuboy hinuon sa pagkahamili niini!
Ang mensahe sa Bibliya nagpadayag ug dugang pa bahin sa gugma sa Diyos. Sama sa ato nang nakita sa nag-unang mga artikulo, gisaysay sa Pulong sa Diyos kon diin kita gikan, kon nganong ang kinabuhi mubo ra kaayo ug puno pag problema, ug kon unsaon pagsulbad sa Diyos kini nga kahimtang pinaagi sa iyang kagamhanan nga Gingharian. Atong nahisgotan usab ang ubang maayo kaayong tambag sa Bibliya kon unsaon sa pagtagamtam ug malipayon ug mapuslanong kinabuhi bisan karon. (Salmo 19:7-11; Isaias 48:17, 18) Labaw sa tanan, atong nahibaloan kon sa unsang paagi hinloan sa atong Maglalalang ang iyang ngalan nga giduhigan sa mga butang-butang ni Satanas.—Mateo 6:9.
Wala nay laing libro nga mapuslanon kaayo, hinungdanon sa modernong kinabuhi, praktikal kaayo, ug puno sa paglaom alang sa katawhan nga naputos sa problema. Oo, dili sama sa pito ka obra maestra sa karaang kalibotan, nga ang kadaghanan niini gitukod sa pagbayaw sa mga diyos-diyos o mga tawong impluwensiyado, ang Bibliya tinuod nga usa gayod ka walay paglubad nga pasundayag sa dakong gugma ni Jehova alang sa iyang tawhanong linalang.
Sulayi pagsusi ang Bibliya. Ang mga Saksi ni Jehova nagdumala ug libreng pagtuon sa Bibliya sa kapin sa unom ka milyong tawo sa tibuok kalibotan. Giisip nila nga usa ka pribilehiyo ang pagtabang sa mga tawo nga tim-os ug kasingkasing aron ilang masuta mismo nga ang Bibliya tinuod gayod nga kasaligan ug nga kini inspirado nga Pulong sa Diyos.—1 Tesalonica 2:13.