Pagpaniid sa Kalibotan

Ang aberids nga gidaghanon sa pasyente nga giatiman sa matag doktor sa Tanzania maoy 64,000.—THE CITIZEN, TANZANIA.

‘Labing menos usa ka bilyong kabos ang dugay nang nag-antos sa kakulag sustansiya, ug ang Millennium Development Goal sa United Nations nga kunhoran ang gidaghanon sa gigutom sa tibuok kalibotan pagka-2015 dili makab-ot.’—SCIENCE, U.S.A.

“Ang 100 ka dagkong kompaniya sa kalibotan nga naggamag armas” nagreport ug $385 bilyones nga kita sa 2008, nga miuswag ug $39 bilyones kon itandi sa 2007.—STOCKHOLM INTERNATIONAL PEACE RESEARCH INSTITUTE, SWEDEN.

Dili Maayo ang Sobra Kalimpiyo?

“Sumala sa among panukiduki, ang sobra kalimpiyo nga palibot samtang bata pa mahimong lakip sa mga hinungdan nga ang usa daling maimpeksiyon inigkahamtong na, nga makapauswag sa posibilidad nga mataptag lainlaing sakit,” matod ni Thomas McDade, propesor sa Northwestern University, Illinois, U.S.A. Ang usa ka pagtuon nga nagtandi sa mga batang Pilipino ug Amerikano nag-ingon nga sa katibuk-an, ang mga Pilipino nataptag mas daghang mananakod nga sakit sa bata pa sila. Apan, sukwahi sa gidahom, ang hingkod na nga mga Pilipino mas diyutayg C-reactive protein sa ilang dugo, nga modaghan kon dunay impeksiyon. Unsay atong makat-onan niana? Kon ang usa maladlad sa ordinaryong mga bakterya samtang bata pa, siya mahimong mapanalipdan sa makamatayng mga sakit inigkahamtong na.

Nausab ang Batasan sa Pagtrabaho

Daghang amo sa Finland ang naglibog sa bag-ong henerasyon sa mga aplikante nga morag walay hibangkaagan kon unsay gikinahanglan aron makapabilin sa trabaho. “Ang bag-ong mga trabahante maghunahuna nga pwede ra silang mosulod ug mogawas sa trabahoan bisan unsang orasa,” miingon ang usa ka direktor sa restawran nga si Anne Mikkola sa dihang giinterbiyo siya sa national service broadcasting company sa Finland. Duna usay problema maylabot sa lagda sa panggawi ug pamesti. Ilabina sa mga trabaho nga kinahanglang makiglabot sa publiko, sultian pa sa mga amo ang ilang mga empleyado kon unsay angayng isul-ob. Ang lain pang ebidensiya nga wala na maila sa mga empleyado ang kalainan sa trabaho ug pribadong kinabuhi mao nga duawon sila sa ilang mga higala diha sa trabahoan aron lang makig-estorya-estorya.

Pag-ilogayg Teritoryo “Natapos”

Ang dugay nang pag-ilogay sa Bangladesh ug India sa usa ka gamayng isla sa Bay of Bengal natapos na—tungod sa pagtaas sa lebel sa dagat. Kining wala-puy-ing isla, nga gitawag ug New Moore Island sa mga Indian ug South Talpatti Island sa mga taga-Bangladesh, wala gayod molapas ug 6 piyes (1.9 metros) ang gihabogon gikan sa lebel sa dagat. Apan, gipakita sa mga hulagway nga nakuha sa satelayt nga di pa dugay kini nasanapan na sa dagat. “Ang wala masulbad niining duha ka nasod sulod sa daghang katuigan nasulbad sa global warming,” miingon si Propesor Sugata Hazra, sa Jadavpur University School of Oceanographic Studies, sa Calcutta.