Gagmayng Mansiyon sa Istanbul

● Ang mga balaybalay sa langgam nga gama sa kahoy makita sa daghang lugar sa kalibotan. Kini maoy maayong dapit diin ang mga langgam mokaon, magsalag, ug mag-atiman sa ilang mga kuyabog. Kini manalipod usab kanila batok sa mga manunukob ug sa ulan ug hangin. Sa Istanbul, ang mga balaybalay sa langgam gidisenyo nga morag tinuod nga mga tinukod. Ang uban samag mga mansiyon, moske, o palasyo.a Kini gitawag nga balay sa pati, mansiyon sa langgam, ug palasyo sa goryon.

Ang labing karaan niini nga mga balaybalay gihimo niadto pang mga ika-15 nga siglo, ug gikopya kini sa komon nga arkitektura niadtong panahona. Kini maoy simple nga mga balaybalay, apan sugod sa ika-18 nga siglo, kini nahimong maanindot ug maluho nga mga puy-anan. Ang uban dunay mga butanganan sa pagkaon ug tubig, koridor, ug bisan gani mga balkon, diin ang mga langgam makapanambo. Kini nga mga balaybalay sagad mahimutang sa kilid sa bilding nga bantang sa adlaw ug dili apupa sa hangin—nga dili maabot sa iring, iro, ug sa mga tawo. Usahay, kini nga mga balaybalay himoon dili lang para sa mga langgam, kondili ingong dayandayan sa bilding. Kini makita diha sa kilid sa gagmay ug dagkong moske, duol sa publikong mga imnanan (drinking fountain), librarya, tulay, ug pribadong mga balay.

Ikasubo, daghan niini nga mga balaybalay ang nangadaot na tungod sa hangin, init, ug ulan, samtang ang uban gituyo pagguba sa mga tawo nga walay pagpabili niini. Nagkadiyutay na ang mga balaybalay sa langgam. Apan, kon moadto ka sa Istanbul ug ganahan kag karaan nga arkitektura, sulayig pangita kining gagmayng tinukod nga nahimutang sa balisbisan. Karon nga nasayod ka na bahin niana, mas malingaw ka sa imong pagsuroy sa maong siyudad kon makakita ka niining gagmayng mansiyon.

[Footnote]