Pagpaniid sa Kalibotan
Gipakita sa surbi sa Canada ug United States nga sa 5,296 ka produkto nga gikaingong dili makadaot sa kalikopan, 95 porsiyento niana ang “wala mapamatud-ing dili makadaot sa kalikopan.”—TIME, U.S.A.
Ang mga kawani sa seguridad sa internasyonal erport sa Thailand “nakamatikod ug katingad-ang butang” sa dihang ilang gi-X-ray ang bagahe sa usa ka babaye. Sa dihang giablihan nila ang usa ka bag, duna kini itoy nga tigre nga giindyeksiyonag pangpakatulog.—WORLD WILDLIFE FUND, THAILAND.
Nagkadaiyang Tanom ug Kahayopan sa Amazonia
Ang palibot sa Amazon River maoy usa sa mga dapit sa kalibotan nga daghan kaayog matang sa tanom ug kahayopan. Sa miaging dekada, kapin sa 1,200 ka matang sa tanom ug kahayopan—isda, ampibyan, reptilya, langgam, ug sus-an nga mananap—ang nadiskobrehan didto ug naklasipikar, sumala sa taho sa World Wildlife Fund (WWF). Kini nagpasabot nga, sa aberids, usa ka bag-ong espisye ang madiskobrehan matag tulo ka adlaw. “Hilabihan kadaghan ang nadiskobrehan nga bag-ong espisye,” miingon si Sarah Hutchison, koordinetor sa WWF sa Brazil, “ug wala pay labot niana ang daghang matang sa insekto nga nadiskobrehan.”
Stress sa Trabahoan
Bayente porsiyento sa mga taga-Finland ang mibati nga ang problema sa konsentrasyon ug memorya nakaapektar sa kalidad sa ilang trabaho. Sumala sa usa ka taho sa Finnish Institute of Occupational Health, nagkadaghan ang naapektohan sa maong problema sa mga nag-edad ug ubos sa 35, nga mao untay panuigon diin aktibo kaayo ang utok. Lakip sa gituohang hinungdan niana mao ang sobra kadaghang impormasyon ug ang kanunayng pag-usab-usab sa mga sistema sa kompiyuter. “Daghan ang mibati nga tungod sa kadaghan sa impormasyon, maglisod sila pagtino kon hain niana ang magamit nila sa trabaho,” nag-ingon si Propesor Kiti Müller. Ang Helsinki Times nag-ingon: “Kon magdugay ang stress, ang utok maanad niana, ug ang atong lawas dili na mosignal kanato bisag sobra na kaayo ang stress. Mahibaloan lamang nato kana kon masakit na ta.”
Makapaagresibo ba ang Paghunahuna sa mga Video Game?
Unsa kadugay mawala ang pagkaagresibo human modula ang usa ug pintas nga video game? Ang mga tigdukiduki nag-asayn ug lalaki ug babaye nga mga estudyante sa pagdulag pintas o dili-pintas nga video game sulod sa 20 minutos. Human niana, ang katunga sa matag grupo gisugo sa paghunahuna bahin sa ilang gidula. “Pagkaugma,” matod sa taho, “ang mga entrante nakigsangka sa ilang gituohang kontra diin mahimong silotan sa mananaog ang mapildi pinaagig pagpadungog kaniya ug makabungog nga kabanha.” Namatikdan nga misamot kaagresibo ang mga lalaking gisugo sa paghunahuna bahin sa pintas nga dula. “Ang mga tawo nga hilig sa pintas nga mga video game sagad modulag kapin sa 20 minutos ug lagmit magsigeg hunahuna bahin sa ilang gidula,” miingon ang mga tigdukiduki diha sa basahong Social Psychological and Personality Science. Walay ingon niana nga epekto sa mga babaye, nga sagad dili ganahag pintas nga video game.