PAGPANIID SA KALIBOTAN
Switzerland
Nakita sa panukiduki sa Switzerland nga ang tawong kapig 60 anyos maoy 14 porsiyento nga dakog posibilidad nga mamatay panahon sa iyang birthday kay sa ubang adlaw. Panahon sa ilang birthday, ang kadaghanan sa mga tawo maoy 18 porsiyento nga dakog purohang mamatay sa atake sa kasingkasing, ang mga babaye maoy 21 porsiyento nga dakog purohang maestrok, ug ang mga lalaki maoy 35 porsiyento nga dakog purohang maghikog. Ang mga siyentista nagtuo nga ang tensiyon ug alkoholikong ilimnon maoy pipila sa mga hinungdan sa pagdaghan sa naghikog ug naaksidente. Apan gikuwestiyon kini sa ubang tigdukiduki sa pagtuo nga nasayop lang ang pagrekord mao nga daghan ang parehas ug petsa sa birthday ug petsa sa pagkamatay.
Israel
Ang mga guwapo dakog purohan nga mainterbiyo kon ilang butangag letrato ang ilang aplikasyon sa trabaho; ang mga guwapa gamayg tsansa. Ngano? Ang Israeli nga mga tigdukiduki nag-ingon nga tingali tungod kini kay ang human resource department—nga maoy modesisyon kon kinsay interbiyohon—halos mga babaye. Ang The Economist nag-ingon nga ang makasubo apan tinuod nga rason mao nga ang mga babaye masina sa guwapang mga aplikante.
United States
Usa ka 82 anyos nga madre ug iyang duha ka kauban nga nag-edad ug 63 ug 57—kinsa pulos supak sa gubat—nakalusot sa protektadong pasilidad sa Oak Ridge, Tennessee, nga gipondohan sa 100 ka toneladang nukleyar nga materyales, ug ilang gisulatan ang usa sa mga bilding ug batok-gubat nga mga eslogan. Ang Energy Secretary nga si Steven Chu miingon nga ang luag nga seguridad niining dili unta basta-bastang masulod nga pasilidad “makapabalaka kaayo.”
Australia
Ang labing hataas nga korte sa nasod nagpakanaog ug desisyon ngadto sa mga kompaniya sa sigarilyo sa pag-ilis sa kolor ug logo sa pakete sa sigarilyo. Karon, ang tanang pakete kinahanglang dulom nga pagka-brown ug kolor nga dunay makahadlok nga mga hulagway sa epekto sa pagpanigarilyo.