PAGPANIID SA KALIBOTAN

United States

Dihay mga bulan sa 2012 nga 14.5 porsiyento ka pamilya sa U.S.—mototal ug 49 ka milyong tawo—“dili segurado kon makabaton, o dili makabaton, ug igong pagkaon para sa tanang membro sa pamilya,” sumala sa report sa Department of Agriculture.

Spain

Nakita sa usa ka pagtuon diha sa mga estudyante sa unibersidad nga mga 56% sa mga babaye ug 41% sa mga lalaki miadmitir nga nakapatuyang ug inom, nga sumala pa niini nga pagtuon maoy pag-inom ug labing menos walo ka naandang sukod (sa lalaki) o unom (sa babaye) sa alkoholikong ilimnon sa usa lang ka sesyon.

Pacific Ocean

Ang mga siyentista nga nagkuhag mga sampol sa giladmong mga 11,000 metros sa Mariana Trench nakadiskobre nga daghan ug bakterya ug ubang organismo nga nabuhi didto—bisan pa sa hilabihang kangitngit, grabeng presyur, ug tugnaw kaayong temperatura. Gituohan kaniadto nga wala kaayoy kinabuhi nga mabuhi sa ingon niana nga giladmon.

United Arab Emirates

Sa pagsugpo sa pagdaghan sa mga tawong tambok, ang mga awtoridad sa Dubai nagtanyag sa mga residente ug premyo nga usa ka gramong bulawan, nga nianang panahona mobalor ug mga $45 (U.S.), sa matag 1 ka kilo nga pagkunhod sa timbang. Aron madawat ang premyo, ang mga tawo kinahanglang magparehistro ug magpakunhod ug minimum nga 2 kilos sulod sa bulan sa Ramadan.