Pagbisita Ngadto sa New Zealand

LAGMIT mga 800 ka tuig na ang milabay nga ang Maori nga mga tribo milawig ug libolibong kilometros sa kadagatan ug mipuyo sa New Zealand. Didto, ilang nadiskobrehan ang usa ka lugar nga lahi kaayo sa ubang tropikal nga mga isla sa Polynesia diin sila naggikan. Ang maong lugar daghan ug bukid, mga glacier, mga hot spring, ug mag-snow. Mga 500 ka tuig sa ulahi, duna poy laing rasa, nga gikan sa Europe, ang miabot ug mipuyo didto. Karon, ang mga tradisyon sa kadaghanang mga taga-New Zealand dunay Anglo-Saxon ug Polynesian nga kagikan. Halos 90 porsiyento sa mga tawo didto ang nagpuyo sa siyudad. Ang siyudad sa Wellington nailhan ingong pinakahabagatang kaulohan sa tibuok kalibotan.

Tungod sa nagkadaiya ug nindot kaayong mga lugar, dili ikatingala nga bisag layo ang New Zealand, moabot ug tulo ka milyong turista ang mobisita didto kada tuig.

Ang New Zealand dunay talagsaong klase sa mga hayop. Mas daghan didtog klase sa dili molupad nga mga langgam kay sa ubang mga nasod. Didto sab nagpuyo ang mga tuatara, samag halo nga reptilya nga mabuhi sulod sa 100 ka tuig! Ang pipila ka klase sa kuwaknit ug sa dagkong mga hayop sa dagat sama sa mga balyena ug dolphin mao lang ang lumad nga mga mammal sa New Zealand.

Ang mga Saksi ni Jehova sa New Zealand aktibo kaayo sa ilang mga buluhaton sa halos 120 na ka tuig. Ginasangyaw nila ang mensahe sa Bibliya gamit ang labing menos 19 ka pinulongan, nga naglakip sa ubang pinulongan sa mga Polynesian sama sa Niuean, Rarotongan, Samoan, ug Tongan.