Asa Nagpaingon Kining Kalibotana?
Ang grabeng mga problema ug makapakurat nga mga hitabo maoy naandan na nga mga balita sa tibuok kalibotan! Unsay kahulogan niini?
PERSONAL NGA KASEGUROHAN: Mga merkado gibombahan. Mga magtutudlo ug mga estudyante gipamusil diha sa tunghaan. Mga masuso gikidnap pagtalikod sa mga ginikanan. Mga babaye ug mga tigulang nga lalaki giatake ug gikawatan sa adlawng dako.
ANG RELIHIYOSONG KAHIMTANG: Naggubatay nga mga pundok gitabangan sa mga relihiyon. Mga klero giakusar tungod sa pagpuo sa mga tawong lahi ug rasa. Mga pari seksuwal nga nag-abuso sa mga batan-on; simbahan nagtabon sa tinuod. Gidaghanon sa maninimba mius-os; mga simbahan gipamaligya.
ANG KALIKOPAN: Kalasangan gipamuril tungod sa komersiyo. Kakahoyan gipangahoy sa mga kabos aron gamitong sugnod. Tubig ilalom sa yuta nahugawan, dili maayong imnon. Pangisda nadaot tungod sa biya sa industriya ug ubang modernong pamaagi. Hangin napuno sa makatuok nga polusyon.
PANGINABUHI: Kita sa matag tawo sa habagatan sa Sahara sa Aprika gitaho nga mga $480 (T.B.) kada tuig. Kadalo sa mga direktor sa mga korporasyon nakahapay sa negosyo, libolibo nawad-ag trabaho. Panikas nakapildi sa tinigom sa mga tigpamuhonan.
KANIHIT SA PAGKAON: Mga 800,000,000 ka tawo sa tibuok kalibotan mangatulog nga walay kaon.
GUBAT: Kapin sa 100,000,000 ka tawo nahunosan sa ilang kinabuhi tungod sa gubat sa ika-20ng siglo. Dunay igong gidaghanon sa nukleyar nga mga hinagiban nga makapatay sa tanang tawo sa daghang beses. Sibil nga mga gubat. Terorismo nagkaylap nga nakaapektar sa tibuok kalibotan.
KAMATAY UG UBANG MGA SAKIT: Sugod sa 1918, ang trangkaso Espanyola nakapatay ug 21,000,000 ka tawo. AIDS nahimo na karon nga “labing malaglagong kaylap nga epidemya sa tawhanong kasaysayan.” Ang kanser ug sakit sa kasingkasing nakahatag ug kaguol sa tibuok kalibotan.
Timbangtimbanga ang matag usa sa mga balita. Kini ba panagsa ra nga mga hitabo? O kini ba nagakahitabo sa tibuok kalibotan ug dunay kahulogan?
[Kahon/Hulagway sa panid 5]
May Pagtagad ba Gayod ang Diyos?
Kay naguol sa makapatugaw nga mga hitabo o tungod kay namatyan o nawad-an ug bililhong butang, daghang tawo ang natingala kon nganong wala mangilabot ang Diyos aron mapugngan kining mga hitaboa.
Ang Diyos may pagtagad gayod. Siya naghatag ug kasaligang giya ug tinuod nga kahupayan karon. (Mateo 11:28-30; 2 Timoteo 3:16, 17) Siya naghimog mga kahikayan aron matapos na sa bug-os ang kapintasan, sakit, ug kamatayon. Ang kahikayan nga iyang gihimo nagpakita nga siya may pagtagad dili lang sa mga tawo sa usa ka nasod kondili sa mga tawo sa tanang nasod, tribo, ug pinulongan.—Buhat 10:34, 35.
Unsa ka dako ang atong pagtagad sa Diyos? Nahibalo ka ba kon kinsa ang Maglalalang sa langit ug yuta? Unsay iyang ngalan? Unsay iyang katuyoan? Siya nagtubag niining mga pangutanaha diha sa Bibliya. Dinhi iya kitang gisultihan kon unsang mga lakang ang iyang gihimo sa pagtapos sa kapintasan maingon man sa sakit ug kamatayon. Aron makabenepisyo niini, unsay kinahanglan natong buhaton? Kinahanglang mokuha kita ug kahibalo bahin kaniya ug sa iyang katuyoan. May kaayohan ba kitang mapaabot gikan sa iyang kahikayan kon dili kita magpasundayag ug pagtuo kaniya? (Juan 3:16; Hebreohanon 11:6) Hinungdanon usab nga atong tumanon ang iyang mga kinahanglanon. (1 Juan 5:3) Ikaw ba may pagtagad gayod sa Diyos nga andam kang motuman niana?
Aron masabtan kon nganong gitugotan sa Diyos ang presenteng mga kahimtang, kinahanglang atong masabtan ang usa ka hinungdanong isyu. Ang Bibliya nagsaysay niini. Sa panid 15 niini nga publikasyon, imong mabasa kon unsa kining isyuha.