Paghusay sa mga Kasungian Bahin sa Negosyo

Sumala sa natala sa 1 Corinto 6:1-8, si apostol Pablo naghisgot nga nagkinihaay ang mga isigkamagtutuo. Nagpahayag siyag kahigawad nga ang pipila ka Kristohanon sa Corinto ‘nagsang-at niana sa korte atubangan sa mga tawong dili-matarong.’ (Bersikulo 1) Mihatag si Pablo ug lig-ong mga katarongan nga dili angayng magkinihaay ang mga Kristohanon sa usag usa diha sa mga korte sa gobyerno apan ang mga kasungian angayng husayon diha sa kongregasyon. Atong hisgotan ang pipila ka katarongan niining inspiradong tambag ug ang pipila usab ka kahimtang nga dili kini mapadapat.

Kon kita may reklamo batok sa isigkamagtutuo bahin sa negosyo, kinahanglang husayon nato kini sa paagi ni Jehova, dili sa atong kaugalingon. (Proverbio 14:12) Ingon sa gipakita ni Jesus, labing maayo ang paghusay dayon sa usa ka kasungian sa dili pa kini modako. (Mateo 5:23-26) Apan, ikasubo nga ang pipila ka Kristohanon sobra ka makilalison, nga nagsang-at pa niini ngadto sa mga korte sa gobyerno. Matod ni Pablo: “Kini nagkahulogan ug bug-os nga kaparotan alang kaninyo nga kamo nagkinihaay sa usag usa.” Ngano? Usa ka katarongan mao nga kana makadaot sa dungog sa kongregasyon ug sa ngalan sa Diyos nga atong gisimba. Busa palandongon nato pag-ayo ang pangutana ni Pablo: “Nganong dili hinuon ninyo tugotan nga kamo mabuhatan ug sayop?”​—Bersikulo 7.

Nangatarongan usab si Pablo nga ang Diyos naghatag ug usa ka maayong kahikayan diha sa kongregasyon bahin sa paghusay sa mga kasungian. Ang mga ansiyano maoy maalamong mga Kristohanon tungod sa ilang kahibalo sa mga kamatuoran sa Kasulatan, ug si Pablo miingon nga sila “makahimo sa paghukom tali sa . . . mga igsoon” kon bahin sa “mga butang niining kinabuhia.” (Bersikulo 3-5) Gipakita ni Jesus nga ang mga kasungian nga naglangkit ug seryosong mga sala, sama sa pagbutangbutang ug panikas, angayng husayon sumala sa tulo-ka-tikang nga proseso: una, pagpaningkamot nga mahusay kana tali lang sa mga tawong nalangkit; ikaduha, kon dili molampos ang unang tikang, pagdalag usa o duha ka saksi; ug ang ikatulo, kon dili molampos ang ikaduhang tikang, pagdala niana ngadto sa mga ansiyano sa kongregasyon.​—Mateo 18:15-17.

Ang mga ansiyano dili hinuon mga abogado o negosyante ug dili sila angayng motambag bahin sa balaod o sa negosyo. Dili sila ang mohatag ug mga kondisyones aron mahusay ang mga kasungian bahin sa negosyo tali sa mga igsoon. Hinunoa, ilang tabangan ang tanang nalangkit nga ipadapat ang Kasulatan aron magkasinabot sila. Sa lisod nga mga kaso, mahimong konsultahon nila ang magtatan-aw sa sirkito o ang sangang buhatan sa mga Saksi ni Jehova. Apan may mga kahimtang nga dili na mapadapat ang tambag ni Pablo. Unsa ang pipila niini?

Sa pipila ka kahimtang, ang usa ka kiha tingali pormalidad lamang o gikinahanglan sa balaod aron mahusay kini sa di-mahakogon ug malinawong paagi. Pananglitan, ang pagsang-at ug kaso sa korte tingali mao ray paagi aron makabatog mando sa korte bahin sa diborsiyo, pag-atiman sa bata, kantidad sa sustento sa asawa, bayad gikan sa insyurans, pagkaapil sa listahan sa mga nangutang nga nabangkarota, ug proseso sa pagsusi kon tinuod ang usa ka testamento. May mga kahimtang usab nga mobati tingali ang usa ka igsoon nga angay siyang mobalos ug kiha agig pagdepensa sa kaugalingon.a

Kon ang maong mga kaso gisang-at nga walay tuyo nga makig-away, dili kini makalapas sa diwa sa inspiradong tambag ni Pablo.b Apan ang prioridad sa usa ka Kristohanon mao ang pagbalaan sa ngalan ni Jehova ug ang kalinaw ug panaghiusa sa kongregasyon. Ang pangunang timaan sa mga sumusunod ni Kristo mao ang gugma, ug ang “gugma . . . dili mangita sa kaugalingong kaayohan niini.”​—1 Corinto 13:4, 5; Juan 13:34, 35.