Kapitulo 34

Nganong Angay Sundon ang mga Prinsipyo sa Bibliya?

Naniudto ka sa kantina sa eskuylahan uban sa imong duha ka amiga ug may misulod nga bag-ong estudyanteng lalaki.

“Sa tan-aw nako, si Brett naibog nimo,” miingon ang imong amiga. “Klaro kaayo nga naibog siya nimo kay pilit kaayo siyag tinan-awan!”

“Ug nahibalo ka ba?” mihunghong ang usa pa nimo ka amiga. “Wala baya na siyay trato!”

Nakamatikod ka na nga siya nakagusto nimo. Gani, sa miaging adlaw giimbitar ka ni Brett sa parti nga himoon diha sa iyang balay. Siyempre mibalibad ka bisag gusto ka untang moadto.

Dayon ang imong amiga miingon: “Anugon da nga duna na koy trato, kay kon wala pa, di gyod nako balibaran si Brett.”

Unya mitan-aw siya nimo nga daw dili makatuo. Nahibalo ka na kon unsay iyang ipangutana.

“Nganong wala ka pa may trato?”

Naminghoy ka nianang pangutanaha! Ang tinuod, gusto kang makatrato. Apan gitambagan ka nga mas maayong dili una ka makigdeyt hangtod nga andam ka nang magminyo. Kon dili pa unta tungod sa . . .

“Imong relihiyon, di ba?” miingon ang usa nimo ka amiga.

‘Nabasa ba niya ang akong hunahuna?’ nakaingon ka sa imong kaugalingon.

“Pulos ka lang Bibliya, Bibliya, Bibliya,” mabiaybiayon siyang miingon. “Nganong dili ka maglingawlingaw panagsa?”

NABIAYBIAY ka na ba tungod kay naningkamot ka sa pagsunod sa mga prinsipyo sa Bibliya? Kon mao, tingali nakapangutana ka sa imong kaugalingon kon hinikawan ka ba sa paglingawlingaw. Mao kanay gibati kaniadto sa batan-ong si Deborah. “Mapig-oton ra kaayo ang mga prinsipyo sa Bibliya,” siya miingon. “Naibog ko sa akong mga higala kay makapatuyang sila sa ilang gusto.”

Palandonga ang Kinabuhi sa Uban

Ang kasinatian sa kinabuhi dili sa tanang panahon maayong paagi sa pagkat-on. Sa pagkatinuod, maalamon ug Kasulatanhon ang pagkat-on gikan sa sayop sa uban, sama kang salmistang Asap. Dihay higayon nga mibati siya nga sobra ra ka estrikto ang mga sukdanan sa Diyos. Apan nakamata siya sa tinuod sa dihang namalandong siya sa kinabuhi niadtong mibiya sa Diyos. Si Asap sa ulahi nakaingon nga anaa sila sa “madanglog nga dapit.”​—Salmo 73:18.

Aron makakat-on ka sa kasaypanan sa uban, palandonga ang komento sa mga batan-on nga nakalapas sa mga prinsipyo sa Bibliya ug nakapakighilawas.

● Unsay nakaimpluwensiya sa imong hunahuna ug lihok?

Deborah: “Makita nako ang akong mga eskolmet nga halos tanan dunay trato, ug daw malipayon sila. Kon mokuyog gani ko nila ug makakita nila nga maghalokay ug maggaksanay, maibog ko ug mobati ko nga luoy kaayo ko. Maghanduraw ko kanunay sa lalaki nga akong naibgan. Naghandom na hinuon kog samot nga makauban siya.”

Mike: “Mobasa akog mga basahon ug motan-awg mga programa bahin sa sekso. Mapukaw ug samot ang akong kaibog kon mag-estoryahay kami sa akong mga higala bahin sa sekso. Dayon, sa nakauban nako ang usa ka dalaga nga kami rang duha, abi nakog pwede ra kaming maggaksanay ug maghalokay nga walay mahitabo namo kay nagtuo ko nga makapugong ra ko.”

Andrew: “Nahigalam ako sa pagtan-awg pornograpiya sa Internet. Nahimo akong palainom. Ug moadto ako sa mga parti uban sa mga batan-on nga wala magsunod sa mga prinsipyo sa Bibliya.”

Tracy: “Ako nahibalo nga daotan ang pagpakigsekso nga dili pa minyo, apan wala ko kini bale-baleha. Wala koy intensiyon nga makigsekso una pa maminyo, apan nadala ako sa bul-og sa akong pagbati. Sa sinugdan wala ako tulisoka sa akong konsensiya.”

● Nalipay ka ba sa imong paagi sa pagkinabuhi?

Deborah: “Sa primero mora kog nakagawas sa hawla ug nalipay nga makahimo na akog bisan unsa sama sa akong mga higala. Apan wala kini magdugay. Sa akong pamati hugaw ako, gipahimudsan, ug wala nay kahulogan ang akong kinabuhi. Nagbasol gyod ko nga nabuong ko ang akong pagkababaye ug dili na gayod nako kini mabawi pa.”

Andrew: “Gipatumanan ko ang akong kailibgon nga walay popanagana. Apan gitulisok ako sa akong konsensiya ug nagbasol.”

Tracy: “Ang akong pagkabatan-on nadaot tungod sa imoralidad. Abi nakog magmalipayon kami sa akong trato. Apan dili diay. Kini nakahatag hinuon kanamog kasub-anan, kalisdanan, ug kasakit. Kada gabii akong maghilak, nga nagbasol nga nakalapas ako sa mga balaod ni Jehova.”

Mike: “Bug-at kaayo ang akong dughan. Nagpakabuta ako sa epekto sa akong gihimo diha sa uban, apan wala kini magsilbi. Naguol kaayo ko kay nakaamgo ko nga nakasakit ako sa uban tungod kay kaugalingon ra nako ang akong gihunahuna.”

● Unsay imong ikatambag sa mga batan-on nga nagtuo nga mapig-oton ra kaayo ang mga prinsipyo sa Bibliya?

Tracy: “Sunda ang mga prinsipyo ni Jehova, ug pakig-uban sa mga tawong sama usab nimog prinsipyo. Magmalipayon gyod ka.”

Deborah: “Ang imong buhat dili lamang makaapektar kanimo kondili makaapektar usab kini sa uban. Madaot gyod ka kon dili ka mosunod sa tambag sa Diyos.”

Andrew: “Kay kulang ka pag eksperyensiya, abi nimog nindot ang kinabuhi sa imong mga higala. Matakdan ka sa ilang tinamdan. Busa magmaalamon sa pagpilig mga higala. Salig kang Jehova, ug dili ka gayod magmahay.”

Mike: “Ang pipila sa labing bililhong mga gasa nga gihatag ni Jehova kanimo mao ang imong dignidad ug kaputli. Kon imo lang usikan kining mga gasaha kay dili ka makakontrolar sa imong kaugalingon, imong gipakaubos ang imong kaugalingon. Isulti ang imong mga problema ngadto sa imong ginikanan ug sa ubang mga hamtong. Kon nakasala ka, isugid dayon kini ug tul-ira ang angay tul-iron. Motawhay ang imong kinabuhi kon mosunod ka kang Jehova.”

Mga Prinsipyo sa Bibliya​—Gapos o Panagang?

Si Jehova maoy usa ka “malipayong Diyos,” ug gusto niya nga magmalipayon ka usab. (1 Timoteo 1:11; Ecclesiastes 11:9) Ang mga prinsipyo sa Bibliya alang gayod sa imong kaayohan. Tingali para nimo mora kinig gapos, nga dili ka makalihok, kay mapig-oton ra kaayo kini. Apan sa pagkatinuod, ang mga prinsipyo sa Bibliya samag panagang nga makapanalipod kanimo batok sa kadaot.

Makasalig gyod ka sa Bibliya. Kon mosunod ka sa mga prinsipyo niini, dili ka lang makapalipay kang Jehova kondili makabenepisyo pod ka.​—Isaias 48:17.

TEKSTO

“Ako, si Jehova, mao ang imong Diyos, ang Usa nga nagtudlo kanimo aron ikaw makabaton ug kaayohan.”​—Isaias 48:17.

SUGYOT

Paghunahunag mga paagi sa pagkombinsir sa imong manghod kon nganong maayong sundon ang mga prinsipyo sa Bibliya. Ang pagpadayag sa imong pagtuo ngadto sa uban maoy usa ka epektibong paagi sa pagsilsil niini diha sa imong kasingkasing.

NAHIBALO KA BA . . . ?

Sa usa lang ka pagpamilok madaot nimo ang imong relasyon kang Jehova, apan daghang tuig ang gikinahanglan aron mapasig-uli ang imong maayong relasyon kaniya.

ANG AKONG PLANONG HIMOON!

Kini ang akong himoon aron masabtan nako kon nganong maayong sundon ang mga prinsipyo sa Bibliya ․․․․․

Kini ang akong himoon kon masina ako niadtong nagsunod sa mga prinsipyo sa kalibotan ․․․․․

Kon unsay akong gustong ipangutana sa akong ginikanan bahin niini ․․․․․

UNSAY IMONG HUNAHUNA?

● Kon bahin sa mga resulta sa paglapas sa mga balaod sa Diyos, nganong ang imong kasinatian dili mao ang labing maayong magtutudlo?

● Unsay imong nakat-onan gikan sa mga komento ni Deborah, Mike, Andrew, ug Tracy?

● Nganong nagtuo ang ubang tawo nga mapig-oton ra kaayo ang mga prinsipyo sa Bibliya, apan nganong sayop kana nga panglantaw?

[Blurb sa panid 285]

“Mas lisod antoson ang pagtulisok sa konsensiya tungod sa pagtago sa imong sala kay sa kaguol nga bation kon madisiplina ka.”​—Donna

[Mga hulagway sa panid 288]

Ang mga prinsipyo sa Bibliya dili makababag sa imong kalipay; kini magsilbing imong panalipod

Kapitulo 35

Sa Unsang Paagi Mahimo Akong Higala sa Diyos?

Tungod sa krisis nga naagoman ni Jeremy, iyang naamgohan nga importante kaayo ang pagkahimong higala sa Diyos. “Sa 12 anyos pa ako, gibiyaan kami sa among amahan,” siya miingon. “Usa ka gabii niana nag-ampo ko sa wala pa matulog, nga nangaliyupo kang Jehova nga unta mouli ang akong amahan.”

Kay naguol, gibasa ni Jeremy ang iyang Bibliya. Natandog kaayo siya sa dihang nabasa niya ang Salmo 10:14. Kini nga teksto naghisgot bahin kang Jehova: “Kanimo modangop ang alaot, ang batang ilo-sa-amahan. Ikaw nahimong iyang magtatabang.” Si Jeremy miingon: “Morag nakig-estorya si Jehova kanako ug nagsulti kanako nga siya ang akong magtatabang ug akong Amahan. Wala nay laing amahan ang molabaw pa kaniya.”

PAREHAS man ugaling o dili ang imong kahimtang kang Jeremy, ang Bibliya nagpakita nga gusto ni Jehova nga mahimo ka niyang higala. Sa pagkatinuod ang Bibliya nag-ingon: ‘Pakigsuod sa Diyos, ug siya makigsuod kanimo.’ (Santiago 4:8) Palandonga ang kahulogan nianang mga pulonga: Bisan tuod dili nimo siya makita​—ug siya labaw gayod kanimo—​gidapit ka ni Jehova nga Diyos nga mahimong iyang higala!

Apan kinahanglang duna kay himoon aron mahimo kang higala sa Diyos. Aniay ilustrasyon: Kon duna kay tanom sa balay, nahibalo ka nga dili kini motubo kon dili atimanon. Aron molabong, kinahanglang imo kining bisbisan kanunay ug ibutang sa dapit nga makatubo kinig maayo. Sama usab niini ang pagpakighigala sa Diyos. Unsay imong himoon aron magkasuod kamo?

Importante ang Pagtuon

Sa panaghigalaay, hinungdanon ang pagpakigsulti ug pagpamati. Tinuod usab kana sa atong pagpakighigala sa Diyos. Mamati kita sa isulti sa Diyos kanato pinaagi sa pagbasa ug pagtuon sa Bibliya.​—Salmo 1:2, 3.

Tingali dili kaayo ka ganahang magtuon. Daghang batan-on mas gustong motan-awg TV, magdula, o makighugoyhugoy sa ilang mga higala. Apan kon gusto kang makighigala sa Diyos, walay laktod nga paagi. Kinahanglang mamati ka kaniya pinaagi sa pagtuon sa iyang Pulong.

Apan ayawg kabalaka. Dili malisod ang pagtuon ug Bibliya. Maganahan ra ka unya sa pagtuon​—bisag dili kaayo ka hinuon. Ang una nimong buhaton mao ang paggahin ug panahon alang sa pagtuon ug Bibliya. “Aduna koy eskedyul,” miingon ang batan-ong babaye nga si Lais. “Magbasa kog usa ka kapitulo sa Bibliya inigmata nako sa buntag.” Ang 15 anyos nga si Maria dunay laing pamaagi. “Magbasa ko kadiyot ug Bibliya kada gabii una pa matulog,” siya miingon.

Aron makahimo kag imong programa sa pagtuon, tan-awa ang panid 292. Dayon isulat sa ubos kon kanus-a ka makagahin ug bisan mga 30 minutos lang o kapin pa sa pagtuon sa Pulong sa Diyos.

․․․․․

Ang pag-eskedyul ug panahon maoy unang lakang. Sa makasugod ka na sa pagtuon, tingali imong mamatikdan nga usahay lisod sabton ang Bibliya. Tingali mouyon ka sa 11-anyos nga si Jezreel, kinsa prangkang miingon, “Ang ubang bahin sa Bibliya dili kaayo makalingaw ug nagkinahanglag pagpaminsar aron masabtan.” Kon ingon niana ang imong hunahuna, ayawg surender. Isipa kanunay ang pagtuon sa Bibliya ingong panahon nga imong gigahin sa pagpamati sa imong higala, si Jehova nga Diyos. Sa ngadto-ngadto ang imong pagtuon sa Bibliya mahimong makapainteres ug mapuslanon, depende sa imong paningkamot!

Hinungdanon ang Pag-ampo

Ang pag-ampo maoy atong pagpakig-estorya sa Diyos. Talagsaon gayod kini nga gasa! Makasangpit ka kang Jehova nga Diyos sa bisan unsang oras, adlaw man o gabii. Andam siya kanunay sa pagpamati kanimo. Gawas pa, interesado siyang mamati sa imong isulti. Busa ang Bibliya nag-awhag kanimo: “Sa tanang butang pinaagi sa pag-ampo ug pangamuyo uban ang pagpasalamat ipahibalo ang inyong mga pangaliya sa Diyos.”​—Filipos 4:6.

Sumala sa gipakita nianang tekstoha, daghan kag ikasulti kang Jehova. Mahimo nimong isulti ang imong mga problema ug mga kabalaka. Imong ikapadayag usab ang imong angayng pasalamatan. Dili ba magpasalamat man ka sa imong mga higala tungod sa maayong mga butang nga ilang nahimo kanimo? Makapasalamat ka usab kang Jehova, kinsa nakahimog daghang butang alang kanimo kay sa nahimo sa imong mga higala.​—Salmo 106:1.

Ilista ang pipila ka butang nga angay nimong pasalamatan kang Jehova.

․․․․․

Tingali adunay mga panahon nga mobati kag kahadlok ug kabalaka. Kini ang giingon sa Salmo 55:22: “Itugyan ang imong palas-anon kang Jehova, ug siya magasapnay kanimo. Dili gayod niya itugot nga matarog ang matarong.”

Isulat ang pipila ka butang nga imong gikabalak-an nga gusto nimong iampo.

․․․․․

Personal nga Kasinatian

Adunay laing bahin sa imong pagpakighigala sa Diyos nga importante kaayo. Ang salmistang si David misulat: “Oh tilawi ug tan-awa ninyo nga si Jehova maayo.” (Salmo 34:8) Bag-o pang nakalurang ang unos sa kinabuhi ni David sa dihang iyang gisulat ang Salmo 34. Siya nagtago-tago tungod kay si Haring Saul naglungot-lungot sa pagpatay kaniya nga nakahatag kaniyag bug-at kaayong problema. Napugos siya sa pagtago sa lugar sa mga Filistehanon nga iyang mga kaaway. Kay nagtuo nga patyon gayod siya, si David nagpakaaron-ingnong buang aron dili siya mamatikdan.​—1 Samuel 21:10-15.

Wala manghambog si David nga nakaikyas siya tungod kay maayong laki siya. Hinunoa, si Jehova ang iyang gipasidunggan nga maoy nagluwas kaniya. Sa unang bahin sa salmo nga gihisgotan sa ibabaw, siya misulat: “Nagpakisayod ako kang Jehova, ug gitubag niya ako, ug giluwas niya ako gikan sa tanan kong gikalisangan.” (Salmo 34:4) Tungod niini si David nakaawhag sa uban sa ‘pagtilaw ug pagtan-aw nga maayo si Jehova.’a

May mahinumdoman ka bang kaagi sa imong kinabuhi diin imong natagamtam ang kahingawa ni Jehova kanimo? Kon duna, isulat kini sa ubos. Sugyot: Dili kinahanglang talagsaon kaayo ang imong kaagi. Hunahunaa ang ginagmayng mga panalangin nga imong nadawat matag adlaw, nga ang pipila niini tingali wala kaayo nimo pabilhi.

․․․․․

Tingali gitudloan ka sa imong ginikanan bahin sa Bibliya. Kon mao, panalangin kana. Apan kinahanglang ugmaron gihapon nimo ang imong personal nga relasyon sa Diyos. Kon wala ka pa makahimo niini, ang impormasyon niining kapituloha makatabang kanimo sa pagpakigsuod sa Diyos. Panalanginan ni Jehova ang imong mga paningkamot. Ang Bibliya nag-ingon: “Padayon sa pagpangayo, ug igahatag kini kaninyo; padayon sa pagpangita, ug kamo makakaplag.”​—Mateo 7:7.

BASAHA ANG DUGANG PA BAHIN NIINI NGA ULOHAN DIHA SA TOMO 1, KAPITULO 38 UG 39

[Footnote]

TEKSTO

“Malipayon kadtong mahunahunaon sa ilang espirituwal nga panginahanglan.”​—Mateo 5:3.

SUGYOT

Pagbasag upat ka panid sa Bibliya matag adlaw, ug mahuman nimo kinig basa sulod sa mga usa ka tuig.

NAHIBALO KA BA . . . ?

Gitagana ni Jehova kining libroha aron imong basahon ug ipadapat ang mga tambag niini nga gikan sa Bibliya. Kini nagpakita lang nga interesado si Jehova kanimo.​—Juan 6:44.

ANG AKONG PLANONG HIMOON!

Kini ang akong himoon aron daghan kog makat-onan sa akong personal nga pagtuon sa Bibliya ․․․․․

Kini ang akong himoon aron regular ako nga makaampo ․․․․․

Kon unsay akong gustong ipangutana sa akong ginikanan bahin niini ․․․․․

UNSAY IMONG HUNAHUNA?

● Unsay imong himoon aron malingaw ka sa imong pagtuon sa Bibliya?

● Nganong mamati si Jehova sa pag-ampo sa mga tawong dili hingpit?

● Unsay imong himoon aron mouswag ang kalidad sa imong pag-ampo?

[Blurb sa panid 291]

“Sa bata pa ko, balikbalik lang ang akong pag-ampo. Karon mag-ampo ako bahin sa maayo ug dili maayong mga panghitabo sa matag adlaw. Kay lainlain man ang mahitabo matag adlaw dili na balikbalik ang akong pag-ampo.”​—Eve

[Kahon/​Hulagway sa panid 292]

Tun-i ang Imong Bibliya

1. Pagpilig usa ka asoy sa Bibliya nga gusto nimong basahon. Pag-ampo aron makasabot ka sa imong gibasa.

2. Basahag maayo ang asoy. Ayaw pagdali. Handurawa ang imong gibasa. Gamita ang tanan nimong igbalati: Tan-awa ang nagakahitabo, pamatia ang tingog sa mga karakter, simhota ang hangin, tilawi ang pagkaon, ug uban pa. Buhia ang asoy diha sa imong hunahuna!

3. Palandonga ang imong nabasa. Pangutan-a ang imong kaugalingon:

● Nganong giapil man ni Jehova kini nga asoy diha sa iyang Pulong?

● Kinsa sa mga karakter ang angayng sundogon, ug kinsa ang dili maayong mga panig-ingnan?

● Unsang mapuslanong leksiyon ang akong mapupo niining akong gibasa?

● Unsay gitudlo kanako niini nga asoy bahin kang Jehova ug sa iyang ginahimo?

4. Pag-ampo kang Jehova. Ipadayag kaniya kon unsay imong nakat-onan sa imong pagtuon sa Bibliya ug kon unsaon nimo pagpadapat sa impormasyon diha sa imong kinabuhi. Pasalamati kanunay si Jehova sa gasa nga iyang gihatag kanimo​—ang iyang Pulong, ang Balaang Bibliya!

[Hulagway]

“Ang imong pulong maoy lampara sa akong tiil, ug kahayag sa akong alagianan.”​—Salmo 119:105.

[Kahon/​Hulagway sa panid 294]

Unaha kon Unsay Importante

Wala kay panahon sa pag-ampo? Wala kay panahon sa pagtuon ug Bibliya? Makapanahon ka niini kon mahibalo ka kon unsang mga buluhaton ang angay nimong unahon.

Sulayi kini: Pagkuhag balde ug butangi kinig dagkong mga bato. Unya pun-a kinig balas. Karon duna ka nay balde nga punog bato ug balas.

Dayon habwaig sulod ang balde. Ibalik ug sulod ang balas, unya ibutang ang mga bato. Wala ka na bay kabutangan sa bato? Tungod kana kay giuna man god nimog butang ang balas diha sa balde.

Unsay leksiyon niini? Ang Bibliya nag-ingon: ‘Tinoa ang mas hinungdanong mga butang.’ (Filipos 1:10) Kon imong unahon ang gagmayng mga butang sama sa kalingawan, daw wala ka nay panahon alang sa dagkong mga butang​—mga buluhaton may kalabotan sa pag-alagad sa Diyos. Apan kon imong ipadapat ang tambag sa Bibliya, imong makita nga may panahon ka sa mga buluhaton maylabot sa pag-alagad sa Diyos ug sa paglingawlingaw. Depende kana kon unsay imong unahon pagbutang diha sa balde!

[Hulagway sa panid 290]

Sama sa usa ka tanom, ang pagpakighigala sa Diyos nagkinahanglag pagtagad aron kini molambo

Kapitulo 36

Sa Unsang Paagi Madepensahan Ko ang Akong Pagtuo sa Diyos?

Unsay nakapugong nimo sa pagpadayag sa imong pagtuo ngadto sa imong klasmet?

□ Kulag kahibalo sa Bibliya

□ Mahadlok nga biaybiayon

□ Maglisod sa pagpakigsulti

Unsa para nimo ang labing sayon nga paagi sa pagpadayag sa imong pagtuo?

□ Pagpakigsulti sa isigkabatan-on

□ Pagpahayag atubangan sa tibuok klase

□ Paghimog report bahin sa akong binase sa Bibliya nga pagtuo

Kinsa kaha sa imong mga eskolmet ang maminaw sa imong pagpatin-aw sa Bibliya kon mahibalo ka kon unsaon pagsugod sa pagpamatuod. ․․․․․

TINGALI ang imong mga eskolmet dili kaayo interesadong maminaw bahin sa Diyos. Paghisgot ug bisan unsa​—mga dula, sinina, ug mga lalaki o babaye—​di ba mag-ilogay silag estorya. Apan paghisgot ug Diyos, di ba mokalit lang silag kahilom.

Dili pod buot ingnon nga ang imong mga higala dili motuo ug Diyos; kadaghanan kanila nagtuo ug Diyos. Apan ang uban maulaw sa paghisgot bahin niini. Lagmit dili sila interesadong mamati niini.

Ikaw Komosta?

Normal lang nga magpanuko ka sa paghisgot bahin sa Diyos uban sa imong mga eskolmet. Siyempre dili ka gustong lainan sila nimo, ug labaw na kon ila kang kataw-an! Mahitabo kaha na nimo kon maghisgot ka bahin sa imong tinuohan? Posible. Sa laing bahin, basig makuratan ka kay daghan kanila nagpangitag mga tubag sa mga pangutana sama sa: Unsay dulnganan niining kalibotana? ug Nganong gubot kaayo kini? Tingali mas gusto silang makigsulti maylabot niini sa parehas nilag edad kay sa usa ka hamtong.

Bisan pa niana, tingali maglisod ka sa pagpakigsulti sa imong mga higala bahin sa relihiyon. Apan ang tinuod, dili kinahanglang mora kag panatiko paminawon, ug ayaw usab kabalaka kon ugaling masayop ka. Ang pagpamatuod sa imong pagtuo sama rag pagtuon sa pagtugtog ug instrumento sa musika. Lisod ba kini primero? Tingali. Apan pinaagi sa pagbansay-bansay mahanas ka ra. Ugaling unsaon nimo pagsugod?

Kasagaran, makasugod ka pinaagi sa paghisgot ug ordinaryong mga butang. Pananglitan, sa panahong maghisgot ang klase ug mga balita, mahimong mopadayag ka sa imong opinyon pinasukad sa Kasulatan. O pwedeng makigsulti ka sa usa lang nimo ka klasmet. Ang ubang Kristohanong mga batan-on nagbutang ug basahon nga pinasukad sa Bibliya diha sa ilang lamesa kay basig dunay mainteres niini. Kasagaran, duna gayoy klasmet nimo nga motan-aw niini ug sa ingon makasugod ka sa pagpamatuod kaniya!

Hain niining mga paagiha ang gusto nimong sulayan? ․․․․․

May mahunahunaan ka bang laing paagi sa pagpadayag sa imong pagtuo ngadto sa imong klasmet? Kon duna, isulat kini.

․․․․․

Usahay ang mga proyekto sa eskuylahan makahatag kanimog higayon sa pagpamatuod sa imong pagtuo. Pananglitan, unsay imong himoon kon maghisgot ug ebolusyon? Sa unsang paagi madepensahan nimo ang imong pagtuo sa paglalang?

Pagdepensa sa Paglalang

“Sa dihang gitudlo ang ebolusyon sa klase, lahi kaayo kini kay sa akong nahibaloan,” miingon ang batan-ong si Ryan. “Gitudlo kini ingong tinuod, ug natarantar ko.” Parehas usab ug gisulti si Raquel. “Gikulbaan ko sa dihang miingon ang among maestra sa social studies nga ebolusyon ang sunod namong leksiyon,” siya miingon. “Nahibalo ko nga kinahanglang ipatin-aw nako sa klase kon unsa ang akong baroganan bahin niining kontrobersiyal nga isyu.”

Unsay imong bation kon hisgotan ang ebolusyon diha sa klase? Nagtuo ka nga ang Diyos maoy ‘naglalang sa tanang butang.’ (Pinadayag 4:11) Imong makita ang ebidensiya nga dunay Usa nga intelihente nga nagdisenyo sa mga butang sa imong palibot. Apan ang mga libro ug ang imong magtutudlo moingon nga kita maoy produkto sa ebolusyon. Kinsa ka man nga makiglalis sa mga eksperto kono?

Ayawg kabalaka kay dili ikaw ra ang wala magtuo sa teoriya sa ebolusyon. Ang tinuod, daghang siyentipiko wala magtuo niana, lakip na ang daghang magtutudlo ug mga estudyante.

Bisan pa niana, aron makadepensa ka sa imong pagtuo sa paglalang, kinahanglang mahibalo ka kon unsa gayoy gitudlo sa Bibliya bahin niini. Dili kinahanglang debatehan pa ang mga butang nga wala hisgoti sa Bibliya. Tagda ang pipila ka pananglitan.

Ang akong libro sa siyensiya nag-ingon nga ang yuta ug ang sistema solar naglungtad sulod sa bilyon-bilyon nang katuigan. Ang Bibliya nag-ingon nga ang yuta ug ang tibuok uniberso naglungtad na sa wala pa magsugod ang unang adlaw sa paglalang. Busa, ang yuta ug ang sistema solar lagmit bilyon-bilyon ka tuig nag edad.​—Genesis 1:1.

Ang akong magtutudlo nag-ingon nga ang yuta imposibleng gilalang sulod lang sa unom ka adlaw. Ang Bibliya wala mag-ingon nga matag usa sa unom ka adlaw sa paglalang maoy literal nga 24 oras.

Gihisgotan sa among klase ang daghang pananglitan kon sa unsang paagi nangausab ang mga mananap ug mga tawo pagdagan sa panahon. Ang Bibliya nag-ingon nga gilalang sa Diyos ang buhing mga butang “sumala sa ilang mga matang.” (Genesis 1:20, 21) Kini wala magpaluyo sa ideya nga ang kinabuhi naggikan sa walay kinabuhing butang ni gisugdan sa Diyos ang proseso sa ebolusyon pinaagig usa ka selula. Apan, ang matag “matang” posibleng makapatunghag daghang panagkadaiya. Busa, sumala sa Bibliya posible nga may mahitabong kausaban sulod lang sa matag “matang.”

Sumala sa nahisgotan niini nga kapitulo, unsay imong itubag kon ang imong magtutudlo o klasmet moingon:

“Napamatud-an sa siyensiya nga kita maoy produkto sa ebolusyon.” ․․․․․

“Dili ko motuog Diyos tungod kay dili nako siya makita.” ․․․․․

Magmasaligon sa Imong Pagtuo!

Kon gimatuto ka sa Kristohanong ginikanan, lagmit nagtuo ka sa paglalang kay mao kanay gitudlo kanimo. Apan karon nga dako ka na, gusto kang mosimba sa Diyos ‘uban sa imong gahom sa pangatarongan’ kay lig-on na ang pundasyon sa imong pagtuo. (Roma 12:1) Tungod niana, pangutan-a ang imong kaugalingon, ‘Unsay nakapakombinsir kanako nga adunay usa ka Maglalalang?’ Ang pananglitan nga gihisgotan sa 14-anyos nga si Sam mao ang lawas sa tawo. “Kini komplikado ug kuti kaayo,” siya miingon, “ug ang tanang parte niini hiusang nagaobra. Imposible gayod nga mitungha lag iya ang tawhanong lawas!” Ang 16-anyos nga si Holly miuyon: “Sukad nadayagnos ako nga duna koy diabetes daghan na kog nakat-onan kon sa unsang paagi nagaobra ang lawas. Pananglitan, katingalahan ang mahimo sa pancreas​—usa ka gamayng organo nga anaa sa likod sa tungol—​sa pagpaobra sa dugo ug sa ubang mga organo.”

Ilista ang tulo ka butang nga nakapakombinsir nimo nga dunay Maglalalang.

1. ․․․․․

2. ․․․․․

3. ․․․․․

Walay katarongan nga makulbaan o maulaw ka tungod kay nagtuo kag Diyos ug sa paglalang. Kon palandongon ang ebidensiya, makataronganon gayod ang pagtuo nga kita nga mga tawo gidisenyo sa intelihente nga Maglalalang.

Kon sumaryohon, ang ebolusyon, dili ang paglalang, ang nagkinahanglag dakong pagtuo​—sa ato pa, pagtuo ug mga milagro bisag walay tighimog milagro! Sa mapalandong nimog maayo kining butanga pinaagi sa paggamit sa imong gahom sa pangatarongan, mahimo kang mas masaligon sa pagdepensa sa imong pagtuo sa Diyos.

TEKSTO

“Wala ko ikaulaw ang maayong balita; kini, sa pagkatinuod, gahom sa Diyos alang sa kaluwasan sa matag usa nga may pagtuo.”​—Roma 1:16.

SUGYOT

Pagbantay sa imong lihok kon magpamatuod ka bahin sa imong pagtuo. Kon morag nagpanuko ka, mabugal-bugalan ka sa imong mga higala. Apan kon masaligon ka sa pagpamatuod​—sama sa pagkamasaligon sa imong mga eskolmet sa pagpadayag sa ilang opinyon—​lagmit matahod ka nila.

NAHIBALO KA BA . . . ?

Usahay kon pangutan-on ang mga magtutudlo sa pagpamatuod sa ebolusyon, sila dili makapamatuod niini ug sila makaamgo nga ila lang gidawat ang teoriya kay kini may gitudlo kanila.

ANG AKONG PLANONG HIMOON!

Kini ang akong himoon aron makasugod sa pagpakigsulti sa akong klasmet bahin sa Bibliya ․․․․․

Kini ang akong itubag kon pangutan-on ko kon nganong nagtuo ako ug Maglalalang ․․․․․

Kon unsay akong gustong ipangutana sa akong ginikanan

bahin niini ․․․․․

UNSAY IMONG HUNAHUNA?

● Nganong hinungdanong ipakigsulti ngadto sa uban kon unsay imong gituohan?

● Unsa ang pipila ka paagi aron dili ka malisdan sa pagpamatuod sa imong pagtuo bahin sa paglalang diha sa eskuylahan?

● Sa unsang paagi imong ikapasundayag ang imong apresasyon sa Usa nga naglalang sa tanang butang?​—Buhat 17:26, 27.

[Blurb sa panid 299]

“Ang eskuylahan maoy usa ka teritoryo sa pagsangyaw diin kita lang nga mga batan-on ang makasangyaw.”​—Iraida

[Hulagway sa panid 298]

Sama sa pagtugtog ug instrumento sa musika, ang pagpamatuod sa imong pagtuo nagkinahanglag katakos ug pinaagig pagbansay-bansay mahanas ka

[Hulagway sa panid 300, 301]

Imong mabuntog ang imong kahadlok sa pagdepensa sa imong pagtuo