May kaila ka ba nga Saksi ni Jehova? Tingali may Saksi kang silingan, kauban sa trabaho, o klasmet. O tingali gikaestorya ka na namo bahin sa Bibliya. Kinsa ba gayod kami, ug nganong isangyaw namo ang among tinuohan?

Kami ordinaryo rang mga tawo. Kami lainlaig kagikan ug kahimtang sa kinabuhi. Ang uban namo kaniadto lahig relihiyon, samtang ang uban wala magtuog Diyos. Apan una mi mahimong Saksi, gisusi namo pag-ayo ang mga pagtulon-an sa Bibliya. (Buhat 17:11) Kami nakombinsir sa among nakat-onan ug midesidir sa pagsimba kang Jehova nga Diyos.

Kami nakabenepisyo sa pagtuon sa Bibliya. Sama sa uban, nagsagubang kamig mga problema ug kahuyangan. Apan tungod sa pagpadapat sa mga prinsipyo sa Bibliya matag adlaw, may dayag nga kauswagan sa among pagkinabuhi. (Salmo 128:1, 2) Usa kana sa mga rason kon nganong ginapaambit namo sa uban ang among nakat-onan sa Bibliya.

Kami nagpadapat sa diyosnong mga prinsipyo. Ang mga prinsipyo nga gitudlo sa Bibliya makatabang sa usa nga mahimong malipayon, matinahoron, matinud-anon, ug buotan. Kini makatabang usab nga ang usa mahimong responsableng lungsoranon, ug makapalambo sa panaghiusa sa pamilya ug sa maayong moralidad. Kay kombinsidong “ang Diyos dili mapihigon,” giisip namo nga kami usa ka internasyonal nga pamilyang nahiusa sa tinuohan, nga wala mabahinbahin tungod sa rasa ug politika. Bisag ordinaryo ra mi nga mga tawo, talagsaon kami nga pundok.​—Buhat 4:13; 10:34, 35.

• Sa unsang mga bahin nga ang mga Saksi ni Jehova sama sa ubang tawo?

• Unsang mga prinsipyo ang nakat-onan sa mga Saksi sa ilang pagtuon sa Bibliya?

Daghan ang nagtuo nga ang Saksi ni Jehova maoy ngalan sa usa ka bag-ong relihiyon. Apan kapig 2,700 ka tuig kanhi, ang mga alagad sa bugtong matuod nga Diyos gitawag nag iyang “mga saksi.” (Isaias 43:10-12) Una pa sa 1931, nailhan ming mga Estudyante sa Bibliya. Nganong gidala namo karon ang ngalang Saksi ni Jehova?

Kini nagpaila sa among Diyos. Sumala sa karaang mga manuskrito, ang ngalan sa Diyos nga Jehova makitag linibo ka beses sa Bibliya. Sa daghang hubad, kining ngalana giilisag mga titulo, sama sa Ginoo o Diyos. Apan ang matuod nga Diyos nagpadayag kang Moises sa iyang ngalang Jehova, nga nag-ingon: “Kini ang akong ngalan hangtod sa hangtod.” (Exodo 3:15) Niining paagiha, gipaila niya nga siya lahi sa tanang bakak nga diyos. Kami mapasigarbohong nagdala sa balaang ngalan sa Diyos.

Kini nagpaila sa among buluhaton. Sugod sa matarong nga si Abel, daghang tawo sa karaang panahon ang nagpamatuod bahin sa ilang pagtuo kang Jehova. Latas sa kasiglohan, si Noe, Abraham, Sara, Moises, David, ug uban pa miduyog niining “bagang panganod sa mga saksi.” (Hebreohanon 11:4–12:1) Sama sa tawong motestigos o mosaksi diha sa korte dapig sa inosenteng biktima, kami determinadong magpadayag sa kamatuoran bahin sa among Diyos.

Kami nagsundog kang Jesus. Siya gitawag sa Bibliya nga “matinumanon ug matuod nga saksi.” (Pinadayag 3:14) Si Jesus mismo nag-ingon nga iyang ‘gipaila ang ngalan sa Diyos’ ug padayong ‘nagpamatuod sa kamatuoran’ bahin sa Diyos. (Juan 17:26; 18:37) Busa ang tinuod nga mga sumusunod sa Kristo kinahanglang magdala sa ngalan ni Jehova ug magpaila niana. Ang mga Saksi ni Jehova naningkamot sa paghimo niini.

• Nganong sa ulahi ang mga Estudyante sa Bibliya ginganlag mga Saksi ni Jehova?

• Unsa na ka dugay nga si Jehova may mga saksi dinhi sa yuta?

• Kinsa ang kinalabwang Saksi ni Jehova?

Ang Bibliya nagtagna nga human mamatay ang Kristo, ang bakak nga mga magtutudlo motungha taliwala sa unang mga Kristohanon ug magtuis sa kamatuoran sa Bibliya. (Buhat 20:29, 30) Nahitabo gayod kini. Ilang gisagolag paganong mga ideya ang pagtulon-an ni Jesus, ug namugna ang bakak nga Kristiyanidad. (2 Timoteo 4:3, 4) Nganong makatino kita karon nga husto ang atong pagsabot sa tinuod nga gitudlo sa Bibliya?

Gipadayag ni Jehova ang kamatuoran. Siya nagtagna nga ‘sa panahon sa kataposan, ang tinuod nga kahibalo modagaya.’ (Daniel 12:4) Sa 1870, nakita sa gamayng grupo nga nangita sa kamatuoran nga ang daghang doktrina sa simbahan supak sa Kasulatan. Busa misugod sila pagsusi aron masabtan ang orihinal nga mga pagtulon-an sa Bibliya, ug sa tabang ni Jehova ilang nasabtan kini.

Gitun-an pag-ayo sa sinserong mga tawo ang Bibliya. Ang sinserong mga Estudyante sa Bibliya, nga maoy pagtawag sa mga Saksi ni Jehova kaniadto, may paagi sa pagtuon nga among gisunod karon. Tema por tema nilang hisgotan ang Bibliya. Kon makabasa silag teksto nga lisod sabton, ilang tan-awon ang ubang mga teksto aron masabtan kini. Kon may gikauyonan silang ideya nga motukma sa ubang bahin sa Kasulatan, ila kining isulat. Busa, kay gigamit nila ang Bibliya sa pagpatin-aw sa kaugalingon niini, ilang nakaplagan pag-usab ang kamatuoran bahin sa ngalan ug Gingharian sa Diyos, iyang katuyoan alang sa tawo ug sa yuta, kahimtang sa patay, ug paglaom sa pagkabanhaw. Tungod niana, sila nakalingkawas sa daghang bakak nga mga pagtulon-an ug tradisyon.​—Juan 8:31, 32.

Pagka-1879 nasabtan sa mga Estudyante sa Bibliya nga panahon na nga ipakaylap ang kamatuoran. Busa nianang tuiga, ilang gisugdan pagpatik ang magasing gipatik gihapon namo karon, Ang Bantayanang Torre Nagapahayag sa Gingharian ni Jehova. Karon among gipaambit sa uban ang mga kamatuoran sa Bibliya diha sa 240 ka kayutaan ug sa kapig 900 ka pinulongan. Ang tinuod nga kahibalo midagaya gayod!

• Human mamatay ang Kristo, unsay nahitabo sa kamatuoran sa Bibliya?

• Sa unsang paagi nakaplagan namo pag-usab ang kamatuoran sa Bibliya?

Sa daghang dekada, ang mga Saksi ni Jehova naggamit, nag-imprenta, ug nag-apod-apod ug lainlaing bersiyon sa Bibliya. Apan among nakita nga kinahanglang maggamag bag-ong hubad nga mas makatabang sa mga tawo sa pagkat-on sa “tukmang kahibalo sa kamatuoran,” nga maoy kabubut-on sa Diyos alang sa tanan. (1 Timoteo 2:3, 4) Busa, sa 1950 gisugdan namo pag-release ang mga bahin sa modernog pinulongan nga Bibliya, ang New World Translation. Kini nga Bibliya tukmang gihubad sa kapig 170 ka pinulongan.

Gikinahanglan ang usa ka Bibliya nga sayon sabton. Paglabay sa panahon ang pinulongan mausab, ug daghang hubad ang naggamit ug karaang mga pulong nga lisod sabton. Dugang pa, nadiskobrehan ang karaang mga manuskrito nga mas tukma ug duolduol sa orihinal, mao nga mas nasabtan ang karaang Hebreohanon, Aramaiko, ug Grego.

Gikinahanglan ang hubad nga dili motipas sa pulong sa Diyos. Inay usbon ang orihinal nga mga sinulat diha sa Pulong sa Diyos, ang mga maghuhubad kinahanglang dili motipas niana. Apan sa kadaghanang bersiyon sa Balaang Kasulatan, ang ngalan sa Diyos nga Jehova wala gamita.

Gikinahanglan ang usa ka Bibliya nga magpasidungog sa Awtor niini. (2 Samuel 23:2) Sa New World Translation, ang ngalan ni Jehova gipasig-ulig mga 7,000 ka beses diin kini makita sa labing karaang mga manuskrito sa Bibliya ingon sa gipakita sa ubos. (Salmo 83:18) Ingong resulta sa daghang katuigan nga pag-research, kini nga Bibliya nindot basahon kay tin-aw kining nagpahayag sa hunahuna sa Diyos. May New World Translation ka man sa imong pinulongan o wala, gidasig ka namo sa pagbasa sa Pulong ni Jehova matag adlaw.​—Josue 1:8; Salmo 1:2, 3.

• Nganong nakahukom mi sa paggamag bag-ong hubad sa Bibliya?

• Aron makakat-on sa kabubut-on sa Diyos, unsay kinahanglang himoon matag adlaw?