Wala miy gisuweldohang klero diha sa among organisasyon. Hinuon, sama sa gihimo sa pagsugod sa Kristohanong kongregasyon, may kuwalipikadong mga tigdumala nga itudlo “aron magbantay sa kongregasyon sa Diyos.” (Buhat 20:28) Ang maong mga ansiyano maoy mga lalaki nga hamtong sa espirituwal nga nagapanguna sa kongregasyon ug nagbantay sa panon, nga “dili pinugos, kondili kinabubut-on atubangan sa Diyos; dili tungod sa tinguha nga mamentaha, kondili kinasingkasing.” (1 Pedro 5:1-3) Unsay ilang ginahimo para namo?

Sila nag-atiman ug nagapanalipod kanamo. Ang mga ansiyano naggiya ug nagtabang sa kongregasyon nga magpabiling suod kang Jehova. Kay nahibalo nga kining hinungdanong asaynment gisalig kanila sa Diyos, sila dili magharihari sa Iyang katawhan, kondili nag-alagad alang sa among kaayohan ug kalipay. (2 Corinto 1:24) Samag magbalantay nga nag-atiman gayod sa matag karnero, ang mga ansiyano naningkamot nga mailhan nila ang matag membro sa kongregasyon.​—Proverbio 27:23.

Sila nagtudlo kanamo kon unsaon pagbuhat sa kabubut-on sa Diyos. Kada semana, ang mga ansiyano magdumala sa mga tigom sa kongregasyon aron molig-on ang among pagtuo. (Buhat 15:32) Kining debotadong mga lalaki manguna usab sa pagsangyaw, nga makig-uban ug magbansay kanamo sa tanang bahin sa ministeryo.

Sila nagpalig-on kanamo. Aron matabangan mi nga molig-on ang among relasyon kang Jehova, ang mga ansiyano moduaw kanamo sa balay o makigsulti kanamo sa Kingdom Hall aron motanyag ug tabang ug paghupay gikan sa Kasulatan.​—Santiago 5:14, 15.

Gawas sa ilang buluhaton sa kongregasyon, kadaghanan sa mga ansiyano may mga trabaho ug responsabilidad sa pamilya nga hatagan sab nilag panahon. Kining kugihang mga brader takos sa among pagtahod.​—1 Tesalonica 5:12, 13.

• Unsa ang papel sa mga ansiyano diha sa kongregasyon?

• Sa unsang mga paagi ang mga ansiyano nagpakitag personal nga interes kanamo?

Gipakita sa Bibliya nga duha ka grupo sa Kristohanong mga lalaki ang nag-atiman sa mga responsabilidad diha sa kongregasyon​—“mga tigdumala ug mga ministeryal nga alagad.” (Filipos 1:1) Sagad, ubay-ubay ang ansiyano ug ministeryal nga alagad sa matag kongregasyon. Unsay buluhaton sa mga ministeryal nga alagad?

Sila nagtabang sa tanang ansiyano sa kongregasyon. Ang mga ministeryal nga alagad maoy lig-on sa espirituwal, kasaligan, ug kugihang mga brader, nga ang pipila batan-on ug ang uban edaran. Sila nag-atiman sa ubang hinungdanon apan sagad rutinang buluhaton sa kongregasyon aron ang mga ansiyano makapokus sa pagtudlo ug pag-atiman sa panon.

Sila naghimog praktikal nga mga serbisyo. Ang pipila ka ministeryal nga alagad giasayn nga atendant aron abiabihon ang tanang manambong sa tigom. Ang uban kanila mag-atiman sa sound system, literatura, ug panalapi sa kongregasyon, ug mag-asayn ug teritoryo nga sangyawan sa mga membro sa kongregasyon. Motabang usab sila sa pagmentinar sa Kingdom Hall. Mahimong hangyoon sila sa mga ansiyano sa pagtabang sa tigulang nga mga igsoon. Ang mga ministeryal nga alagad andam motuman sa bisan unsang buluhaton nga iasayn kanila, ug ang kongregasyon nagtahod kanila tungod niana.​—1 Timoteo 3:13.

Sila maayong panig-ingnan ingong mga Kristohanon. Ang mga ministeryal nga alagad gipili tungod sa ilang Kristohanong mga hiyas. Sa dihang mohatag silag mga bahin sa tigom, mapalig-on ang among pagtuo. Kay sila maayong panig-ingnan sa pagsangyaw, natabangan mi nila nga mas magmadasigon. Ang pagkooperar nila sa mga ansiyano nakaamot sa kalipay ug panaghiusa sa kongregasyon. (Efeso 4:16) Ngadtongadto, sila usab mokuwalipikar nga mahimong ansiyano.

• Unsay mga hiyas sa mga ministeryal nga alagad?

• Sa unsang paagi makatabang ang mga ministeryal nga alagad aron hapsay ang dagan sa kongregasyon?

Ang Kristohanon Gregong Kasulatan kadaghang naghisgot kang Bernabe ug apostol Pablo. Sila maoy mga tigdumala nga nagapanaw aron duawon ang mga kongregasyon sa unang siglo. Ngano? Sila interesado gayod sa kaayohan sa ilang mga isigkamagtutuo. Miingon si Pablo nga buot niyang “balikan ug duawon ang mga igsoon” sa pagsusi kanila. Andam siya sa pagpanawg gatosan ka kilometro sa paglig-on kanila. (Buhat 15:36) Kana ang tinguha sa among mga tigdumala sa sirkito karon.

Sila moduaw aron palig-onon mi. Ang matag tigdumala sa sirkito moduawg mga 20 ka kongregasyon, nga mogugol ug usa ka semana sa matag kongregasyon, duha ka beses kada tuig. Makabenepisyo gayod kami sa kasinatian sa maong mga brader ug sa ilang asawa, kon minyo. Sila naningkamot nga makaila sa batag tigulang ug ganahang mouban kanamo sa pagsangyaw ug pagdumalag mga pagtuon sa Bibliya. Sila moduaw sa mga igsoon kuyog sa mga ansiyano, ug mohatag silag mga pakigpulong diha sa tigom ug asembliya aron palig-onon mi.​—Buhat 15:35.

Sila magpakitag interes sa tanan. Ang mga tigdumala sa sirkito interesado gayod sa espirituwalidad sa mga kongregasyon. Sila makigmiting sa mga ansiyano ug ministeryal nga alagad aron sa paghisgot sa nahimong pag-uswag ug paghatag ug tambag kon unsaon pagtuman sa ilang mga responsabilidad. Sila motabang sa mga payunir nga molampos sa ministeryo ug malipayng makighimamat sa mga bag-ohan ug mahibalo sa ilang pag-uswag sa kamatuoran. Ang matag usa kanila naghago gayod ingong “isigkamagbubuhat alang sa [atong] kaayohan.” (2 Corinto 8:23) Angay natong sundogon ang ilang pagtuo ug debosyon sa Diyos.​—Hebreohanon 13:7.

• Nganong ang mga tigdumala sa sirkito moduaw sa mga kongregasyon?

• Sa unsang paagi makabenepisyo ka sa ilang pagduaw?

Kon may kalamidad, organisahon dayon sa mga Saksi ni Jehova ang pagtabang sa mga igsoong nabiktima. Kana pagpakita sa among tinuod nga gugma sa usag usa. (Juan 13:34, 35; 1 Juan 3:17, 18) Sa unsang mga paagi motabang mi?

Modonar mig kuwarta. Sa dihang may dakong gutom sa Judea, ang mga Kristohanon sa Antioquia nagpadalag kuwarta ngadto sa ilang mga igsoon sa pagtuo. (Buhat 11:27-30) Sa susama, inigkahibalo namo nga ang among mga igsoon sa laing dapit anaa sa kalisdanan, magpadala mig mga donasyon pinaagi sa among kongregasyon aron makatabang sa nanginahanglan.​—2 Corinto 8:13-15.

Mohatag mig praktikal nga tabang. Panahon sa kalamidad, ang mga ansiyano magsusi kon luwas ba ang matag membro sa kongregasyon. Ang relief committee maghikay sa pagtaganag pagkaon, hinlong tubig, sinina, kapuy-an, ug medikal nga tabang. Ang mga Saksing may kahanas moboluntaryo sa paghatag ug tabang o sa pagreper sa naguba nga mga balay ug Kingdom Hall. Tungod sa among panaghiusa ug kasinatian sa pagtinabangay, makatigom dayon mig gikinahanglang hinabang ug makaorganisar ug mga boluntaryo. Tinuod, tabangan namo ang among “mga igsoon sa pagtuo,” apan tabangan usab namo ang uban kon posible, bisag unsay ilang relihiyon.​—Galacia 6:10.

Motanyag mig espirituwal ug emosyonal nga suporta. Ang mga biktima sa kalamidad ilabinang nagkinahanglag paghupay. Sa maong panahon, kami palig-onon ni Jehova, “ang Diyos sa tanang paghupay.” (2 Corinto 1:3, 4) Malipay ming ipaambit ang mga saad sa Bibliya ngadto sa nawad-ag paglaom, nga pasaligan sila nga hapit nang wagtangon sa Gingharian sa Diyos ang tanang hinungdan sa kasakit ug pag-antos.​—Pinadayag 21:4.

• Nganong ang mga Saksi makatabang dayon panahon sa kalamidad?

• Unsang paghupay gikan sa Kasulatan ang among ikapaambit sa mga biktima sa kalamidad?

Sa hapit nang mamatay si Jesus, siya nakigsulti sa upat niya ka tinun-an​—si Pedro, Santiago, Juan, ug Andres. Sa dihang iyang gitagna ang ilhanan sa iyang presensiya sa kataposang mga adlaw, siya nangutana: “Kinsa ba gayod ang matinumanon ug maalamong ulipon nga gitudlo sa iyang agalon ibabaw sa iyang mga sulugoon sa panimalay, sa paghatag kanilag pagkaon sa hustong panahon?” (Mateo 24:3, 45; Marcos 13:3, 4) Gipasaligan ni Jesus ang iyang mga tinun-an nga isip ilang “agalon,” magtudlo siyag mga tigtaganag espirituwal nga pagkaon sa iyang mga sumusunod panahon sa kataposan. Kinsa ang maong ulipon?

Kini maoy gamayng grupo sa dinihogang mga sumusunod ni Jesus. Ang “ulipon” mao ang Nagamandong Lawas sa mga Saksi ni Jehova. Sila nagtaganag espirituwal nga pagkaon sa hustong panahon sa ilang kaubang mga magsisimba kang Jehova. Kami nagdepende niining matinumanong ulipon alang sa padayong ‘pagtagana kanamog pagkaon sa hustong panahon.’​—Lucas 12:42.

Kini nagdumala sa panimalay sa Diyos. (1 Timoteo 3:15) Gihatag ni Jesus sa ulipon ang bug-at nga responsabilidad sa pagdumala sa buluhaton sa yutan-ong bahin sa organisasyon ni Jehova​—pag-atiman sa materyal nga kabtangan, pagdumala sa buluhatong pagsangyaw, ug pagtudlo kanamo pinaagi sa among mga kongregasyon. Busa, aron matagan-an kami sa among gikinahanglan sa hustong panahon, ang “matinumanon ug maalamong ulipon” nag-apod-apod ug espirituwal nga pagkaon pinaagi sa mga publikasyon nga among gigamit sa among ministeryo ug sa mga programa sa among mga tigom ug asembliya.

Ang ulipon matinumanon sa mga kamatuoran sa Bibliya ug sa pagsangyaw sa maayong balita, ug kini maalamon nga nag-atiman sa intereses sa Kristo sa yuta. (Buhat 10:42) Sa panalangin ni Jehova, miuswag ang buluhaton niini ug midagaya ang espirituwal nga pagkaon.​—Isaias 60:22; 65:13.

• Kinsay gitudlo ni Jesus sa pagtaganag espirituwal nga pagkaon sa iyang mga tinun-an?

• Sa unsang mga paagi matinumanon ug maalamon ang ulipon?

Sa unang siglo, ang gamayng grupo sa “mga apostoles ug sa mga ansiyano sa Jerusalem” nag-alagad isip nagamandong lawas, nga naghimog importanteng mga desisyon ingong representante sa tanang dinihogang Kristohanon. (Buhat 15:2) Aron makab-ot ang gikahiusahang desisyon, sila naghisgot sa giingon sa Kasulatan ug nagpagiya sa balaang espiritu sa Diyos. (Buhat 15:25) Kana nga sumbanan maoy gisunod karon.

Kini gigamit sa Diyos sa pagbuhat sa iyang kabubut-on. Ang dinihogang mga brader nga membro sa Nagamandong Lawas interesado kaayo sa Pulong sa Diyos ug dakog kasinatian sa organisasyonal ug espirituwal nga mga butang. Magmiting sila kada semana aron hisgotan ang panginahanglan sa mga Saksi sa tibuok kalibotan. Sama sa unang siglo, ang binase sa Bibliya nga mga instruksiyon ihatag pinaagi ug mga sulat o sa mga nagapanawng tigdumala ug uban pa. Kini makatabang sa katawhan sa Diyos nga magkahiusa sa hunahuna ug buhat. (Buhat 16:4, 5) Ang Nagamandong Lawas nagdumala sa pag-andam ug espirituwal nga pagkaon, nagdasig sa tanan nga himoong prayoridad ang pagsangyaw sa Gingharian, ug nagdumala sa pagtudlog mga brader nga manguna sa kongregasyon.

Kini nagsunod sa giya sa espiritu sa Diyos. Ang Nagamandong Lawas nagsalig sa Soberano sa uniberso, si Jehova, ug sa Ulo sa kongregasyon, si Jesus, alang sa giya. (1 Corinto 11:3; Efeso 5:23) Ang mga membro niini wala maghunahuna nga sila ang lider sa katawhan sa Diyos. Sila ug ang tanang dinihogang Kristohanon, “padayong nagsunod sa Kordero [si Jesus] bisan asa siya moadto.” (Pinadayag 14:4) Pabilhan gayod sa Nagamandong Lawas ang atong pag-ampo alang kanila ug sa ilang buluhaton.

• Kinsay mga membro sa nagamandong lawas sa unang siglo?

• Sa unsang paagi ang Nagamandong Lawas karon nagpagiya sa Diyos?

Ang Bethel maoy Hebreohanong pulong nga nagkahulogang “Balay sa Diyos.” (Genesis 28:17, 19, footnote) Kini haom nga pagtawag sa mga pasilidad sa mga Saksi ni Jehova sa tibuok kalibotan diin ginaorganisar ug ginasuportahan ang buluhatong pagsangyaw. Ang Nagamandong Lawas nag-alagad sa tibuok kalibotang hedkuwarter sa New York State, U.S.A., ug gikan didto kini nagdumala sa buluhaton sa mga sangang buhatan sa daghang nasod. Sa katibuk-an, ang mga nag-alagad sa maong mga pasilidad gitawag ug pamilyang Bethel. Samag pamilya, sila nag-uban sa pagpuyo, pagtrabaho, pagpangaon, ug pagtuon sa Bibliya.​—Salmo 133:1.

Espesyal nga dapit diin ang mga membro niini nga pamilya andam mosakripisyo. Sa matag Bethel, adunay Kristohanong mga lalaki ug babaye nga bug-os panahong nagtuman sa kabubut-on sa Diyos ug nagpalambo sa intereses sa Gingharian. (Mateo 6:33) Sila walay suweldo, apan gitagan-ag puy-anan, pagkaon, ug alawans alang sa personal nga galastohan. Ang matag usa sa Bethel giasaynag trabaho​—sa opisina, kosina, o sa kan-anan. Ang uban giasayn sa imprentahanan o tahianag libro, paghinlog kuwarto, paglaba, maintenance, o uban pa.

Puliking dapit nga nagsuportar sa pagsangyaw sa Gingharian. Ang pangunang katuyoan sa Bethel mao ang pagpakaylap sa kamatuoran sa Bibliya ngadto sa labing daghang tawo. Kining brosyura maoy usa ka pananglitan. Kini gisulat ubos sa pagdumala sa Nagamandong Lawas, gipadala pinaagig Internet ngadto sa gatosan ka team sa mga maghuhubad sa tibuok kalibotan, giimprenta sa paspas kaayong mga makina diha sa ubay-ubayng pasilidad sa Bethel, ug gipadala sa kapig 120,000 ka kongregasyon. Sa matag proseso, ang mga pamilyang Bethel nagsuportar gayod sa labing dinaliang buluhaton​—ang pagsangyaw sa maayong balita.​—Marcos 13:10.

• Kinsay nag-alagad sa Bethel, ug unsay mga tagana alang kanila?

• Unsang dinaliang buluhaton ang gisuportahan sa mga kalihokan sa Bethel?

Ang mga membro sa pamilyang Bethel nag-alagad sa lainlaing departamento nga nagsuportar sa buluhatong pagsangyaw sa usa o ubay-ubayng nasod. Dunay naasayn sa paghubad, pag-imprentag magasin, pagtahig mga libro, paghimog audio ug video, o sa pondohanag literatura, ug uban pa.

Komite sa Sangang Buhatan ang nagdumala sa buluhaton. Gitugyan sa Nagamandong Lawas ang pagdumala sa kalihokan sa matag sangang buhatan ngadto sa Komite sa Sangang Buhatan, nga ang membro tulo o kapin pang kuwalipikado nga mga ansiyano. Ang komite magreport kanunay ngadto sa Nagamandong Lawas bahin sa pag-uswag sa buluhaton sa matag lugar nga ilang gidumala ug sa motunghang mga problema. Ang maong mga report makatabang sa Nagamandong Lawas sa pagdesisyon kon unsay hisgotan sa umaabot nga mga publikasyon, tigom, ug asembliya. Ang mga representante sa Nagamandong Lawas regular nga ginapadala aron duawon ang mga sangang buhatan ug giyahan ang mga Komite sa Sangang Buhatan sa pagtuman sa ilang mga asaynment. (Proverbio 11:14) Himoon ang espesyal nga programa nga naglakip ug pakigpulong sa representante sa hedkuwarter aron palig-onon ang mga Saksi nga anaa sa teritoryo sa sangang buhatan.

Gisuportahan ang lokal nga mga kongregasyon. Ang tinudlong mga brader sa sangang buhatan mag-aprobar sa pagpormag bag-ong mga kongregasyon. Sila nagdumala sa kalihokan sa mga payunir, misyonaryo, ug tigdumala sa sirkito nga nag-alagad sa teritoryo sa sangang buhatan. Silay mag-organisar sa mga asembliya ug kombensiyon, pagtukod ug bag-ong mga Kingdom Hall, ug pagpadalag literatura sa mga kongregasyon. Ang tanang ginahimo diha sa sangang buhatan makaamot sa hapsay nga dagan sa buluhatong pagsangyaw.​—1 Corinto 14:33, 40.

• Sa unsang paagi ang mga Komite sa Sangang Buhatan nagtabang sa Nagamandong Lawas?

• Unsang mga responsabilidad ang giatiman sa sangang buhatan?

Aron ikamantala namo sa bug-os ang “maayong balita” ngadto sa “matag nasod ug tribo ug pinulongan ug katawhan,” kami nagpatik ug literatura sa kapig 900 ka pinulongan. (Pinadayag 14:6) Sa unsang paagi nahimo namo kining lisod nga buluhaton? Tungod kana sa tabang sa mga magsusulat sa lainlaing nasod ug sa grupo sa kugihang mga maghuhubad​—tanan mga Saksi ni Jehova.

Ang mga artikulo isulat una sa Iningles. Ang Nagamandong Lawas nagdumala sa buluhaton sa Writing Department sa among hedkuwarter. Hikayon niini nga departamento ang mga asaynment sa mga magsusulat nga nag-alagad sa hedkuwarter ug sa ubang sangang buhatan. Kay ang mga magsusulat lainlaig kagikan, ang among mga artikulo makapainteres sa mga tawo sa lainlaing kultura.

Ang mga artikulo ipadala ngadto sa mga maghuhubad. Human ma-edit ug maaprobahan ang mga artikulo, kini ipadala pinaagig Internet ngadto sa mga team sa maghuhubad sa tibuok kalibotan, nga maoy maghubad, mag-check, ug mag-proofread niana. Sila magpilig “tukmang mga pulong sa kamatuoran” aron ikapahayag ang eksaktong kahulogan sa Iningles diha sa lokal nga pinulongan.​—Ecclesiastes 12:10.

Ang computer makapadali sa buluhaton. Ang computer dili makapuli sa mga magsusulat ug maghuhubad. Apan kini makapadali sa ilang mga trabaho. Ang mga Saksi ni Jehova nagdisenyog Multilanguage Electronic Publishing System (MEPS) nga pinaagi niana maproseso ang nahubad nga mga artikulo diha sa gatosan ka pinulongan, mabutangag mga hulagway, ug maandam aron maimprenta.

Nganong naghago kami sa pagpatik ug mga basahon, bisan sa mga pinulongan nga pipila ka libo ray nagsulti? Kay kabubut-on ni Jehova nga “ang tanang matang sa tawo maluwas ug makakat-on sa tukmang kahibalo sa kamatuoran.”​—1 Timoteo 2:3, 4.

• Sa unsang paagi gisulat ang among mga publikasyon?

• Nganong gihubad namo ang among mga basahon sa daghan kaayong pinulongan?

Kada tuig, ang among organisasyon nagpatik ug nanagtag ug minilyong kopya sa Bibliya ug ubang publikasyon nga walay bayad. Nagtukod ug nagmentinar mig mga Kingdom Hall ug pasilidad sa sangang buhatan. Nagsuportar mig linibo ka Bethelite ug mga misyonaryo ug nagtaganag hinabang panahon sa kalamidad. Busa, mangutana ka tingali, ‘Asa gikan ang pondo alang niining tanan?’

Libre mig mga serbisyo, walay ikapulo, o pagpangolekta. Bisag dako ang gasto sa among buluhatong pag-ebanghelyo, dili mi mangayog kuwarta. Kapig 100 ka tuig kanhi, ang ikaduhang gula sa magasing Watchtower nag-ingon nga kami nahibalo nga si Jehova ang nagsuportar kanamo ug “dili gayod magpakilimos ni mangayog pinansiyal nga tabang gikan sa mga tawo”​—ug kana gayoy nahitabo!​—Mateo 10:8.

Ang among buluhaton gisuportahag boluntaryong mga amot. Gipabilhan sa daghan ang among buluhaton sa pagtudlog Bibliya ug nagdonar silag kuwarta alang niini. Ang mga Saksi mismo malipayong naghatag sa ilang panahon, kusog, kuwarta, ug ubang butang sa pagtuman sa kabubut-on sa Diyos sa yuta. (1 Cronicas 29:9) Sa Kingdom Hall ug sa among mga asembliya ug mga kombensiyon, may mga kahon nga kahulogag amot niadtong gustong moamot. Puwede sab mohatag ug donasyon pinaagi sa among website nga jw.org. Ang mga amot sagad naggikan sa mga dili dato, sama sa kabos nga babayeng balo nga gihisgotan ni Jesus kinsa mihulog ug duha ka gagmayng sensilyo sa panudlanag bahandi sa templo. (Lucas 21:1-4) Busa si bisan kinsa regular nga ‘makagahin’ ug kuwarta nga iamot sumala sa “gihukom sa iyang kasingkasing.”​—1 Corinto 16:2; 2 Corinto 9:7.

Kombinsido mi nga si Jehova padayong magpalihok sa kasingkasing niadtong gustong ‘mopasidungog kaniya pinaagi sa ilang bililhong mga butang’ sa pagsuportar sa buluhaton sa Gingharian aron matuman ang iyang kabubut-on.​—Proverbio 3:9.

• Nganong ang among organisasyon lahi sa ubang relihiyon?

• Sa unsang paagi gigamit ang boluntaryong mga amot?

Ingon sa gipasabot sa ngalang Kingdom Hall, ang pangunang pagtulon-an sa Bibliya nga ginahisgotan didto mao ang Gingharian sa Diyos, nga maoy tema sa ministeryo ni Jesus.​—Lucas 8:1.

Sentro sa matuod nga pagsimba sa komunidad. Giorganisar diha sa Kingdom Hall ang pagsangyaw sa maayong balita sa Gingharian sa lokal nga teritoryo. (Mateo 24:14) Lainlaig gidak-on ug disenyo ang mga Kingdom Hall, apan ang tanan simpleng tinukod. Sagad dili lang usa ka kongregasyon ang naggamit sa usa ka Kingdom Hall. Di pa dugay, libolibong Kingdom Hall ang gitukod o gi-renovate (sa aberids nga lima kada adlaw) alang sa nagkadaghang magmamantala ug kongregasyon. Sa unsang paagi naposible kini?​—Mateo 19:26.

Natukod tungod sa mga donasyon. Ang donasyon ipadala ngadto sa sangang buhatan aron may pondo nga magamit sa mga kongregasyon sa pagtukod o pagremodel ug Kingdom Hall.

Gitukod sa way suweldong mga boluntaryo nga lainlaig kagikan ug kahimtang. Sa daghang kayutaan, giorganisar ang mga Kingdom Hall Construction Group. Ang mga grupo sa mga construction servant ug mga boluntaryo mobalhin sa lainlaing kongregasyon sa usa ka nasod, bisan sa hilit nga mga lugar, aron motabang sa lokal nga mga kongregasyon sa pagtukod sa ilang Kingdom Hall. Sa ubang nasod, gitudlo ang kuwalipikadong mga Saksi sa pagdumala sa pagtukod ug pagremodel sa mga Kingdom Hall sa rehiyong giasayn kanila. Bisan tuod daghang may kahanas ang moboluntaryo sa pagtrabaho sa matag proyekto, ang kadaghanang boluntaryo membro sa lokal nga kongregasyon. Kini naposible tungod sa espiritu ni Jehova ug sa tibuok kalag nga paningkamot sa iyang mga alagad.​—Salmo 127:1; Colosas 3:23.

• Nganong ginganlag Kingdom Hall ang among tigomanan?

• Sa unsang paagi naposible ang pagtukod ug mga Kingdom Hall sa tibuok kalibotan?

Ang matag Kingdom Hall sa mga Saksi ni Jehova nagdala sa balaang ngalan sa Diyos. Busa ang pagtabang nga mahuptan kining hinlo, presentable, ug maayog kondisyon usa gayod ka pribilehiyo ug hinungdanong bahin sa among sagradong pagsimba. Ang tanan mahimong makigbahin.

Moboluntaryo mig hinlo human sa tigom. Human sa matag tigom, ang mga igsoon malipay sa paghinlo. Apan kas-a sa semana, hinloan namo ang tibuok tigomanan. Usa ka ansiyano o ministeryal nga alagad ang magdumala niini, nga sagad magsunod ug checklist. Depende sa kinahanglang himoon, naay manilhig, mag-mop o mag-vacuum sa salog, magtrapo sa abog, maghan-ay sa mga silya, maglimpiyo sa banyo, bentana, ug samin, maglabayg basura, o maglimpiyo sa nataran. Labing menos kas-a sa usa ka tuig, mogahin mig usa ka adlaw aron mag-general cleaning. Paapilon pod namo sa pipila ka buluhaton ang mga bata aron matudloan sila sa pagtahod sa among dapit sa pagsimba.​—Ecclesiastes 5:1.

Motabang mi kon dunay ayohonon. Kada tuig, detalyadong inspeksiyonon ang sulod ug gawas sa Kingdom Hall. Base niini, himoon ang regular nga pagmentinar aron mahuptan nga maayog kondisyon ang tigomanan ug malikayan ang way hinungdang gasto. (2 Cronicas 24:13; 34:10) Ang hinlo ug maayong pagkamentinar nga Kingdom Hall haom gayong dapit sa pagsimba sa among Diyos. Pinaagi sa pagpakigbahin niana, mapakita namo nga among gihigugma si Jehova ug gipabilhan ang among dapit sa pagsimba. (Salmo 122:1) Kini usab makahatag ug maayong impresyon diha sa komunidad.​—2 Corinto 6:3.

• Nganong angay namong atimanon ang among dapit sa pagsimba?

• Unsay gihimong mga kahikayan aron mahuptang hinlo ang Kingdom Hall?

Gusto ba nimong mag-research aron mouswag ang imong kahibalo sa Bibliya? Interesado ka bang mahibalo bahin sa usa ka teksto o tawo, lugar, o butang nga gihisgotan sa Bibliya? O naghunahuna ka ba kon ang Bibliya makatabang sa imong problema? Nan, adtoa ang librarya sa Kingdom Hall.

Kini dunay makatabang nga mga galamiton sa pag-research. Lagmit wala ka makabaton sa tanang binase sa Bibliya nga publikasyon sa mga Saksi ni Jehova diha sa imong pinulongan. Apan kadaghanan sa bag-ong mga publikasyon anaa sa librarya sa Kingdom Hall. Lagmit kini usab may lainlaing hubad sa Bibliya, diksiyonaryo, ug ubang reperensiya. Magamit nimo ang bisan unsang publikasyon sa librarya una o human sa tigom. Kon dunay computer, lagmit kini dunay Watchtower Library. Usa kini ka electronic program nga naundan sa daghan namong publikasyon, ug sayon ra ang pagpangitag reperensiya bahin sa usa ka ulohan, pulong, o teksto.

Kini mapuslanon sa mga estudyante sa Tigom nga Kinabuhi ug Ministeryo. Puwede nimong gamiton ang librarya sa Kingdom Hall dihang mangandam sa imong bahin. Ang tigdumala sa Tigom nga Kinabuhi ug Ministeryo maoy nag-atiman sa librarya. Iyang paneguroon nga anaa ang kinabag-ohang mga publikasyon ug kini maayong pagkaatiman. Siya o ang nag-Bible study nimo makatabang kanimo sa pagpangita sa gikinahanglan nimong impormasyon. Apan, ang bisan unsang libro sa librarya dili mahimong kuhaon gikan sa Kingdom Hall. Ug siyempre, ampingan gyod nato paggamit ang mga libro ug dili kini sulatan.

Ang Bibliya miingon nga aron “makaplagan ang kahibalo sa Diyos,” angayng andam ta sa pagpangita niini “samag tinagong bahandi.” (Proverbio 2:1-5) Ang librarya sa Kingdom Hall makatabang kanimo sa pagsugod sa pagpangita niini.

• Unsang mga galamiton sa pag-research ang anaa sa librarya sa Kingdom Hall?

• Kinsay makatabang aron mapahimuslan nimo ang librarya?

Si Jesu-Kristo miingon sa iyang mga tinun-an: “Palamdaga ang inyong kahayag atubangan sa mga tawo aron ilang makita ang inyong maayong mga buhat ug himayaon ang inyong Amahan nga anaa sa langit.” (Mateo 5:16) Sa maong katuyoan, gipahimuslan namo ang modernong teknolohiya, lakip ang Internet. Ang among website nga jw.org^® mao ang opisyal nga tinubdan sa impormasyon sa Internet labot sa tinuohan ug buluhaton sa mga Saksi ni Jehova. Unsay anaa niini?

Mga tubag sa Bibliya sa komon nga mga pangutana. Makaplagan nimo ang tubag sa pipila ka importante kaayong mga pangutana. Pananglitan, ang mga tract nga Matapos pa Kaha ang Pag-antos? ug Mabuhi ba Gyod Pag-usab ang mga Patay? mabatonan online sa kapig 900 ka pinulongan. Mabatonan usab ang Bag-ong Kalibotang Hubad sa kapig 170 ka pinulongan ug ang daghang basahon nga makatabang sa pagtuon sa Bibliya, sama sa librong Unsay Gitudlo Kanato sa Bibliya? ug bag-ong mga gula sa Ang Bantayanang Torre ug Pagmata! Kadaghanan niini mabasa o mapamatian diha sa Internet o ma-download sa format nga MP3, PDF, o EPUB. Makaimprenta pa gani kag pipila ka panid niini aron ikapaambit sa usa ka interesado diha sa iya mismong pinulongan! Duna poy mga video diha sa daghang senyas nga pinulongan. Maka-download usab kag mga dramatic Bible reading, drama sa Bibliya, ug nindot nga musika nga makalingaw.

Tinuod nga impormasyon bahin sa mga Saksi ni Jehova. Anaa usab ang bag-ong mga balita ug video labot sa among tibuok kalibotang buluhaton, mga panghitabo nga nakaapektar sa mga Saksi ni Jehova, ug paghatag namog mga hinabang. Makita sab nimo ang mga eskedyul sa umaabot nga mga kombensiyon ug impormasyon sa pagkontak sa among mga sangang buhatan.

Pinaagi niini, among ginapadan-ag ang kahayag sa kamatuoran ngadto sa kinalay-ang mga dapit sa yuta. Nakabenepisyo niini ang mga tawo sa tanang kontinente, apil ang Antarctica. Kami nanghinaot nga “magpadayon ang paspas nga pagkaylap sa pulong ni Jehova” sa tibuok yuta alang sa kahimayaan sa Diyos.​—2 Tesalonica 3:1.

• Sa unsang paagi ang jw.org nagtabang sa mas daghang tawo sa pagkat-on sa kamatuoran sa Bibliya?

• Unsay buot nimong susihon sa among website?