Daghang tawo ang wala na mosimba kay wala sila makakaplag ug espirituwal nga katagbawan o kahupayan. Nan, nganong angay kang motambong sa Kristohanong tigom sa mga Saksi ni Jehova? Unsay imong masinati didto?

Malipay kang makauban ang mahigugmaong mga tawo. Sa unang siglo, ang mga Kristohanon giorganisar ingong mga kongregasyon, ug sila nagtigom sa pagsimba sa Diyos, pagtuon sa Kasulatan, ug sa pagdasig sa usag usa. (Hebreohanon 10:24, 25) Kay may gugma sa usag usa, gibati nila nga kauban nila ang tinuod nga mga higala​—ang ilang mga igsoon sa pagtuo. (2 Tesalonica 1:3; 3 Juan 14) Gisundog namo ang ilang sumbanan ug gibati namo ang samang kalipay.

Makakat-on ka sa pagpadapat sa mga prinsipyo sa Bibliya. Sama sa kapanahonan sa Bibliya, ang mga lalaki, babaye, ug mga bata magkauban sa tigom. Gamiton sa kuwalipikadong mga magtutudlo ang Bibliya sa pagpasabot kanato kon unsaon pagpadapat ang mga prinsipyo niini. (Deuteronomio 31:12; Nehemias 8:8) Ang tanan makaapil sa panaghisgot ug pag-awit, diin ikapahayag nato ang atong Kristohanong paglaom.​—Hebreohanon 10:23.

Mapalig-on ang imong pagtuo sa Diyos. Gisultihan ni apostol Pablo ang usa sa mga kongregasyon sa iyang adlaw: “Nangandoy ko nga makita mo . . . aron magdinasigay ta pinaagi sa inyong pagtuo ug sa akong pagtuo.” (Roma 1:11, 12) Ang kanunayng pagpakig-uban sa mga isigkamagtutuo diha sa tigom makapalig-on sa atong pagtuo ug determinasyon sa pagkinabuhi subay sa mga prinsipyo sa Bibliya.

Gidapit ka namo sa pagtambong sa among sunod nga tigom sa kongregasyon aron ikaw mismo ang makasinati niini. Malipay kami sa pag-abiabi kanimo. Ang tanang tigom walay bayad ug walay pagpangolekta.

• Unsang sumbanan ang gibasehan sa among tigom sa kongregasyon?

• Sa unsang paagi nakabenepisyo mi sa pagtambong sa tigom?

Bisan pag mosuot sa bagang lasang o magdaot ang panahon, regular ming motambong sa among tigom. Nganong ang mga Saksi ni Jehova maningkamot nga makig-uban sa isigkamagtutuo bisan pa sa mga problema sa kinabuhi ug kakapoy sa tibuok adlawng pagtrabaho?

Makaayo kini kanamo. ‘Magmahunahunaon sa usag usa,’ misulat si Pablo, nga nagtumong sa among mga igsoon sa kongregasyon. (Hebreohanon 10:24) Nagkahulogan kana nga sination ang usag usa. Busa si Pablo nagdasig nga kita magmahunahunaon sa uban. Pinaagi sa pagsinati sa ubang Kristohanong pamilya, nasayran namo nga ang pipila malamposong nakasagubang ug mga problema nga susama sa amoa, ug sila makatabang usab kanamo nga molampos.

Makapalig-on kini sa among panaghigalaay. Sa among tigom, ang nanambong maoy suod nga managhigala, dili lang basta kaila. Sa laing mga higayon, mag-uban pod mi sa paglingawlingaw. Unsay kaayohan niini? Mas mapabilhan namo ang usag usa, ug kana makapalig-on sa among gugma sa usag usa. Kay naugmad namo ang suod nga panaghigalaay, andam ming motabang kon may problema ang among isigkamagtutuo. (Proverbio 17:17) Pinaagi sa pagpakig-uban sa tanan diha sa kongregasyon, among gipakita nga kami may “samang pagtagad alang sa usag usa.”​—1 Corinto 12:25, 26.

Gidasig ka namo nga pilion ingong mga higala kadtong nagbuhat sa kabubut-on sa Diyos. Makaplagan nimo sila taliwala sa mga Saksi ni Jehova. Busa ayaw tugoti nga may mopugong kanimo sa pagpakig-uban kanamo.

• Nganong makaayo kanamo ang pagpakig-uban sa mga isigkamagtutuo diha sa tigom?

• Kanus-a ka puwedeng motambong aron mailaila nimo ang mga Saksi sa among kongregasyon?

Ang mga Kristohanon sa unang siglo mag-awit, mag-ampo, ug magbasa ug maghisgot sa Kasulatan diha sa ilang mga tigom, nga walay bisan unsang rituwal. (1 Corinto 14:26) Ingon usab niana ang among mga tigom.

Ang pagtudlo gibase sa Bibliya ug praktikal. Kada Sabado o Dominggo, ang matag kongregasyon magtigom aron maminaw sa 30 minutos nga pakigpulong sa Bibliya nga maghisgot kon sa unsang paagi mapadapat ang Kasulatan sa atong kinabuhi ug sa mga panghitabo karon. Gidasig ang tanan nga sundan ang mamumulong sa pagbasa sa mga teksto. Mosunod niini ang usa ka oras nga Pagtuon sa “Bantayanang Torre,” diin ang tanan makaambit sa panaghisgot sa usa ka artikulo sa tun-anang edisyon sa Bantayanang Torre. Kini magtabang namo sa pagpadapat sa Bibliya sa among kinabuhi. Ang samang artikulo tun-an diha sa kapig 120,000 ka kongregasyon sa tibuok kalibotan.

Kini makapauswag sa among katakos sa pagpanudlo. May tigom usab mi sa ubang adlaw sa semana. Kini dunay tulo ka bahin. Kini nga tigom mao ang Atong Kristohanong Kinabuhi ug Ministeryo, nga gibase sa Workbook sa Tigom nga Kinabuhi ug Ministeryo nga gitagana kada bulan. Ang unang bahin, ang Bahandi Gikan sa Pulong sa Diyos, makatabang namo nga mas masabtan ang mga teksto sa senemanang pagbasa sa Bibliya. Ang ikaduhang bahin mao ang Magmaepektibo sa Ministeryo. Kini dunay mga pasundayag kon unsaon pagpakig-estorya sa uban bahin sa Bibliya. May magtatambag nga motabang kanamo sa pagpauswag sa among katakos sa pagbasa ug pagpakigsulti. (1 Timoteo 4:13) Ang kataposang bahin mao ang Kristohanong Pagkinabuhi, nga maghisgot kon unsaon pagpadapat ang mga prinsipyo sa Bibliya sa adlaw-adlawng pagkinabuhi. Kini naglakip ug pangutanag tubag nga panaghisgot nga magpalalom sa among pagsabot sa Bibliya.

Kon motambong ka sa among tigom, makadayeg ka gayod sa kalidad sa edukasyon nga imong madawat gikan sa Bibliya.​—Isaias 54:13.

• Unsay imong mapaminawan sa tigom sa mga Saksi ni Jehova?

• Unsang tigom namo ang gusto nimong tambongan?

Nakita ba nimo sa mga hulagway niini nga brosyur nga desenteg sinina ang mga Saksi ni Jehova inigtambong nila sa tigom? Nganong hatagan namog pagtagad ang among sininaan ug pamostura?

Pagpakita kini sa among pagtahod sa Diyos. Tinuod, dili panggawas nga panagway ang ginatan-aw sa Diyos. (1 Samuel 16:7) Apan sa motambong mig tigom aron simbahon siya, gusto namong ipakita nga among gitahod ang Diyos ug ang among isigkamagtutuo. Kon moatubang tag huwes sa korte, tinoon gayod nato nga ang atong hitsura nagpakitag pagtahod sa iyang posisyon. Sa susama, ang among sininaan diha sa tigom magpaila nga among gitahod “ang Maghuhukom sa tibuok yuta,” si Jehova nga Diyos, ug ang among dapit sa pagsimba.​—Genesis 18:25.

Duna miy taas nga sukdanan. Ang Bibliya nagdasig nga ang sininaan sa mga Kristohanon angayng may “pagtahod sa kaugalingon ug sa uban” ug magpakitag “maayong panghunahuna.” (1 Timoteo 2:9, 10) Ang sininaan nga may “pagtahod sa kaugalingon ug sa uban” nagpasabot sa paglikay sa sinina nga lagmit makadanig pagtagad kay kini mapasigarbohon, seksi, o nagladlad sa lawas. Ang “maayong panghunahuna” makatabang namo sa pagpilig presentable nga sinina, dili lago o naghinobrag estilo. Wala ni magpasabot nga dili na mi makapilig sinina nga gusto namo. Ang presentable ug desente nga hitsura makahatag ug ‘pagdayeg sa pagtulon-an sa atong Manluluwas’ ug ‘maghimaya sa Diyos.’ (Tito 2:10; 1 Pedro 2:12) Busa ang among desenteng sininaan sa tigom makahatag ug maayong impresyon sa uban bahin sa pagsimba kang Jehova.

Ayawg kaulaw sa pagtambong sa Kingdom Hall bisag wala kay pormal nga sinina. Dili kinahanglang mahalon ang atong sinina, basta kini haom, hinlo, ug presentable.

• Unsa ka importante ang atong sininaan dihang kita magsimba sa Diyos?

• Unsang mga prinsipyo ang atong sundon bahin sa sininaan ug pamostura?

Kon ikaw nagtuon ug Bibliya uban sa mga Saksi ni Jehova, lagmit mangandam ka una mo magtuon. Maayong mangandam ka usab una motambong ug tigom aron makabenepisyo ka. Dako gayod ang kaayohan kon batasanon nato kana.

Tinoa kon kanus-a ug asa magtuon. Kanus-a ka makapokus sa pagtuon? Sayo ba sa buntag sa dili pa moadto sa trabaho o sa gabii kon natulog na ang mga bata? Bisag dili ka makatuon ug dugay, tinoa kon unsa ka taas nga panahon ang imong ikagahin, ug ayaw tugoting may makabalda nimo. Pangitag hilom nga dapit, ug patya ang radyo, TV, ug cell phone aron walay makabalda. Kon mag-ampo ka una magtuon, mahupayan ka sa mga kabalaka nianang adlawa ug makapokus ka sa pagtuon sa Pulong sa Diyos.​—Filipos 4:6, 7.

Badlisi ang tun-anan, ug pangandam aron makakomento. Una, tan-awa kon unsay katibuk-ang ideya sa tun-anan. Pamalandonga ang ulohan, tagda kon unsay koneksiyon sa mga sub-ulohan ngadto sa tema, ug analisaha ang mga hulagway ug repasong mga pangutana nga nagpasiugda sa pangunang mga punto. Dayon, basaha ang mga parapo ug pangitaa ang tubag sa mga pangutana. Basaha ang gisitar nga mga teksto ug pamalandonga kon unsay koneksiyon niini sa artikulo. (Buhat 17:11) Pagkakita nimo sa tubag, badlisi ang importanteng mga pulong nga magpahinumdom kanimo sa tubag. Dayon sa tigom, kon gusto kang motubag, iisa ang imong kamot ug pagkomentog mubo sa kaugalingon nimong pulong.

Pinaagi sa pagtuon sa lainlaing ulohan nga hisgotan sa matag tigom, madugangan ang imong kahibalo sa Bibliya, samag ‘natipigang bahandi.’​—Mateo 13:51, 52.

• Unsay imong batasanon aron makapangandam ka alang sa tigom?

• Sa unsang paagi makaandam ka sa pagkomento sa tigom?

Sukad sa karaang panahon, gusto ni Jehova nga ang matag pamilya mag-uban aron palig-onon ang ilang relasyon sa Diyos ug masuod sa usag usa. (Deuteronomio 6:6, 7) Busa ang mga Saksi ni Jehova mogahig panahon matag semana alang sa pamilyahanong pagsimba, nga maghisgot ug espirituwal nga mga butang nga haom sa ilang panginahanglan, sa paagi nga dili kaayo pormal. Bisag nag-inusara, magamit nimo kanang panahona para sa Diyos pinaagi sa pagtuon sa gipili nimong mga ulohan sa Bibliya.

Panahon kini nga mas masuod kang Jehova. “Duol sa Diyos, ug siya moduol kaninyo.” (Santiago 4:8) Mas mailhan pa nato si Jehova kon mahibalo ta sa iyang mga hiyas ug buhat nga narekord sa iyang Pulong, ang Bibliya. Ang sayon nga paagi nga masugdan ang pamilyahanong pagsimba mao ang pagbasag kusog sa Bibliya nga magkauban, nga tingali sundon ang senemanang eskedyul sa Tigom nga Kinabuhi ug Ministeryo. Ang matag membro sa pamilya mahimong pabasahog usa ka bahin sa Bibliya, ug dayon hisgotan kon unsay ilang nakat-onan.

Panahon kini nga mas magkasuod ang pamilya. Ang pagtuon sa Bibliya ingong pamilya makapalig-on sa relasyon sa banag asawa, ingon man sa ginikanan ug anak. Angay nga kini usa ka sadyang panahon matag semana nga gikahinaman sa tanan. Depende sa edad sa mga bata, ang ginikanan makapilig haom nga topiko, tingali gikan sa mga artikulo sa Bantayanang Torre ug Pagmata! o sa among website nga jw.org. Mahimong hisgotan ang problema nga naatubang sa mga anak sa eskuwelahan ug kon unsaon kini pagsagubang. Puwedeng tan-awon ug hisgotan ang mga video sa JW Broadcasting^® (tv.jw.org). Mahimo usab praktison ang mga awit alang sa tigom, ug dayon magmeryenda.

Kining espesyal nga panahon nga magkauban sa pagsimba kang Jehova matag semana makatabang sa pamilya nga malipay sa pagtuon sa Pulong sa Diyos, ug iya gayong panalanginan ang inyong paningkamot.​—Salmo 1:1-3.

• Nganong mogahin mig panahon alang sa pamilyahanong pagsimba?

• Unsay himoon sa mga ginikanan aron kini nga okasyon makapalipay sa tanan?

Nganong malipayog dagway kining mga tawhana? Sila nagtambong sa usa sa among mga asembliya. Sama sa karaang mga alagad sa Diyos, nga gisugo sa pagtigom katulo sa usa ka tuig, gikahinaman namo ang pagtambong sa dagkong panagkatigom. (Deuteronomio 16:16) Kada tuig, duna miy tulo ka asembliya: duha ka sirkitong asembliya nga tag-usa ka adlaw ug rehiyonal nga kombensiyon nga tulo ka adlaw. Unsay kaayohan sa among pagtambong niini?

Makapalig-on kini sa among panag-igsoonay. Ingon nga ang mga Israelinhon malipayong nagdayeg kang Jehova diha “sa mga panagkatigom,” kami usab malipayong nagsimba kaniya niining espesyal nga mga okasyon. (Salmo 26:12, footnote; 111:1) Niini nga mga tigom, among mahimamat ug makauban ang mga isigka-Saksi gikan sa ubang kongregasyon o kanasoran. Sa tingpaniudto, mag-uban mig pangaon nga mas makapasuod sa usag usa. (Buhat 2:42) Dinhi among masaksihan ang gugma nga nagbugkos sa “tanang igsoon” sa tibuok kalibotan.​—1 Pedro 2:17.

Makapauswag kini sa among espirituwalidad. Ang mga Israelinhon nakabenepisyo usab “kay nasabtan nila ang mga pulong” sa Kasulatan nga gipatin-aw kanila. (Nehemias 8:8, 12) Sama nila, kami nagpabili sa instruksiyon sa Bibliya nga among madunggan sa mga asembliya. Ang matag programa gibase sa Bibliya. Pinaagi sa makaiikag nga mga pakigpulong, simposyum, ug pasundayag, kami makakat-on sa pagtuman sa kabubut-on sa Diyos. Madasig mi sa dihang makadungog ug mga kasinatian sa mga isigka-Kristohanon nga nakasagubang sa mga pagsulay niining lisod nga panahon. Sa mga rehiyonal nga kombensiyon, may mga costume drama bahin sa mga asoy sa Bibliya nga maghatag kanamog pagtulon-an. Sa matag asembliya, bawtismohan kadtong gustong magpabawtismo ingong simbolo sa ilang pahinungod sa Diyos.

• Nganong makapalipay nga okasyon ang mga asembliya?

• Unsay kaayohan kon motambong kag asembliya?

Una mamatay si Jesus, siya miingon: “Kining maayong balita sa Gingharian isangyaw sa tibuok yuta sa pagpamatuod ngadto sa tanang kanasoran, ug unya moabot ang kataposan.” (Mateo 24:14) Apan sa unsang paagi mapalampos kining tibuok kalibotang pagsangyaw? Pinaagi sa pagsunod sa sumbanan ni Jesus sa dinhi pa siya sa yuta.​—Lucas 8:1.

Sangyawan namo ang mga tawo sa ilang balay. Gibansay ni Jesus ang iyang mga tinun-an sa pagsangyaw sa maayong balita sa balay ug balay. (Mateo 10:11-13; Buhat 5:42; 20:20) Ang mga magsasangyaw sa unang siglo giasaynag teritoryo nga sangyawan. (Mateo 10:5, 6; 2 Corinto 10:13) Karon usab, ang among buluhatong pagsangyaw giorganisar pag-ayo, ug ang matag kongregasyon giasaynag teritoryo. Pinaagi niini, among matuman ang sugo ni Jesus sa “pagwali ngadto sa katawhan ug sa paghatag ug bug-os nga pamatuod.”​—Buhat 10:42.

Mosangyaw mi bisan asa nga may mga tawo. Si Jesus naghatag usab ug sumbanan sa pagsangyaw sa publikong mga dapit, sama sa baybayon o sa may atabay. (Marcos 4:1; Juan 4:5-15) Kami usab makig-estorya bahin sa Bibliya bisan asa​—sa dalan, negosyohanan, parke, o pinaagig telepono. Kon may kahigayonan, mosangyaw pod mi sa among mga silingan, kauban sa trabaho, eskolmet, ug mga paryente. Pinaagi nianang tanan, minilyong tawo sa tibuok yuta ang nakadungog sa ‘maayong balita sa kaluwasan.’​—Salmo 96:2.

Duna ka bay gustong sangyawan sa maayong balita sa Gingharian sa Diyos ug sa mga benepisyo niana kanila sa umaabot? Ayaw kinig ihikaw kanila. Sangyawi dayon sila!

• Unsang “maayong balita” ang kinahanglang isangyaw?

• Giunsa pagsundog sa mga Saksi ni Jehova ang sumbanan ni Jesus sa pagsangyaw?

Ang pulong “payunir” sagad nagtumong niadtong mag-una sa bag-ong teritoryo ug mag-ablig dalan para sa uban. Si Jesus samag payunir kay siya gipadala sa yuta aron tumanon ang usa ka ministeryo nga magbukas sa dalan sa kaluwasan. (Mateo 20:28) Karon, ang iyang mga sumusunod nagsundog kaniya pinaagi sa paggahin ug dakong panahon sa ‘paghimog mga tinun-an.’ (Mateo 28:19, 20) Ang uban misulod sa gitawag namog payunir nga pag-alagad.

Ang payunir maoy bug-os panahong magsasangyaw. Ang tanang Saksi ni Jehova magsasangyaw sa maayong balita. Apan ang uban nag-alagad ingong regular payunir, nga mogugol ug 70 oras kada bulan sa pagsangyaw. Aron mahimo kini, ang daghan nagtrabaho lag partaym. Ang uban gitudlong espesyal payunir sa mga dapit nga mas dakog panginahanglan sa magsasangyaw sa Gingharian, nga mogugol ug 130 oras o kapin pa kada bulan. Ang mga payunir kontento sa simpleng kinabuhi kay masaligon nga si Jehova magtagana sa ilang panginahanglan. (Mateo 6:31-33; 1 Timoteo 6:6-8) Kadtong dili makapayunir nga bug-os panahon makaalagad ingong oksilyare payunir dihang itugot sa ilang kahimtang, nga mogugol ug 30 o 50 oras sa pagsangyaw kada bulan.

Ang payunir nag-alagad tungod sa iyang gugma sa Diyos ug sa mga tawo. Sama ni Jesus, among nakita nga daghan karon ang giuhaw sa espirituwal. (Marcos 6:34) Apan kami dunay kahibalo nga makatabang nila bisan karon, nga maghatag nilag paglaom sa umaabot. Ang paghigugma sa isigkatawo magpalihok sa usa ka payunir nga gamiton ang iyang panahon ug kusog sa pagtabang sa uban nga makakat-on bahin sa Diyos. (Mateo 22:39; 1 Tesalonica 2:8) Busa ang pagtuo sa payunir malig-on, ug siya mas masuod sa Diyos ug magmalipayon.​—Buhat 20:35.

• Unsa ang payunir?

• Nganong ang uban bug-os panahong nagpayunir?

Sukad pa sa una, ang teokratikanhong edukasyon hinungdanon kaayo para sa mga Saksi ni Jehova. Dunay linaing pagbansay para niadtong naggugol ug dakong panahon sa pagsangyaw sa Gingharian aron ilang ‘matuman sa bug-os ang ilang ministeryo.’​—2 Timoteo 4:5.

Pioneer Service School. Dihang ang regular payunir usa na ka tuig sa bug-os panahong pag-alagad, siya makaeskuwela niining unom ka adlaw nga tunghaan diha sa Kingdom Hall. Katuyoan niini nga mas masuod siya kang Jehova, mahimong mas epektibo sa tanang bahin sa ministeryo, ug makapabiling matinumanon sa iyang pag-alagad.

School for Kingdom Evangelizers. Katuyoan niining duha ka bulan nga tunghaan nga bansayon ang eksperyensiyadong mga payunir nga andam moalagad diin sila gikinahanglan. Sama rag miingon sila, “Ania ko! Ipadala ko,” agig pagsundog kang Jesu-Kristo, ang kinalabwang Ebanghelisador sa yuta. (Isaias 6:8; Juan 7:29) Tingali kinahanglan nilang pasimplehon ang ilang kinabuhi dihang mag-alagad sa ubang lugar. Ang kultura, klima, ug pagkaon tingali lahi kaayo sa ilang naandan. Basin kinahanglan silang magtuon ug ubang pinulongan. Kini nga tunghaan makatabang sa mga ulitawo, dalaga, ug magtiayon, nga nag-edad ug 23 hangtod 65 anyos, sa pag-ugmad ug espirituwal nga mga hiyas nga ilang gikinahanglan sa ilang asaynment ug sa pagpauswag sa ilang mga kahanas aron magamit silag maayo ni Jehova ug sa organisasyon.

Watchtower Bible School of Gilead. Sa Hebreohanon, ang “Gilead” nagkahulogang “Gipatongpatong nga mga Bato Ingong Pamatuod.” Sukad sa pagsugod sa Gilead sa 1943, kapin sa 8,000 ka graduwado ang gipadala ingong mga misyonaryo sa pagsangyaw “hangtod sa mga kinatumyan sa yuta,” nga may maayong resulta. (Buhat 13:47) Dihang miabot ang unang mga misyonaryo sa Peru, wala pay kongregasyon didto. Karon duna nay kapin sa 1,000. Pag-abot sa unang mga misyonaryo sa Japan, wala pay 10 ang mga Saksi didto. Karon duna nay kapin sa 200,000. Lakip sa lima ka bulan nga kurso sa Gilead ang detalyadong pagtuon sa Pulong sa Diyos. Ang mga espesyal payunir o misyonaryo, kadtong nag-alagad sa mga sangang buhatan, o mga tigdumala sa sirkito dapiton sa pag-eskuwela sa Gilead sa pagbansay kanila aron suportahan ug mas mouswag ang tibuok kalibotang buluhaton.

• Unsay katuyoan sa Pioneer Service School?

• Kinsay makatungha sa School for Kingdom Evangelizers?