Pinaagi sa imong pagtuon sa Bibliya uban sa mga Saksi ni Jehova, ikaw nahibalo sa kamatuoran. Ang imong nakat-onan seguradong nakatabang nimo nga makabaton ug maayong relasyon sa Diyos ug nakahatag nimog paglaom nga mabuhi sa walay kataposan ug makapahimulos sa mga panalangin sa paraisong yuta ubos sa Gingharian sa Diyos. Ang imong pagtuo sa Pulong sa Diyos napalig-on, ug tungod sa imong pagpakig-uban sa Kristohanong kongregasyon, nakasinati kag daghang panalangin. Imong naapresyar kon sa unsang paagi nakiglabot si Jehova sa iyang katawhan karon.​—Zac. 8:23.

Samtang mangandam ka para sa bawtismo, makatabang nimo ang pagrepaso sa pangunang Kristohanong mga pagtulon-an, nga dumalahon sa mga ansiyano sa kongregasyon. (Heb. 6:1-3) Hinaot padayong panalanginan ni Jehova ang tanan nimong paningkamot nga mailhan siya, ug hinaot ihatag niya kanimo ang gisaad nga ganti.​—Juan 17:3.

1. Nganong gusto nimong magpabawtismo?

2. Kinsa si Jehova?

• “Si Jehova ang matuod nga Diyos sa langit man o sa yuta. Wala nay lain.”​—Deut. 4:39.

• “Ikaw, kansang ngalan maoy Jehova, ikaw lamang ang Labing Hataas ibabaw sa tibuok yuta.”​—Sal. 83:18.

3. Nganong importante para nimo nga gamiton ang personal nga ngalan sa Diyos?

• “Mag-ampo kamo niining paagiha: ‘Amahan namo nga anaa sa mga langit, balaanon unta ang imong ngalan.’”​—Mat. 6:9.

• “Ang matag usa nga motawag sa ngalan ni Jehova maluwas.”​—Roma 10:13.

4. Unsa ang pipila ka termino nga gigamit sa Bibliya sa paghubit kang Jehova?

• “Si Jehova, ang Maglalalang sa tanang butang sa yuta, maoy Diyos hangtod sa hangtod.”​—Isa. 40:28.

• “Amahan namo nga anaa sa mga langit.”​—Mat. 6:9.

• “Ang Diyos gugma.”​—1 Juan 4:8.

5. Unsay imong mahatag kang Jehova nga Diyos?

• “Higugmaa si Jehova nga imong Diyos sa tibuok mong kasingkasing, sa tibuok mong kalag, sa tibuok mong hunahuna, ug sa tibuok mong kusog.”​—Mar. 12:30.

• “Si Jehova nga imong Diyos ang angay nimong simbahon, ug siya lamang ang angay nimong hatagag sagradong pag-alagad.”​—Luc. 4:8.

6. Nganong gusto nimong magmaunongon kang Jehova?

• “Magmaalamon ka, anak ko, ug lipaya ang akong kasingkasing, aron matubag nako siya nga nagatamay kanako.”​—Prov. 27:11.

7. Kang kinsa ka nagaampo ug pinaagi sa ngalan ni kinsa?

• “Sa pagkatinuod sultihan ko [Jesus] kamo, kon mangayo mo sa Amahan ug bisan unsa, kini iyang ihatag kaninyo pinaagi sa akong ngalan.”​—Juan 16:23.

8. Unsa ang pipila ka butang nga puwede nimong iampo?

• “Mag-ampo kamo niining paagiha: ‘Amahan namo nga anaa sa mga langit, balaanon unta ang imong ngalan. Paanhia ang imong Gingharian. Matuman unta ang imong kabubut-on, maingon sa langit, mao man usab sa yuta. Hatagi mig pagkaon alang niining adlawa; ug pasayloa mi sa among mga sala, kay gipasaylo namo ang mga nakasala kanamo. Ug ayawg itugot nga madaog mi sa tentasyon, apan luwasa mi gikan sa usa nga daotan.’”​—Mat. 6:9-13.

• “May pagsalig ta niya nga bisan unsay atong pangayoon uyon sa iyang kabubut-on, maminaw siya nato.”​—1 Juan 5:14.

9. Nganong naay mga pag-ampo nga dili paminawon ni Jehova?

• “Sila magpakitabang kang Jehova, apan siya dili motubag kanila . . . tungod sa ilang daotang binuhatan.”​—Miq. 3:4.

• “Ang mga mata ni Jehova anaa sa mga matarong, ug ang iyang mga dalunggan mamati sa ilang mga hangyo, apan isalikway ni Jehova ang mga nagbuhat ug daotan.”​—1 Ped. 3:12.

10. Kinsa si Jesu-Kristo?

• “Si Simon Pedro mitubag: ‘Ikaw mao ang Kristo, ang Anak sa buhi nga Diyos.’”​—Mat. 16:16.

11. Nganong si Jesus mianhi sa yuta?

• “Siya [Jesus] mianhi, dili aron alagaran, kondili aron sa pag-alagad ug sa paghatag sa iyang kinabuhi ingong lukat baylo sa daghan.”​—Mat. 20:28.

• “Kinahanglan sab nakong [Jesus] isangyaw ang maayong balita sa Gingharian sa Diyos ngadto sa ubang siyudad, kay ako gipadala alang niini.”​—Luc. 4:43.

12. Unsaon nimo pagpakita nga mapasalamaton ka sa halad ni Jesus?

• “Siya namatay alang sa tanan aron kadtong nagkinabuhi dili na magkinabuhi alang sa ilang kaugalingon, kondili alang kaniya nga namatay alang kanila ug gibanhaw.”​—2 Cor. 5:15.

13. Unsang awtoridad ang gihatag kang Jesus?

• “Ang tanang awtoridad sa langit ug sa yuta gihatag na kanako.”​—Mat. 28:18.

• “Gibayaw siya sa Diyos ngadto sa mas taas nga posisyon, ug sa kaayo sa Diyos gihatagan siyag ngalan nga labaw sa tanang ubang ngalan.”​—Filip. 2:9.

14. Nagtuo ba ka nga ang Nagamandong Lawas sa mga Saksi ni Jehova mao ang “matinumanon ug maalamong ulipon” nga gitudlo ni Jesus?

• “Kinsa ba gayod ang matinumanon ug maalamong ulipon nga gitudlo sa iyang agalon ibabaw sa iyang mga sulugoon sa panimalay, sa paghatag kanilag pagkaon sa hustong panahon?”​—Mat. 24:45.

15. Ang balaang espiritu ba usa ka persona?

• “Ang anghel mitubag: ‘Ang balaang espiritu mokunsad kanimo, ug ang gahom sa Labing Hataas molandong kanimo. Busa ang bata nga matawo tawgong balaan, Anak sa Diyos.’”​—Luc. 1:35.

• “Busa kon kamo, bisan tuod daotan, mahibalong mohatag ug maayong mga gasa sa inyong mga anak, labaw na gyod ang inyong Amahan sa langit. Siya mohatag ug balaang espiritu niadtong nagapangayo kaniya!”​—Luc. 11:13.

16. Sa unsang paagi gigamit ni Jehova ang iyang balaang espiritu?

• “Pinaagi sa pulong ni Jehova nabuhat ang kalangitan, ug pinaagi sa espiritu sa iyang baba nabuhat ang tanang butang nga anaa niana.”​—Sal. 33:6.

• “Makadawat mog gahom dihang mokunsad kaninyo ang balaang espiritu, ug kamo mahimong akong mga saksi . . . hangtod sa kinalay-ang bahin sa yuta.”​—Buh. 1:8.

• “Walay tagna sa Balaang Kasulatan nga naggikan sa kaugalingong interpretasyon. Kay walay tagna sukad nga midangat pinaagi sa kabubut-on sa tawo, apan ang mga tawo nagsulti sa mensahe sa Diyos samtang sila gigiyahan sa balaang espiritu.”​—2 Ped. 1:20, 21.

17. Unsa ang Gingharian sa Diyos?

• “Ang Diyos sa langit magtukod ug gingharian nga dili gayod malaglag. Ug kini nga gingharian dili ipasa ngadto sa laing katawhan. Dugmokon ug taposon niini kining tanang gingharian, ug kini ray mobarog hangtod sa hangtod.”​—Dan. 2:44.

18. Unsang benepisyo ang imong mabatonan tungod sa Gingharian sa Diyos?

• “Iyang pahiran ang matag luha sa ilang mga mata, ug ang kamatayon mawala na, ug wala na unyay pagbangotan, pagtiyabaw, ug kasakit. Ang unang mga butang nangagi na.”​—Pin. 21:4.

19. Giunsa nimo pagkahibalo nga ang mga panalangin sa Gingharian hapit na natong matagamtam?

• “Ang mga tinun-an miduol kaniya nga silasila ra ug nangutana: ‘Sultihi kami, kanus-a kini mahitabo, ug unsa man unyay ilhanan sa imong presensiya ug sa hinapos sa sistema sa mga butang?’ Si Jesus mitubag: ‘. . . Ang nasod makiggubat batok sa nasod ug ang gingharian batok sa gingharian, ug duna unyay mga kanihit sa pagkaon ug mga linog sa lainlaing dapit. Ug kining maayong balita sa Gingharian isangyaw sa tibuok yuta sa pagpamatuod ngadto sa tanang kanasoran, ug unya moabot ang kataposan.’”​—Mat. 24:3, 4, 7, 14.

• “Sa kataposang mga adlaw moabot ang kuyaw nga mga panahong lisod sagubangon. Kay ang mga tawo unya mahigugmaon sa kaugalingon, mahigugmaon sa kuwarta, hambogiro, mapahitas-on, magsultig daotan batok sa Diyos ug sa isigkatawo, dili masinugtanon sa ginikanan, dili mapasalamaton, dili maunongon, walay pagmahal sa isigkatawo, dili ikasabot, tigbutangbutang, walay pagpugong sa kaugalingon, bayolente, walay gugma sa pagkamaayo, traydor, gahig ulo, garboso kaayo, mahigugmaon sa kalipayan imbes mahigugmaon sa Diyos, diyosnon tan-awon pero dili diyosnon ug binuhatan.”​—2 Tim. 3:1-5.

20. Unsaon nimo pagpakita nga importante kanimo ang Gingharian?

• “Unaha kanunay ang pagpangita sa Gingharian ug sa pagkamatarong sa Diyos.”​—Mat. 6:33.

• “Giingnan ni Jesus ang iyang mga tinun-an: ‘Kon dunay buot mosunod kanako, angay niyang dumilian ang iyang kaugalingon ug pas-anon ang iyang estaka sa pagsakit ug padayong mosunod kanako.’”​—Mat. 16:24.

21. Kinsa si Satanas ug ang mga demonyo?

• “Kamo gikan sa inyong amahan nga mao ang Yawa . . . Siya mamumuno sukad sa sinugdan.”​—Juan 8:44.

• “Gitambog ang dakong dragon, ang orihinal nga halas, ang gitawag ug Yawa ug Satanas, nga nagpahisalaag sa tibuok gipuy-ang yuta; siya gitambog sa yuta, ug ang iyang mga anghel gitambog uban kaniya.”​—Pin. 12:9.

22. Unsay giakusar ni Satanas kang Jehova ug niadtong nagsimba Kaniya?

• “Ang babaye miingon sa halas: ‘Makakaon mi sa bunga sa mga kahoy sa tanaman. Apan bahin sa kahoy nga naa sa tunga sa tanaman, ang Diyos nag-ingon: “Ayaw gayod ninyog kan-a o hikapa ang bunga niini, kay kon himoon ninyo kini, kamo mamatay.”’ Ang halas miingon sa babaye: ‘Dili tinuod nga mamatay mo. Kay nahibalo ang Diyos nga sa mismong adlaw nga mokaon mo sa bunga niini, ang inyong mga mata mabuka ug maparehas mo sa Diyos, nga mahibalo sa maayo ug daotan.’”​—Gen. 3:2-5.

• “Si Satanas mitubag kang Jehova: ‘Panit alang sa panit. Ang tawo maghatag sa tanan niyang nabatonan alang sa iyang kinabuhi.’”​—Job 2:4.

23. Sa unsang paagi nimo mapamatud-an nga bakak ang mga akusasyon ni Satanas?

• “Alagara [ang Diyos] sa bug-os nga kasingkasing.”​—1 Cron. 28:9.

• “Hangtod nga ako mamatay, dili gyod nako wad-on ang akong integridad!”​—Job 27:5.

24. Nganong ang tawo mamatay?

• “Sama nga ang sala misulod sa kalibotan pinaagi sa usa ka tawo ug ang kamatayon pinaagi sa sala, ang kamatayon mikaylap sa tanang tawo tungod kay silang tanan nakasala man.”​—Roma 5:12.

25. Unsay kahimtang sa mga patay?

• “Ang mga buhi nasayod nga sila mamatay, apan ang mga patay walay nahibaloan nga bisan unsa.”​—Eccl. 9:5.

26. Unsay paglaom sa mga patay?

• “Duna unyay pagkabanhaw sa mga matarong ug sa mga dili matarong.”​—Buh. 24:15.

27. Unsa ka daghang tawo ang moadto sa langit aron magmando uban ni Jesus?

• “Tan-awa! nakita nako ang Kordero nga nagbarog sa Bukid sa Zion, ug uban kaniya ang 144,000 nga nakabaton sa iyang ngalan ug sa ngalan sa iyang Amahan nga nasulat sa ilang agtang.”​—Pin. 14:1.

Sa imong pagtuon sa Bibliya, imong nakat-onan kon unsay gusto ni Jehova nga imong buhaton ug kon unsaon pagsunod ang iyang matarong nga mga sukdanan. Agig pagpadapat sa imong nakat-onan, tingali mihimo na kag daghang kausaban sa imong panggawi ug panglantaw sa kinabuhi. Karon nga nakadesisyon na ka sa pagkinabuhi uyon sa matarong nga mga sukdanan ni Jehova, kuwalipikado na ka sa pag-alagad ingong ministro sa maayong balita.

Ang pagrepaso sa mosunod nga mga pangutana makatabang nimo nga matisok sa imong hunahuna ang matarong nga mga sukdanan ni Jehova ug magpahinumdom nimo sa pipila ka butang nga imong himoon aron mahimong usa sa iyang inuyonan nga mga alagad. Ipasiugda niini nga impormasyon kanimo ang kaimportante sa pagbuhat sa tanang butang uban ang maayong konsensiya ug aron mapasidunggan si Jehova.​—2 Cor. 1:12; 1 Tim. 1:19; 1 Ped. 3:16, 21.

Kay nakaabot na ka ani nga punto sa imong pagtuon, seguradong gusto na nimong magpasakop sa pagmando ni Jehova ug mahimong bahin sa iyang organisasyon. Ang mga pangutana ug mga reperensiya sa Bibliya makatabang nimo sa pagsusi sa imong kaugalingong pagsabot bahin sa pagpasakop sa kahikayan ni Jehova, sa kongregasyon man, sa pamilya, o sa gobyerno niini nga sistema sa mga butang. Seguradong modako ang imong apresasyon sa mga kahikayan ni Jehova sa pag-edukar sa iyang katawhan ug paglig-on sa ilang pagtuo. Apil niini ang mga tigom sa kongregasyon nga, kon itugot sa imong kahimtang, gusto nimong tambongan ug gusto pod kang makigbahin.

Dugang pa, kini nga seksiyon maghisgot sa kaimportante sa regular nga pagpakigbahin sa pagsangyaw sa Gingharian, nga magtabang sa uban nga makaila kang Jehova ug mahibalo sa iyang ginahimo para sa katawhan. (Mat. 24:14; 28:19, 20) Ipakita sab niini kon unsa ka seryoso ang imong dedikasyon kang Jehova nga Diyos ug ang imong bawtismo. Makaseguro ka nga gipabilhan ni Jehova ang imong kinasingkasing nga sanong sa iyang dili hitupngang pagkamaayo nga gipakita kanimo.

1. Unsa ang Kristohanong sukdanan alang sa kaminyoon? Unsa ang bugtong nga Kasulatanhong basehanan sa diborsiyo?

• “Wala ba ninyo mabasa nga siya nga naglalang kanila sukad sa sinugdan nagbuhat kanila nga lalaki ug babaye ug miingon: ‘Tungod niini ang lalaki mobiya sa iyang amahan ug inahan ug moipon sa iyang asawa, ug silang duha mahimong usa ka unod’? Sa ato pa, dili na sila duha, kondili usa ka unod. Busa kon unsay gihiusa sa Diyos dili angayng bulagon sa tawo. . . . Si bisan kinsa nga makigdiborsiyo sa iyang asawa, gawas kon tungod sa seksuwal nga imoralidad, ug magminyog lain nakapanapaw.”​—Mat. 19:4-6, 9.

2. Nganong ang mga nagpuyopuyo ingong bana ug asawa kinahanglang legal nga magpakasal? Kon minyo ka, segurado ba ka nga legal ang inyong kaminyoon ug giila sa gobyerno?

• “Padayon silang pahinumdomi nga magpasakop ug magmasinugtanon sa mga gobyerno ug mga awtoridad.”​—Tito 3:1.

• “Angayng tahoron sa tanan ang kaminyoon, ug dili kini hugawan, kay hukman sa Diyos ang mga naghimog seksuwal nga imoralidad ug ang mga mananapaw.”​—Heb. 13:4.

3. Unsay imong papel diha sa pamilya?

• “Anak ko, paminawa ang disiplina sa imong amahan, ug ayawg isalikway ang gitudlo sa imong inahan.”​—Prov. 1:8.

• “Ang bana maoy ulo sa iyang asawa sama nga ang Kristo maoy ulo sa kongregasyon . . . Mga bana, padayong higugmaa ang inyong mga asawa, sama nga ang Kristo nahigugma sa kongregasyon.”​—Efe. 5:23, 25.

• “Mga amahan, ayaw palagota ang inyong mga anak, kondili padayon silang matutoa pinaagi sa disiplina ug tambag ni Jehova.”​—Efe. 6:4.

• “Kamong mga anak, magmasinugtanon mo sa inyong ginikanan sa tanang butang, kay makapalipay kini sa Ginoo.”​—Col. 3:20.

• “Kamong mga asawa, pasakop mo sa inyong mga bana.”​—1 Ped. 3:1.

4. Nganong angay natong ipakita nga gitahod nato ang kinabuhi?

• “[Ang Diyos] naghatag sa tanang tawo ug kinabuhi ug gininhawa ug tanang butang. . . . Pinaagi kaniya kita dunay kinabuhi ug naglihok ug naglungtad.”​—Buh. 17:25, 28.

5. Nganong dili ta angayng mopatay ug tawo, bisan sa bata nga wala pa ipanganak?

• “Kon may mga tawo nga nag-away ug napasakitan nila ang usa ka mabdos ug . . . kon dunay mamatay, . . . nan siya magbayad ug kinabuhi para sa kinabuhi.”​—Ex. 21:22, 23.

• “Nakita ko nimo bisan niadtong binhi pa ko sa tagoangkan; sa imong basahon nasulat ang tanang bahin niini, mahitungod sa mga adlaw dihang kini giumol, sa wala pa motungha ang bisan usa niini.”​—Sal. 139:16.

• “Gidumtan ni Jehova . . . [ang] mga kamot nga nagaula ug inosenteng dugo.”​—Prov. 6:16, 17.

6. Unsa ang sugo sa Diyos bahin sa dugo?

• “Padayong likayan . . . ang dugo, [ug] ang hayop nga naluok.”​—Buh. 15:29.

7. Nganong angay natong higugmaon ang atong Kristohanong mga igsoon?

• “Hatagan mo nakog bag-ong sugo, nga kamo maghigugmaay; sama sa akong paghigugma kaninyo, kamo usab maghigugmaay. Kon kamo dunay gugma sa usag usa, ang tanan makaila nga kamo akong mga tinun-an.”​—Juan 13:34, 35.

8. Aron malikayan nga makapasag makatakod ug lagmit makamatayng sakit ngadto sa uban: (a) Nganong ang tawong may sakit dili angayng mouna sa pagpahayag ug pagmahal, sama sa paggakos ug paghalok? (b) Nganong dili angay nga negatibo ang iyang reaksiyon kon dili siya imbitahon sa uban sa ilang balay? (c) Nganong ang tawo nga lagmit naladlad sa makatakod nga sakit, tingali tungod sa iyang trabaho, pag-abuso sa droga, o kanhing imoral nga pagkinabuhi, angay nga boluntaryong magpa-blood test sa dili pa mosugod sa pagpakigtrato? (d) Nganong ang tawo nga naay makatakod nga sakit kinahanglang magpahibalo sa koordinetor sa mga ansiyano sa dili pa magpabawtismo?

• “Kinahanglang dili mo utangan ug bisan unsang butang kang bisan kinsa, gawas sa paghigugma sa usag usa. . . . ‘Higugmaa ang imong isigkatawo sama sa imong kaugalingon.’ Ang gugma dili mobuhat ug daotan sa iyang isigkatawo.”​—Roma 13:8-10.

• “Magtan-aw dili lang sa kaugalingong kaayohan, kondili sa kaayohan sab sa uban.”​—Filip. 2:4.

9. Nganong si Jehova nagdahom nga pasayloon nato ang uban?

• “Padayon sa pagpailob sa usag usa ug kinasingkasing nga magpinasayloay kon ang usa dunay reklamo batok sa lain. Sama nga si Jehova kinasingkasing nga nagpasaylo kaninyo, kinahanglang buhaton sab ninyo kana.”​—Col. 3:13.

10. Unsay angay nimong himoon kon tikasan o butangbutangan ka sa usa ka igsoon?

• “Kon ang imong igsoon makasala kanimo, adtoa siya ug isulti kaniya ang iyang sayop nga kamokamo lang. Kon siya mamati, nakabig nimo ang imong igsoon sa hustong dalan. Apan kon dili siya mamati, pagdala ug usa o duha pa, aron nga pinaagi sa duha o tulo ka saksi mapamatud-an ang tanang butang. Kon dili siya mamati kanila, sultihi ang kongregasyon. Kon dili siya mamati bisan sa kongregasyon, isipa siya nga sama sa tawo sa kanasoran ug sama sa maniningil ug buhis.”​—Mat. 18:15-17.

11. Unsay panglantaw ni Jehova sa mosunod nga mga sala?

▪ Seksuwal nga imoralidad

▪ Paggamit ug mga imahen sa pagsimba

▪ Homoseksuwalidad

▪ Pagpangawat

▪ Pagpanugal

▪ Paghuboghubog

• “Ayawg pahisalaag. Kadtong mga nagahimog seksuwal nga imoralidad, tigsimbag idolo, mananapaw, lalaki nga mosugot nga himoag homoseksuwal nga mga buhat, lalaki nga nagahimog homoseksuwalidad, kawatan, hakog, palahubog, tigsultig pasipala, ug mga mangingilkil dili makapanunod sa Gingharian sa Diyos.”​—1 Cor. 6:9, 10.

12. Kon bahin sa seksuwal nga imoralidad, nga naglakip sa paghimog lainlaing seksuwal nga buhat uban sa dili nimo kapikas, unsay determinado nimong buhaton?

• “Kalagiw gikan sa seksuwal nga imoralidad!”​—1 Cor. 6:18.

13. Nganong kinahanglang likayan nato ang paggamit ug makaadik o makadaot sa hunahuna nga mga substansiya sa dili medikal nga katuyoan?

• “Ipresentar ang inyong lawas ingong halad nga buhi, balaan ug dalawaton sa Diyos, usa ka sagradong pag-alagad uban sa inyong gahom sa pagpangatarongan. Ug hunong na sa pagpaimpluwensiya niini nga sistema sa mga butang, kondili pag-usab mo pinaagi sa pagbag-o sa inyong hunahuna, aron mapamatud-an ninyo sa inyong kaugalingon ang maayo ug dalawaton ug hingpit nga kabubut-on sa Diyos.”​—Roma 12:1, 2.

14. Unsa ang pipila ka demonyohanong mga buhat nga gidili sa Diyos?

• “Kinahanglang walay bisan kinsa ninyo nga . . . manag-an, maghimog salamangka, mangitag mga tilimad-on, mamarang, manglamat, mangonsultag espiritista o mananag-an, o magpakisayod sa mga patay.”​—Deut. 18:10, 11.

15. Kon ang usa makahimog seryosong sala ug gusto niyang mabalik ang iyang relasyon kang Jehova, unsay angay dayon niyang buhaton?

• “Gisugid nako kanimo ang akong sala; wala nako taboni ang akong kasaypanan. Miingon ko: ‘Isugid nako kang Jehova ang akong mga kalapasan.’”​—Sal. 32:5.

• “Duna bay masakiton kaninyo? Magtawag siyag mga ansiyano sa kongregasyon, ug mag-ampo sila alang kaniya, nga maghaplas kaniyag lana sa ngalan ni Jehova. Ug ang pag-ampo nga may pagtuo mag-ayo sa usa nga masakiton, ug si Jehova magbangon kaniya. Dugang pa, kon siya nakasala, siya pasayloon.”​—Sant. 5:14, 15.

16. Kon nahibalo ka nga ang usa ka Kristohanong igsoon nakahimog seryosong sala, unsay angay nimong buhaton?

• “Kon ang usa ka tawo nakakita o nahibalo bahin sa usa ka sala, unya dili siya motestigo bisag nakadungog siyag panawagan sa pagtestigo bahin niini, siya makasala. Manubag siya sa iyang sayop.”​—Lev. 5:1.

17. Kon dunay pahibalo nga ang usa dili na Saksi ni Jehova, unsay angay natong pagtratar kaniya?

• “Karon misulat ko kaninyo nga mohunong na sa pagpakig-uban kang bisan kinsa nga gitawag ug igsoon nga nagahimog seksuwal nga imoralidad o tawong hakog o tigsimbag idolo o tigsultig pasipala o palahubog o mangingilkil, ug dili gani mokaon uban sa ingon niana nga tawo.”​—1 Cor. 5:11.

• “Kon dunay moanha ninyo nga wala magdala niini nga pagtulon-an, ayaw siya pasak-a sa inyong balay o komostaha.”​—2 Juan 10.

18. Nganong angay nga ang imong suod nga mga higala mao kadtong nahigugma kang Jehova?

• “Ang naglakaw uban sa mga maalamon mahimong maalamon, apan ang makig-uban sa mga buangbuang masugamak sa kadaot.”​—Prov. 13:20.

• “Ayawg pahisalaag. Ang daotang pakig-uban makadaot sa mapuslanong pamatasan.”​—1 Cor. 15:33.

19. Nganong ang mga Saksi ni Jehova neyutral sa politika?

• “Sila dili bahin sa kalibotan, sama nga ako [Jesus] dili bahin sa kalibotan.”​—Juan 17:16.

20. Nganong angay kang magmasinugtanon sa gobyerno?

• “Ang matag tawo kinahanglang magpasakop sa labaw nga mga awtoridad, kay gikan sa Diyos ang gahom sa tanang awtoridad; gibutang sa Diyos ang naglungtad nga mga awtoridad sa ilang lainlaing posisyon.”​—Roma 13:1.

21. Kon ang balaod sa gobyerno supak sa balaod sa Diyos, unsay imong buhaton?

• “Kinahanglan namong sugton ang Diyos ingong magmamando imbes ang mga tawo.”​—Buh. 5:29.

22. Unsang mga teksto ang makatabang nimo nga magpabiling bulag sa kalibotan dihang mamilig trabaho?

• “Ang nasod dili mobakyaw ug espada batok sa laing nasod, ug sila dili na magkat-on sa pagpakiggubat.”​—Miq. 4:3.

• “Gula mo kaniya [Bantogang Babilonya], akong katawhan, kon dili mo gustong makaambit sa iyang mga sala, ug kon dili mo gustong makaagom sa iyang mga hampak.”​—Pin. 18:4.

23. Unsa nga kalingawan ang imong pilion, ug unsa nga kalingawan ang angay nimong likayan?

• “Ginadumtan niya [Jehova] ang bisan kinsa nga nahigugma sa kapintasan.”​—Sal. 11:5.

• “Dumti pag-ayo ang daotan, ug buhata gyod ang maayo.”​—Roma 12:9.

• “Bisan unsang butang nga tinuod, bisan unsang butang nga importante, bisan unsang butang nga matarong, bisan unsang butang nga putli, bisan unsang butang nga hiligugmaon, bisan unsang butang nga dungganon, bisan unsang butang nga maayo, ug bisan unsang butang nga dalayegon, padayon kining palandonga.”​—Filip. 4:8.

24. Nganong ang mga Saksi ni Jehova dili mosimba kauban ang ubang relihiyon?

• “Dili mo mahimong moambit sa ‘lamesa ni Jehova’ ug sa lamesa sa mga demonyo.”​—1 Cor. 10:21.

• “‘Ilain ang inyong kaugalingon,’ miingon si Jehova, ‘ug hunong na sa paghikap sa hugawng butang’; ‘ug pasudlon mo nako.’”​—2 Cor. 6:17.

25. Unsang mga prinsipyo ang makatabang nimo sa pagdesisyon kon moapil ba ka sa usa ka selebrasyon?

• “Nakig-uban sila sa mga nasod ug gisagop nila ang ilang mga dalan. Padayon silang nag-alagad sa ilang mga idolo, ug kini nahimong lit-ag kanila.”​—Sal. 106:35, 36.

• “Ang mga patay walay nahibaloan nga bisan unsa.”​—Eccl. 9:5.

• “Sila dili bahin sa kalibotan, sama nga ako dili bahin sa kalibotan.”​—Juan 17:16.

• “Igo na tong panahon nga inyong gibuhat ang kabubut-on sa mga nasod dihang nagpadayon mo sa walay kaulaw nga paggawi, sa pagtinguha kon unsay daotan, sa pagpalabig inom, sa banha ug way pugong nga paglipaylipay, sa pagpalabwanayg inom, ug sa dulumtanang mga idolatriya.”​—1 Ped. 4:3.

26. Sa unsang paagi ang mga ehemplo sa Bibliya makatabang nimo sa pagdesisyon kon magsaulog ba ka o moapil sa pagsaulog sa mga adlawng natawhan?

• “Ang ikatulong adlaw maoy adlawng natawhan sa Paraon. Siya nagpakombira para sa tanan niyang alagad ug iyang gipagawas ang iyang pangulong tig-ipis ug ang pangulong panadero atubangan sa iyang mga alagad. Ug iyang gibalik sa katungdanan ang iyang pangulong tig-ipis . . . Apan ang pangulong panadero iyang gipabitay.”​—Gen. 40:20-22.

• “Dihang gisaulog ang adlawng natawhan ni Herodes, ang anak nga babaye ni Herodias misayaw ug si Herodes nalipay pag-ayo mao nga siya nanumpa nga ihatag kaniya ang bisan unsa nga iyang pangayoon. Ug kay gitudloan sa iyang inahan, siya miingon: ‘Ihatag kanako ang ulo ni Juan nga Tigbawtismo diha sa bandihado.’ Busa iyang gipaadtoan si Juan didto sa bilanggoan ug gipapunggotan.”​—Mat. 14:6-8, 10.

27. Nganong gusto nimong sundon ang giya sa mga ansiyano?

• “Magmasinugtanon mo sa mga nanguna kaninyo ug magpasakop kanila, kay sila nagabantay kaninyo sanglit manubag sila sa Diyos, aron himoon nila kini nga malipayon ug dili manghupaw, kay makadaot kini kaninyo.”​—Heb. 13:17.

28. Nganong importante nimo ug sa imong pamilya ang paggahin ug panahon alang sa regular nga pagbasa ug pagtuon sa Bibliya?

• “Ang iyang kalipay anaa sa balaod ni Jehova, ug ginabasa niya ang Iyang balaod sa hinayng tingog adlaw ug gabii. Siya mahisama sa kahoy nga gitanom sa daplin sa kasapaan, usa ka kahoy nga mobunga sa iyang panahon, ang mga dahon niini dili malaya. Ug ang tanan niyang ginahimo magmalamposon.”​—Sal. 1:2, 3.

29. Nganong ganahan kang motambong ug makigbahin sa mga tigom?

• “Ipahayag nako ang imong ngalan ngadto sa akong mga igsoon; dayegon ka nako taliwala sa kongregasyon.”​—Sal. 22:22.

• “Hunahunaon nato ang usag usa aron magdinasigay sa pagpakitag gugma ug sa paghimog maayong mga buhat, nga dili pasagdan ang atong mga panagkatigom, sama sa nabatasan sa uban, apan dasigon ang usag usa, ilabina gyod samtang makita ninyo nga ang adlaw nagkaduol na.”​—Heb. 10:24, 25.

30. Unsa ang pinakaimportanteng buluhaton nga gihatag ni Jesus kanato?

• “Adtoa ninyo ang mga tawo sa tanang kanasoran ug tudloi sila aron mahimong akong mga tinun-an. Bawtismohi sila. . . . Tudloi ninyo sila sa pagtuman sa tanan nakong gisugo kaninyo.”​—Mat. 28:19, 20.

31. Dihang mohatag tag donasyon para sa buluhaton sa Gingharian o sa pagtabang sa atong mga igsoon, unsang tinamdan ang makapalipay kang Jehova?

• “Pasidunggi si Jehova pinaagi sa imong bililhong mga butang.”​—Prov. 3:9.

• “Ipabuhat sa matag usa kon unsay gihukom sa iyang kasingkasing, dili kontragusto o pinugos, kay gihigugma sa Diyos ang nagahatag nga malipayon.”​—2 Cor. 9:7.

32. Unsang mga kalisdanan ang madahom sa mga Kristohanon nga ilang masinatian?

• “Malipayon kadtong gilutos tungod sa pagkamatarong, kay ila ang Gingharian sa langit. Malipayon mo dihang kamo pakaulawan, lutoson, ug butangbutangan sa tanang matang sa buhat nga daotan tungod kanako. Pagsadya ug lukso sa kalipay kay dako ang inyong ganti sa langit, kay gilutos usab nianang paagiha ang mga propeta kaniadto.”​—Mat. 5:10-12.

33. Nganong espesyal nga pribilehiyo nga mabawtismohan ingong Saksi ni Jehova?

• “Ang imong pulong nahimong kasadya ug kalipay sa akong kasingkasing, kay gitawag ko sa imong ngalan, Oh Jehova nga Diyos.”​—Jer. 15:16.

Ang mga bawtismo kasagarang himoon panahon sa mga asembliya ug kombensiyon sa mga Saksi ni Jehova. Sa konklusyon sa pakigpulong sa bawtismo, hangyoon sa mamumulong ang mga kandidato sa bawtismo sa pagtindog ug pagtubag niining duha ka pangutana sa kusog nga tingog:

1. Naghinulsol ka na ba sa imong mga sala, gipahinungod ang imong kinabuhi kang Jehova, ug gidawat ang iyang paagi sa pagluwas pinaagi ni Jesu-Kristo?

2. Imo bang nasabtan nga ang imong bawtismo magpaila kanimo nga ikaw usa na ka Saksi ni Jehova ug bahin na ka sa organisasyon ni Jehova?

Ang positibong tubag sa mga kandidato sa bawtismo niini nga mga pangutana maoy “pagpahayag sa pagtuo ngadto sa uban” nga sila nagtuo sa lukat ug bug-os nang nagdedikar, o nagpahinungod, sa ilang kaugalingon kang Jehova. (Roma 10:9, 10) Ang mga kandidato sa bawtismo mag-ampo ug mamalandong daan niining mga pangutanaha aron sila makahatag ug tubag nga uyon sa ilang personal nga pagtuo.

Imo na bang gidedikar ang imong kaugalingon kang Jehova pinaagi sa pag-ampo, nga nagsaad nga siya lang ang imong simbahon ug himoon nimong pinakaimportante sa imong kinabuhi ang pagbuhat sa iyang kabubut-on?

Ikaw ba bug-os nang kombinsido nga magpabawtismo sa labing madaling panahon?

Unsay angayng isul-ob panahon sa bawtismo? (1 Tim. 2:9, 10; Juan 15:19; Filip. 1:10)

Angayng makita diha sa atong sininaan nga kita dunay “pagtahod sa kaugalingon ug sa uban ug maayong panghunahuna” aron madayag ang atong “debosyon sa Diyos.” Busa kadtong bawtismohan dili magsul-ob ug seksi kaayong sinina nga pangkaligo nga makita ang pribadong parte sa lawas. Dili sab angayng magsul-ob ug sinina nga naay hulagway, panultihon, o slogan. Ang ilang sininaan angayng hapsay, hinlo, may dignidad, ug haom sa okasyon.

Unsay angayng panggawi sa usa dihang magpabawtismo? (Luc. 3:21, 22)

Ang bawtismo ni Jesus mao ang panig-ingnan sa Kristohanong bawtismo karon. Iyang nasabtan nga ang bawtismo maoy seryosong lakang, ug makita kini diha sa iyang tinamdan ug binuhatan. Busa sa lugar diin himoon ang bawtismo, dili angay nga ang usa magpasiaw, magduladula, maglangoylangoy, o mobuhat ug bisan unsa nga makadaot sa kaseryoso sa okasyon. Ang bag-ong nabawtismohan dili pod angayng mogawi nga daw nakaangkon ug kadaogan. Bisan tuod ang bawtismo usa ka malipayong okasyon, ang maong kalipay angayng ipahayag sa paagi nga may dignidad.

Sa unsang paagi ang regular nga pagtambong sa mga tigom ug pagpakig-uban sa kongregasyon makatabang nimo sa pagtuman sa imong dedikasyon kang Jehova?

Human sa imong bawtismo, nganong importante nga ipadayon nimo ang imong maayong eskedyul sa personal nga pagtuon ug regular nga pagpakigbahin sa ministeryo?