FEATURE
Mga Diyos sa Kanasoran
ANG balaod ni Jehova nga iyang gihatag sa Israel nagdili sa paghimog mga larawan alang sa pagsimba. Ang matuod nga Diyos maoy Espiritu, ug ang paghimo ug bisan unsang larawan aron sa paghawas Kaniya dili gayod angay. Sa kasukwahi, daghang larawan sa mga diyos sa ubang karaang kanasoran ang nakubkoban. Kini mao lamay “binuhat sa kamot sa tawo, sa kahoy ug bato.” (Deu 4:28) Kini “walay-bili nga mga diyos,” ingon sa gipahayag sa Bibliya, nga walay mga mata nga makakita ni mga igdulungog nga makadungog niadtong nagasimba niini. (1Cr 16:26; Sal 115:4-8) Karong adlawa kini maoy mga relikyas na lamang diha sa mga museyo. Bisan pa niana, kini nagpadayag ug dako maylabot sa mga sinugdanan sa relihiyosong mga tinuohan nga kaylap karong adlawa.
Ang mga triad (tinagutlong mga diyos) sa mga relihiyon nagsugod sa Babilonya. Kining papan nga bato nagpakita sa usa ka ampoanan sa Babilonyanhong diyos-adlaw nga si Shamash, uban sa mga simbolo sa usa sa maong triad: ang bulan (alang sa diyos nga si Sin), ang adlaw (alang kang Shamash), ug usa ka bituon (alang kang Ishtar)
Si Asur nga pangunang diyos sa mga Asiryanhon gipakita niining karaang timbre nga siya may tulo ka ulo (ibabaw sa mga pako)
Ang mga Ehiptohanon nagsimbag mga triad sama niini. Ibabaw: Si Horus, Osiris, ug Isis. Sa tuo: Si Isis, Horus, Nephthys
Sama gayod sa Madonna ug bata sa Kakristiyanohan, ang inahan-anak nga larawan sa Ehipto (si Isis ug ang masuso nga si Horus) gisimba
Dugay na kanhi sa wala pa ang Kristiyanidad, ang crux ansata, ang Ehiptohanong krus, giisip ingong sagrado
Ang halas gigamit sa pagsimba. Ang usa ka obra sa Ehipto (tumoy sa wala) naghulagway sa duha ka nag-ikis nga bitin nga gikuptan sa diyos nga anaa sa wala, sa usa ka dakong bitin diha sa dakong bahin sa hulagway, ug sa usa ka diyosa nga may ulo nga bitin diha sa tuo.
Ang Gregong estatwa ni Asclepius (wala) adunay halas usab. Makaiikag, ang Bibliya naghisgot nga si Satanas migamit ug halas ingong iyang tigpamaba (Gen 3:1-15; Pin 12:9)
Ang napulo ka hampak sa Ehipto nagyagyag sa pagkawalay mahimo sa idolong mga diyos niini. Ang unang hampak—paghimo sa Nilo nga dugo—nagpakaulaw kang Hapi (ibabaw sa wala, ang diyos sa Nilo). Ang diyosa nga si Heqt, nga kaniya ang baki maoy sagrado (ibabaw sa tunga), wala makatabang sa mga Ehiptohanon sa dihang ang ikaduhang hampak nagpuno sa maong yuta sa mga baki. Ang kamatayon sa panganay panahon sa ikanapulong hampak mao ang labing malaglagon sa tanan, sanglit ang anak nga lalaki ni Paraon giisip nga anak ni Amon-Ra, nga gihawasan sa usa ka laking karnero (ibabaw sa tuo)