JANES

Usa sa mga misukol o misupak ni Moises nga gitandi ni Pablo sa mga apostata nga misukol sa kamatuoran. (2Ti 3:​8, 9) Si Janes ug Jambres, kansang ‘binuang nadayag sa tanan,’ wala ipaila sa Hebreohanong Kasulatan, apan giuyonan sa kadaghanan nga sila maoy duha sa pangunang mga tawo sa palasyo ni Paraon, tingali ang salamangkerong mga saserdote nga misupak kang Moises ug Aaron sa ilang kanunayng pag-adto didto. (Ex 7:​11, 12, 22; 8:17-19; 9:11) Mas daghan ang miuyon niini nga panglantaw ug diyutay ra kaayo ang wala mouyon niini. Ang dili-Kristohanong mga tinubdan, sama kang Numenius, Pliny nga Magulang, Lucius Apuleius, sa usa ka sinulat sa Qumran, sa Targum ni Jonathan, ug sa pipila ka apokripal nga mga sinulat, tanan naghisgot sa usa o duha niining mga tawhana.