KISLEV

Ang ngalan sa ikasiyam nga lunar nga bulan sa mga Hudiyo human sa pagkadestiyero, nga natunong sa Nobyembre ug Disyembre. (Neh 1:1; Jer 36:9; Zac 7:1) Kini katumbas sa ikatulong bulan sa sekular nga kalendaryo.

Kini maoy usa ka bulan sa tingtugnaw ug ting-ulan. Busa atong mabasa nga si Haring Jehoiakim “naglingkod didto sa balay nga alang sa tingtugnaw, sa ikasiyam ka bulan, nga may bagahan nga nagdilaab sa atubangan niya.” (Jer 36:22) Didto sa Jerusalem human sa pagkadestiyero, ang katawhan nga nagtigom alang sa panagkatigom nga gisugo sa saserdoteng si Esdras sugod sa ika-20 nga adlaw niini nga bulan “nagpadayon paglingkod didto sa hawan nga dapit sa balay sa matuod nga Diyos, nga nagkurog tungod sa maong butang ug tungod sa ulan.”​—Esd 10:​9, 13.

Ang Pista sa Pagpahinungod, nga gihimo sa tingtugnaw didto sa Jerusalem, gihisgotan sa Juan 10:22. Ingon sa gipakita sa Apokripal nga basahon sa 1 Macabeo (4:52-59), kining walo-ka-adlaw nga pista gisugdan ni Judas Macabeo sa ika-25 nga adlaw sa Kislev sa tuig 165 W.K.P. agig paghandom sa pagpahinungod pag-usab sa templo sa Jerusalem. Karong adlawa kini nga pista nailhan nga Hanukkah.​—Tan-awa ang PISTA SA PAGPAHINUNGOD.