TORIL

Usa ka alad sa mga hayop. (Sof 2:6) Sa tagna ni Miqueas, ang natigom pag-usab ug nahiusa nga Israel gipakasama sa “usa ka panon sa mga karnero diha sa toril.” (Miq 2:​12, NW; Le) Ang Masoretikong teksto dinhi naggamit sa Hebreohanong pulong nga bots·rahʹ, nga sa ubang mga teksto gihubad nga “Bozra,” ang ngalan sa usa ka siyudad sa Edom ug sa usa ka siyudad sa Moab. Apan, tungod sa mga ekspresyon nga gigamit diha sa Miqueas 2:​12, gibati sa pipila ka eskolar nga ang bots·rahʹ nagkahulogan usab nga usa ka “toril.” (JP, Mo) Kon ang pulong butangan ug diyutayng kalainan sa marka para sa bokales, halos sama gayod kini sa Arabikong pulong nga sirat (toril).

Usahay, ang Bibliya naggamit niini nga termino sa pagtumong nga espesipiko sa kinoral nga dapit diin ang mga karnero kasagarang dad-on panahon sa kagabhion aron mapanalipdan gikan sa mga kawatan ug sa manunukob nga mga hayop. Bisan tuod ang mga langob ug ang ubang kinaiyanhon nga mga silonganan gigamit usab, sagad ang mga toril maoy permanenteng mga alad nga adunay mga paril nga bato (Num 32:16; 1Sa 24:3; Sof 2:6) ug usa ka ganghaan. (Ju 10:1) Sama sa dili pa kaayo dugayng kapanahonan, ang mga sanga sa tunokong mga tanom lagmit nagtabon sa ibabawng bahin sa mga paril nga bato. Lagmit usab nga dihay mugbo, lagpad nga mga estruktura sulod sa protektadong bahin sa toril, diin ang mga karnero mapanalipdan gikan sa dili-maayong panahon. Bisan tuod tiponon sa samang toril ang mga panon sa kahayopan sa lainlaing magbalantay, walay angayng kalibogan. Ang mga karnero mopatalinghog lamang sa tingog sa ilang magbalantay. Ang usa ka magbalantay sa pultahan magbantay diha sa ganghaan sa toril ug buksan niya kini alang sa mga magbalantay sa karnero sa pagkabuntag.​—Ju 10:2-4.