Among mga Magbabasa Nangutana . . .
Nganong ang Diyos Nagtanyag sa mga Tawo ug Gasa nga Kinabuhing Walay Kataposan?
▪ Ang Bibliya nag-ingon nga ang Diyos naghatag kanatog kahigayonan nga makabaton ug “kinabuhing walay kataposan.” (Juan 6:40) Apan unsay nagpalihok sa Diyos sa pagtanyag niini nga paglaom? Tungod ba sa hustisya?
Ang hustisya mao ang pagtratar sa mga tawo sumala sa kon unsay nahiangay ug matarong. Takos ba gayod kitang mabuhi? Dili. Ang Bibliya nag-ingon: “Walay tawong matarong sa yuta nga nagpadayon sa pagbuhat sa maayo ug dili makasala.” (Ecclesiastes 7:20) Adunay silot ang sala. Ang Diyos nagpasidaan sa unang tawo nga si Adan nga sa adlaw nga siya makasala siya mamatay gayod. (Genesis 2:17) Sa ulahi, si apostol Pablo giinspirar sa pagsulat: “Ang suhol nga ginabayad sa sala mao ang kamatayon.” (Roma 6:23) Nan, kon ang tanang kaliwat ni Adan takos sa kamatayon, nganong ang Diyos nagtanyag man sa kahigayonan nga mabuhing walay kataposan?
Ang tanyag nga kinabuhing walay kataposan maoy “walay bayad nga gasa.” Kini maoy kapahayagan sa dakong gugma sa Diyos ug sa iyang dili-takos nga kalulot. Ang Bibliya nag-ingon: “Ang tanan nakasala ug wala makaabot sa himaya sa Diyos, ug ingong walay bayad nga gasa nga sila gipahayag nga matarong pinaagi sa iyang dili-takos nga kalulot tungod sa pagpagawas pinaagi sa lukat nga gibayad ni Kristo Jesus.”—Roma 3:23, 24.
Bisan tuod takos kitang mamatay, gihukom sa Diyos nga hatagan ug kinabuhing walay kataposan kadtong nahigugma kaniya. Makataronganon ba kana? Ang Bibliya nag-ingon: “Nan, unsay atong ikaingon? Aduna bay inhustisya sa Diyos? Dili gayod unta kana mahitabo! Kay siya nag-ingon kang Moises: ‘Kaluy-an ko si bisan kinsa nga ako may kaluoy, ug ako magpakitag pagkamabination kang bisan kinsa nga akong pakitaag pagkamabination.’ . . . Nan, kinsa ka gayod Oh tawo, nga magtubagtubag sa Diyos?”—Roma 9:14-20.
Sa ubang bahin sa kalibotan, ang usa ka taas nga opisyal sa gobyerno o maghuhukom makahimo sa pagpasaylo sa usa ka kriminal nga bug-at ug sentensiya. Kon ang kriminal mosunod sa isugo sa maghuhukom ug mag-usab sa iyang kinaiya, ang usa ka maghuhukom o ang presidente mahimong mopasaylo kaniya pinaagig pagpaubos o bug-os nga pagwagtang sa iyang sentensiya. Kini maoy kapahayagan sa dili-takos nga kalulot.
Sa samang paagi, si Jehova mahimong mohukom nga dili silotan ang mga makasasala. Hinunoa, tungod sa gugma, siya mahimong mohatag ug kinabuhing walay kataposan niadtong nahigugma kaniya ug nagsunod sa iyang mga sukdanan. Ang Bibliya nag-ingon: “Ang Diyos dili mapihigon, apan sa matag nasod ang tawo nga mahadlok kaniya ug magabuhat sa pagkamatarong dalawaton kaniya.”—Buhat 10:34, 35.
Ang kinadak-ang pagpasundayag sa gugma ni Jehova alang kanato mao ang pagpadala sa iyang Anak aron mag-antos ug mamatay alang kanato. Si Jesus miingon labot sa iyang Amahan: “Gihigugma pag-ayo sa Diyos ang kalibotan nga gihatag niya ang iyang bugtong nga Anak, aron nga ang tanan nga magpasundayag ug pagtuo kaniya dili malaglag kondili makabaton ug kinabuhing walay kataposan.”—Juan 3:16.
Dawaton ni Jehova ang tanang mahigugma kaniya ug mobuhat sa iyang kabubut-on bisan unsa pay ilang kaagi. Busa, ang paglaom nga kinabuhing walay kataposan sa panguna maoy kapahayagan sa dili-takos nga kalulot, usa ka pagpasundayag sa dakong gugma sa Diyos.
[Blurb sa panid 29]
Kini sa panguna maoy kapahayagan sa dili-takos nga kalulot, usa ka pagpasundayag sa dakong gugma