Eksperyensiya

Pagpakitag Kaluoy sa Tanan

Usa ka adlaw, dihay sister sa New Zealand nga mitan-aw ug video sa jw.org nga naghisgot nga si Jehova dili lang basta mobatig kaluoy kondili iya gyod ning ipakita. (Isa. 63:​7-9) Nakahunahuna siya nga ipadapat ang iyang nakat-onan ug mangitag kahigayonan nga motabang sa uban. Samtang nag-grocery siya nianang adlawa, nakahibalag siyag babaye nga way puy-anan. Iyang giingnan ang babaye nga iya siyang palitan ug pagkaon, ug misugot ang babaye. Pagbalik sa sister dala ang pagkaon, iyang gisangyawan ang babaye gamit ang tract nga Matapos pa Kaha ang Pag-antos?

Ang babaye mihilak. Miingon siya nga Saksi ang iyang ginikanan pero wala gyod siya ma-Saksi. Unya di pa dugay, nag-ampo siya kang Jehova nga tabangan siya kay gusto na niyang moalagad. Gihatagan siya sa sister ug Bibliya ug nagsabot sila nga mag-study.a

Atong masundog ang pagpakitag kaluoy ni Jehova sa mga tawo, apil na sa atong mga paryente ug mga igsoon sa kongregasyon. Ug makapakita tag kaluoy kon mangita tag kahigayonan nga sangyawan ang uban.