Kon Unsaon Pagplano ug Kasal nga Magpasidungog Kang Jehova

1-2. Unsay pagbati ni Jehova sa mga kasal?

KASLONON ba ka? Kon mao, nalipay mi para nimo! Tingali busy na kaayo ka karon sa pagplano sa inyong kasal. Importante para kang Jehova ang inyong kaminyoon. Gusto niya nga mag-enjoy mo sa adlaw sa inyong kasala ug magmalipayon sa inyong kinabuhi ingong magtiayon.—Prov. 5:18; Awit 3:11.

² Si Jehova angay gyong mapasidunggan sa adlaw sa inyong kasal. Ngano? Ug unsaon na ninyo paghimo? Kining artikuloha gisulat para niadtong mga nagplano nang magminyo, pero ang mga prinsipyo nga gihisgotan dinhi makatabang natong tanan nga mapasidunggan si Jehova kon motambong tag kasal o kon ang kaslonon mangayo natog opinyon bahin sa ilang mga plano.

NGANONG ANGAYNG PASIDUNGGAN SI JEHOVA?

3. Dihang magplanog kasal, unsay angayng konsiderahon sa kaslonon, ug ngano?

³ Angayng hinumdoman sa mga Kristohanon nga nagplanong magminyo ang mga prinsipyo nga gihatag ni Jehova diha sa Bibliya. Ngano? Kay ang kaminyoon kahikayan ni Jehova. Siya ang nagkasal sa pinakaunang magtiayon, si Adan ug Eva. (Gen. 1:28; 2:24) Maong angay gyong konsiderahon sa mga kaslonon kon unsay panghunahuna ni Jehova.

4. Nganong angayng pasidunggan sa mga kaslonon si Jehova sa adlaw sa ilang kasal?

⁴ Importante gyod nga konsiderahon ninyo kon unsay panghunahuna ni Jehova dihang mangandam sa inyong kasal. Ngano? Kay siya ang inyong langitnong Amahan ug ang inyong kinasuorang Higala. (Heb. 12:9) Siyempre, paneguroon ninyo nga magpabilin mong suod kang Jehova. Dili ninyo gusto nga naay mahitabo sa adlaw sa inyong kasal nga makapaguol niya. (Sal. 25:14) Dihang pamalandongon ninyo ang tanang gihimo ug pagahimoon pa ni Jehova para ninyo, di ba makaingon mo nga angay lang gyod siyang pasidunggan sa adlaw sa inyong kasal?—Sal. 116:12.

UNSAON NINYO PAGPASIDUNGOG SI JEHOVA?

5. Sa unsang paagi ang Bibliya makatabang niadtong mga nagplanog kasal?

⁵ Ang Bibliya walay gihatag nga mga balaod kon unsay angay ug di angayng himoon panahon sa kasal o sa reception, kon naa. Ang mga kaslonon makadesisyon base sa ilang gusto, kahimtang, ug kostumbre. Ila pong sundon ang mga balaod sa gobyerno bahin sa kasal. (Mat. 22:21) Pero angay nilang hinumdoman nga ang kasal nga nahiuyon sa mga prinsipyo sa Bibliya makapasidungog ug makapalipay kang Jehova. Busa unsang mga prinsipyo ang angay ninyong hinumdoman?

6. Nganong importante nga sundon sa mga kaslonon ang mga balaod ug kinahanglanon sa gobyerno bahin sa kasal?

⁶ Sunda ang mga gipangayo sa gobyerno. (Roma 13:​1, 2) Sa kadaghanang nasod, naay mga balaod ug kinahanglanon ang gobyerno nga angayng sundon sa mga kaslonon aron makasal sila. Maong angay ninyong mahibaloan kon unsay mga kinahanglanon sa inyong lugar. Kon dili mo pamilyar kon asa makakuhag impormasyon bahin niini, puwede mong mangayog tabang sa mga ansiyano.b

7. Unsay angayng seguroon sa adlaw sa kasal?

⁷ Seguroa nga ang tibuok okasyon hapsay ug makadayeg kang Jehova. (1 Cor. 10:​31, 32) Paningkamoti nga mapakita panahon sa inyong kasal ang bunga sa balaang espiritu sa Diyos imbes ang espiritu sa kalibotan. (Gal. 5:​19-26) Base sa prinsipyo sa Bibliya bahin sa pagkaulo, responsibilidad sa lalaki nga seguroon nga ang ilang kasal makapalipay ug hapsay. Unsay makatabang aron mahimo ni? Dakog tabang ang pakigpulong nga binase sa Bibliya. Kon ihatag ni sa mahigugmaon ug makapadasig nga paagi, mas makita sa mga nanambong nga ang kaminyoon regalo gyod gikan sa Diyos. Ang tanan makabenepisyo kay ilang masabtan kon unsa ka importante ang maong okasyon. Tungod ana, daghang Kristohanon ang nakadesisyon nga sa Kingdom Hall magpakasal, kon posible. Kon gusto ninyo nga mogamit ug Kingdom Hall, angay mong magpadala daan ug sulat sa mga ansiyano samtang layo pa ang petsa sa inyong kasal.

8. Unsay makatabang aron mahimong hapsay ang reception? (Roma 13:13)

⁸ Basaha ang Roma 13:13. Kon nagplano mo nga naay reception ang inyong kasal, unsay inyong mahimo aron malikayan ang espiritu sa kalibotan? Ang Gregong pulong nga gihubad ug “banha ug way pugong nga paglipaylipay” nagtumong sa mga tapoktapok nga naay grabeng pag-inom-inom ug banha kaayong musika bisag gabii nang dako. (Tan-awa ang study note nga “wild parties” sa Roma 13:13.) Kon magdalit mog makahubog nga ilimnon, paneguroa nga walay magpalabig inom.c Ug kon magpatokar mog musika, ayaw kaayo ni pakusgi nga dili na hinuon magdungog ang inyong mga bisita. Seguroa pod nga ang klase sa kanta ug ang lyrics ani dili makapandol sa mga nanambong.

9. Unsay angayng hinumdoman sa kaslonon kon naa silay program o naa silay pasultihon sa reception?

⁹ Sa inyong reception, naa ba moy pasultihon nga membro sa pamilya o mga bisita? O naa ba moy giandam nga program o ipasalida nga slideshow ug video? Nindot pod baya na, kay makadugang na sa kaespesyal sa okasyon. Pero kinahanglan ninyong seguroon nga dili ni makapandol sa uban. (Filip. 4:8) Pangutan-a ang kaugalingon: ‘Magpakita ba nig pagtahod sa uban ug sa kahikayan sa kaminyoon?’ Ug labaw sa tanan, ‘Makapasidungog ba ni kang Jehova?’ Siyempre gusto ninyo nga malingaw, maong okey pod nga naay komedya gamay. Pero pag-amping nga walay makalusot nga binastos. (Efe. 5:3) Busa kon naa moy pasultihon sa reception, pahinumdomi sila bahin ani.

10. Nganong dili angayng magpalabi ang kaslonon sa ilang mga plano sa kasal? (1 Juan 2:​15-17)

¹⁰ Ayaw pagpalabi. (Basaha ang 1 Juan 2:​15-17.) Malipay si Jehova kon ang iyang mga alagad maningkamot nga pasidunggan siya imbes nga maningkamot nga maadto nila ang tanang atensiyon. Maong likayan sa mapainubsanong mga Kristohanon ang pagpalabig gasto ug ang “mapasigarbohong pagpakita” sa ilang nabatonan. Unsay kaayohan kon simple lang ang inyong kasal? Si Mike, brader nga taga-Norway, miingon: “Wala mi nakautang, ug nakapadayon mi sa pagpayunir. Simple lang tuod ang among kasal, pero nindot kaayo.” Si Tabitha, sister nga taga-India, miingon: “Wala ra kaayo mi ma-stress. Kay simple ra man ang among kasal, gamay ra mig kinahanglang sabotan, maong wala kaayo mi lalis.”

11. Unsay angayng hinumdoman sa kaslonon bahin sa ilang sinina ug hitsura panahon sa kasal? (Tan-awa sab ang mga hulagway.)

¹¹ Nakapili na ba mo kon unsay inyong isul-ob sa inyong kasal? Seguradong gusto ninyo nga guwapo ug guwapa mo tan-awon. Normal lang na, kay bisan gani sa karaang panahon, importante sa mga kaslonon ang ilang hitsura anang adlawa. (Isa. 61:10) Siyempre, ang inyong isul-ob sa kasal lahi sa inyong kasagarang ginasul-ob. Pero kinahanglang makasaranganon gihapon ni ug dili makapandol sa uban. (1 Tim. 2:9) Bisag importante kon unsay inyong isul-ob o hitsura anang adlawa, ayaw kaayo pagpokus ani, nga mao na lang hinuon ni ang mahinumdoman sa mga tawo sa inyong kasal.—1 Ped. 3:​3, 4.

12. Nganong angayng seguroon sa kaslonon nga ang ilang kasal dili masagolan ug mga kostumbre nga wala mahiuyon sa Bibliya?

¹² Isalikway ang mga kostumbre nga dili binase sa Bibliya. (Pin. 18:4) Kasagaran sa kalibotanong mga kasal naay mga tradisyon nga konektado sa bakak nga relihiyon, espiritismo, ug mga patuotuo. Klaro tang gipasidan-an ni Jehova nga angay natong likayan kining hugaw nga mga butang. (2 Cor. 6:​14-17) Maong kon naay mga kostumbre o tradisyon sa inyong lugar nga dili mo segurado, sayra kon asa ni gikan ug kon unsang mga prinsipyo sa Bibliya ang mapadapat aron makadesisyon mo kon iapil ba ni ninyo sa inyong kasal.

13. Unsaon pagsundog sa kaslonon ang panglantaw ni Jehova bahin sa pagdawat ug mga regalo?

¹³ Naandan ba diha sa inyong lugar nga ang mga bisita mohatag ug regalo sa bag-ong gikasal? Ang mga bisita lainlain ug kahimtang sa pinansiyal, maong ang ilang regalo magdepende tingali sa kon unsay kaya sa ilang budget. Siyempre, ang tanang Kristohanon gidasig nga magmahinatagon, ug malipay gyod ta sa paghimo ana. (Prov. 11:25; Buh. 20:35) Pero dili nato gusto nga mobati ang mga bisita nga obligado silang mohatag, o nga dili ta malipay kon simple ra ang ilang regalo. Hinuon, sundogon nato si Jehova pinaagi sa pag-apresyar sa bisan unsang regalo nga gihatag sa uban nga kinasingkasing ug base sa ilang makaya.—2 Cor. 9:7.

KON UNSAON PAG-ATUBANG ANG POSIBLENG MGA PROBLEMA

14. Unsay kasagarang mga problema sa mga kaslonon?

¹⁴ Gusto ninyo nga ang inyong kasal makapasidungog kang Jehova, pero dili kanunayng sayon ang pagplano para ani. Pananglitan, malisdan tingali mo nga himoong simple ang inyong kasal. Si Charlie, nga taga-Solomon Islands, miingon: “Nalisdan gyod mig pili kon kinsay imbitahon sa reception. Daghan man god kaayo mig higala, ug sa among kultura magdahom gyod ang mga tawo nga imbitahon sila.” Si Tabitha, nga gihisgotan ganina, miingon: “Sa among lugar, ang mga tawo naanad ug dako nga reception. Maong taudtaod pod una nadawat sa among mga ginikanan nga 100 ra ang among imbitahon.” Si Sarah, nga taga-India, miingon: “Importante sa uban kon unsay tan-aw sa mga tawo kanila. Ang akong mga ig-agaw bongga kaayog kasal, maong napresyur ko nga labwan pa gyod sila.” Unsay makatabang ninyo nga maatubang ang posibleng mga problema sa pagplanog kasal?

15. Nganong importante ang pag-ampo dihang magplanog kasal?

¹⁵ Iampo pirme ang inyong mga plano. Isulti kang Jehova bisag unsay inyong gibati o giatubang. (Filip. 4:​6, 7 ug study note nga “in everything”) Hangyoa siya nga tabangan mong makahimog maayong mga desisyon, magpabiling kalmado, ug magpakitag kaisog kon gikinahanglan. (1 Ped. 5:7) Dihang makita ninyo ang tabang ni Jehova, mas modako ang inyong pagsalig kaniya. Si Tabitha, nga gihisgotan ganina, miingon: “Dihang nagplano mi sa among kasal, nabalaka kaayo mi nga basig dili mi magkasinabot sa among mga plano o dili mouyon ang among mga pamilya. Maong sa dili pa namo estoryahan ang among mga plano, mag-ampo una mi. Gibati gyod namo ang tabang ni Jehova, ug nalipay mi kay wala ra kaayoy daghang labad.”

16-17. Nganong importante ang maayong komunikasyon dihang magplanog kasal?

¹⁶ Sulti sa klaro ug matinahorong paagi. (Prov. 15:22) Daghan gyod mog kinahanglang desisyonan para sa inyong kasal. Apil ani kon kanus-a ang kasal, pilay budget, kinsay imbitahon, ug uban pa. Sa dili pa mo modesisyon, hunahunaa pag-ayo ang inyong mga kapilian ug hisgoti ang mga prinsipyo sa Bibliya nga puwedeng mapadapat, apil na ang mga tambag gikan sa hamtong nga mga igsoon. Dihang mosulti bahin sa inyong mga gusto, kinahanglan nga buotan mo, andam maminaw, ug andam mo-adjust. Kon naay hangyo ang inyong pamilya—ilabina ang inyong mga ginikanan—nga okey ra pod ninyo, puwede ninyo ning iapil kay nagpakita ni nga inyo silang gitahod. Hinumdomi nga espesyal nga okasyon pod ni para nila. Pero kon dili ninyo kayang himoon ang ilang gihangyo, matinahorong isulti kanila kon ngano. (Col. 4:6) Iklaro sa inyong pamilya nga gusto ninyo nga ang inyong kasal makapalipay ug makapasidungog kang Jehova.

¹⁷ Dili tingali sayon nga ipasabot sa inyong mga ginikanan kon unsay inyong gusto ilabina kon dili sila Saksi, pero kaya na ninyo. Pananglitan, si Santhosh, brader nga taga-India, miingon: “Gusto sa among pamilya nga apilan ug Hindu nga mga rituwal ang among kasal. Naningkamot mi pag-ayo nga ma-explain namo sa among pamilya ang among mga desisyon, pero mi-adjust pod mi sa ilang mga hangyo nga dili ra supak sa Bibliya. Pananglitan, bisag naa na mi naplano nga menu sa reception, amo tong giilisag mga pagkaon nga gusto nila. Midesisyon pod mi nga wala na lay manganta o manayaw kay wala sila maanad ug mga ingon ana.”

18. Unsaon ninyo pagseguro nga hapsay ra ang tanan panahon sa inyong kasal? (1 Corinto 14:40) (Tan-awa sab ang hulagway.)

¹⁸ Planoha nig maayo. Kon maayong pagkaplano ang tanan, dili kaayo mo ma-stress panahon sa inyong kasal. (Basaha ang 1 Corinto 14:40.) Si Wayne, nga taga-Taiwan, miingon: “Pipila ka adlaw una sa among kasal, gimiting namo kadtong mga gihatagan namog asaynment. Gi-review namo ang himoonon sa matag usa, ug nag-rehearse pod mi aron maseguro nga hapsay ang tanan.” Mahimo pong hapsay ang kasal kon sundon ninyo ang oras nga inyong giingon sa inyong mga bisita. Nianang paagiha, makapakita mog pagtahod nila.

19. Unsaon ninyo pagseguro nga walay mahitabong problema panahon sa reception?

¹⁹ Malikayan ang daghang problema kon maghunahuna mo daan sa mga posibleng mahitabo. (Prov. 22:3) Pananglitan, kon komon sa inyong lugar nga naay mokalit ug abot bisag wala imbitaha, hunahunaa daan kon unsay inyong mahimo aron malikayan ni. Kon naa moy imbitahong mga paryente nga dili Saksi, sultihi sila kon unsay ilang madahom ug kon unsay inyong panglantaw bahin sa pipila ka tradisyon sa kasal. Puwede ninyong ipabasa nila ang artikulong “Unsay Ginahimo Panahon sa Kasal sa mga Saksi ni Jehova?” nga makita sa jw.org. Aron maseguro ninyo nga okey ang tanan panahon sa reception, puwede mong magpilig hamtong nga brader nga mahimong director of the feast. (Juan 2:8) Kon klaro ninyong isulti kaniya ang inyong mga plano, makatabang siya aron maseguro ninyo nga hapsay ang inyong kasal ug matuman ang inyong mga gusto.

20. Unsay angayng hinumdoman sa kaslonon bahin sa ilang kasal?

²⁰ Tungod sa kadaghan sa kinahanglan ninyong konsiderahon, makaingon tingali mo nga dili man diay lalim magplanog kasal. Pero hinumdomi nga usa ra ka adlaw ang inyong kasal. Kini ang sinugdanan sa inyong nindot nga kinabuhi sa pag-alagad kang Jehova ingong magtiayon. Maong paningkamoti nga mahimong simple ug hapsay ang inyong kasal. Salig sa giya ni Jehova. Kon inyo nang himoon, makaseguro mo nga ang inyong kasal puro lang kalipay ug wala gyoy pagmahay.—Sal. 37:​3, 4.