Ang Georgian nga Bibliya

ANG Georgian maoy usa sa unang mga pinulongan nga dunay hubad sa Bibliya, lakip ang Armenian, Coptic, Latin, Syriac, ug uban pa. Ang karaang Georgian nga mga manuskrito sa Mga Ebanghelyo, mga sulat ni Pablo, ug mga Salmo gisulat sa mga 450 C.E. o mas sayo pa. Paglabayg ginatos ka katuigan, midaghan ang maghuhubad ug magkokopya sa Bibliya ngadto sa pinulongang Georgian, maong daghang bersiyon niini ang nahimo.a

Dako kaayog impluwensiya ang Bibliya sa mga basahon ug sa pamatasan sa mga Georgian. Pananglitan, ang makapaguol nga estorya bahin kang Rayna Shushanik, nga lagmit gisulat niadtong hinapos sa ikalimang siglo, naggamit ug mga pangutlo sa Bibliya. Ang tula ni Shota Rustaveli nga Vepkhvistqaosani (The Knight in the Panther’s Skin), nga gikomposo niadtong mga 1220, nagpasiugdag Kristohanong mga pamatasan. Ang iyang mga tula nagdasig ug panaghigala, pagpanghatag, ug paghigugma sa mga estranyo—mga pamatasan nga giisip sa mga Georgian nga angay gihapong sundon karon.