Mga Panalangin Panahon sa ‘Paborable ug Masamok’ nga Kahimtang.​—2 Tim. 4:2.

NALIPAY ang mga Saksi sa Georgia kay sukad sa hinapos sa katuigang 1990, midaghan pag-ayo ang mga magmamantala ug mga interesado. Sa 1998, mga 32,409 ang mitambong sa Memoryal sa kamatayon ni Kristo.

Daghan sa mga igsoon, bisan ang mga ansiyano, bag-ohan pa sa kamatuoran ug kulang pag kasinatian. Busa kinahanglan silang bansayon diha sa lainlaing bahin sa espirituwal nga mga kalihokan. Pero unsaon sila pagbansay?

Ang Organisasyon Nagtaganag Dugang Tabang

Si Arno ug Sonja Tüngler, graduwado sa Gilead Extension School sa Germany, giasayn sa Georgia niadtong Marso 1998. Nianang tuiga, giaprobahan sa Nagamandong Lawas ang pagbukas ug country office sa Georgia, ubos sa pagdumala sa sangang buhatan sa Russia.

Ang Country Committee mao ang nagdumala sa buluhatong pagsangyaw. Dihang narehistro ang atong mga buluhaton, nakadawat nag mga suplay sa literatura ang Georgia gikan sa sangang buhatan sa Germany. Gitugotan na sab sa gobyerno ang organisasyon nga mopalit ug mga lote aron tukoran ug mga Kingdom Hall ug mga pasilidad sa sangang buhatan.

Panahon sa Espirituwal nga Pagbansay

Tungod kay gidili sa Soviet ang atong buluhaton sulod sa daghang katuigan, tinagotago ug limitado ra ang pagpamalaybalay sa mga igsoon. Si Arno Tüngler nahinumdom: “Ang mga igsoon anad kaayong mosangyaw diha sa kadalanan, pero wala maanad sa pagpamalaybalay ug pagbalikduaw.”

Pagka-Mayo 1999, si Davit Devidze giasayn nga mag-alagad sa country office. Siya miingon: “Daghan kaayog buluhaton sa kanataran ug sa Bethel. Duna miy mga nabasa bahin niana pero wala miy ideya kon unsaon paghimo, maong naniid mi ug nagkat-on gikan sa eksperyensiyadong mga brader nga gipadala sa Nagamandong Lawas.”

Busa, dunay gihimong mga kahikayan aron mabansay pag-ayo ang mga igsoon sa Georgia. Kasagaran, kadtong mibalhin sa dapit nga dakog panginahanglan daghag nakat-onan sa mga tawo sa ilang teritoryo. (Prov. 27:17) Ingon niana pod ang nahitabo niadtong gipadala sa Georgia aron mohatag ug pagbansay. Daghan silag nakat-onan sa mga igsoon didto.

Buotan Kaayo ang mga Igsoon sa Georgia

Si Arno ug Sonja dili gyod malimot nga giabiabi sila pag-ayo sa mga igsoon pipila ka adlaw pag-abot nila sa Georgia. Gitabangan sila sa mga igsoon nga maka-adjust sa ilang bag-ong asaynment.

Nahinumdom si Sonja sa ilang kabuotan. Siya miingon: “Duna miy silingan nga magtiayong Saksi, ug kanunay silang mohatag namo ug lamiang pagkaon. Gipakuyog sab mi sa usa ka sister sa pagsangyaw, dayon iya ming gipailaila sa mga igsoon sa among bag-ong kongregasyon ug gitudloan bahin sa ilang kultura. Duna poy sister nga mapailobong nagtudlo namo sa pinulongang Georgian.”

Si Warren ug Leslie Shewfelt, taga-Canada nga giasayn sa Georgia niadtong 1999, miingon: “Nakadayeg kaayo mi sa gugma ug pag-atiman sa mga igsoong Georgian. Silang tanan, apil ang mga bata, suod kaayo.”

Imbes magsigeg hunahuna sa mga kalisdanan nga ilang nasinatian, kadtong gikan sa laing mga nasod nga giasayn sa Georgia nagpokus sa maayong kinaiya sa mga tawo didto. Kay mapainubsanon ug mahigugmaon ang mga misyonaryo, nasuod dayon ang mga igsoon kanila.

Ang mga Tawong Diyosnon Midawat sa Kamatuoran

Sa katuigang 1990, nagkadaghan ang midawat sa kamatuoran. Pagka-1998, dunay 1,724 nga nabawtismohan. Nganong daghan kaayong Georgian ang nainteres sa kamatuoran?

Si Tamazi Biblaia, nga nag-alagad kaniadto ingong traveling overseer sulod sa daghang katuigan, miingon: “Ang mga tawo gipadako nga may gugma sa Diyos, maong maminaw sila pag-ayo dihang sangyawan namo sila.”

Si Davit Samkharadze, nga instruktor sa School for Kingdom Evangelizers, miingon: “Dihang magpa-Bible study ang mga interesado, kasagaran pugngan sila sa ilang mga paryente ug silingan. Ilang kombinsihon ang interesado nga undangon ang Bible study. Pero wala madugay, nagpa-Bible study na sab sila!”

Daghan kaayo ang nasangyawan sa mensahe sa Gingharian ug nag-usab sa ilang kinabuhi. Niadtong Abril 1999, dunay 36,669 ang nanambong sa Memoryal.

‘Dunay Daghang Magsusupak’

Bahin sa iyang buluhatong pagsangyaw sa Efeso, si apostol Pablo misulat: “Nabuksan kanako ang usa ka dakong pultahan nga nagatultol ngadto sa kalihokan, apan adunay daghang magsusupak.” (1 Cor. 16:9) Ingon niini ang kahimtang sa mga igsoon sa Georgia pipila ka bulan human sa ilang Memoryal niadtong 1999.

Sa Agosto nianang tuiga, ang mga sakop sa ekstremista nga grupong Orthodox, nga gipangunahan sa nataktak nga pari nga si Vasili Mkalavishvili, nag-rally sa Tbilisi ug gisunog ang atong mga publikasyon diha sa publiko. Mao ni ang sinugdanan sa sunodsunod nga paglutos sulod sa upat ka tuig.

Niadtong Oktubre 17, 1999, ang pipila ka relihiyosong ekstremista uban sa mga 200 pa ka tawo misulong sa mga igsoong nagtigom sa Gldani Congregation sa Tbilisi. Ilang gipamunalan ug batuta ug puthawng mga krus ang mga igsoon, maong daghan ang naospital.

Pero wala giaresto ang maong grupo ug padayon gihapong gilutos ang mga Saksi. Daghang opisyales sa gobyerno, apil ang presidente nga si Shevardnadze, ang wala mouyon niining pintas nga pagpangatake, pero wala silay gihimong aksiyon. Gani, ang mga polis kasagarang moabot inigkahuman na sa pagpangatake.

Nianang panahona sab, si Guram Sharadze, nga membro sa Georgian nga parliamento, nanguna aron daoton ang reputasyon o dungog sa mga Saksi. Iyang giakusahan ang mga Saksi ingong peligrosong mga tawo. Ingong resulta, lisod na alang sa mga igsoon ang pagsangyaw sa maayong balita.

Mihimog Aksiyon ang Organisasyon

Ang organisasyon ni Jehova milihok dayon aron tabangan ang mga Saksi sa Georgia. Ang mga igsoon nakadawat ug mga instruksiyon kon unsay himoon dihang atakehon sa mga magsusupak. Ug gipahinumdoman sila sa mga rason kon nganong ginalutos ang tinuod nga mga Kristohanon.​—2 Tim. 3:12.

Ang organisasyon mihimo sab ug mga aksiyon aron depensahan ang atong mga igsoon atubangan sa korte. Usa ka igsoon nga nag-alagad sa Legal Department sa sangang buhatan sa Georgia, nahinumdom: “Sulod sa upat ka tuig nga paglutos, nagpasaka mig kapig 800 ka reklamo batok sa grupo ni Vasili Mkalavishvili. Nangayo mig tabang sa mga opisyales ug sa human rights nga mga organisasyon. Ang hedkuwarter sa mga Saksi ni Jehova naghimog kampanya aron ipahibalo sa publiko ang paglutos batok sa atong mga igsoon, pero wala gihapon maundang ang pagpangatake.”a