Unsa ang Bawtismo?
Tubag sa Bibliya
Ang bawtismo nagpasabot nga ang usa ka tawo bug-os nga ituslob sa tubig.a Daghang bawtismo ang gihisgotan sa Bibliya. (Buhat 2:41) Usa niini ang bawtismo ni Jesus, kinsa gilusbog sa Suba sa Jordan. (Mateo 3:13, 16) Katuigan sa ulahi, usa ka Etiopianhong lalaki ang gibawtismohan sa “dapit nga may tubig” duol sa dalan nga iyang giagian.—Buhat 8:36-40.
Si Jesus nagtudlo nga kinahanglang mabawtismohan ang iyang mga sumusunod. (Mateo 28:19, 20) Gipasiugda pod na ni apostol Pedro.—1 Pedro 3:21.
Niining artikuloha
Unsay giingon sa Bibliya bahin sa pagbawtismo ug masuso (bata) o pagbunyag?
Unsay ipasabot sa pagbawtismo sa ngalan sa Amahan, sa Anak, ug sa balaang espiritu?
Unsay ipasabot sa bawtismo?
Pinaagi sa bawtismo, gipakita sa usa ka tawo ngadto sa publiko nga siya naghinulsol na sa iyang mga sala ug nanaad sa Diyos nga buhaton ang Iyang kabubut-on. Apil niana, ang kanunayng pagsunod sa Diyos ug kang Jesus sa tanang bahin sa iyang kinabuhi. Kon nabawtismohan na ang usa ka tawo, duna na siyay paglaom nga mabuhi sa walay kataposan.
Ang pagtuslob sa tubig maoy haom nga simbolo sa kausaban nga gihimo sa usa ka tawo sa iyang kinabuhi. Ngano? Sa Bibliya, ang bawtismo gipakasama sa paglubong. (Roma 6:4; Colosas 2:12) Pinaagi sa paglusbog sa tubig, gipakita sa maong tawo nga siya samag namatay sa iyang kanhing paagi sa pagkinabuhi. Paghaw-as niya sa tubig, iyang gipakita nga nagsugod na ang iyang bag-ong kinabuhi ingong dedikadong Kristohanon.
Unsay giingon sa Bibliya bahin sa pagbawtismo ug masuso (bata) o pagbunyag?
Ang Bibliya wala magtudlo nga ang mga masuso angayng bawtismohan o “bunyagan.”b Hinuon, nagtudlo ni nga kon ang usa ka tawo gustong magpabawtismo, naay pipila ka butang nga kinahanglan niyang himoon.
Pananglitan, kinahanglang nakasabot siya sa pangunang mga pagtulon-an sa Pulong sa Diyos ug nagkinabuhi uyon niini. Naghinulsol na siya sa iyang mga sala, ug pinaagi sa pag-ampo, iya nang gipahinungod sa Diyos ang iyang kinabuhi. (Buhat 2:38, 41; 8:12) Ang mga masuso dili makahimo nianang mga butanga.
Unsay ipasabot sa pagbawtismo sa ngalan sa Amahan, sa Anak, ug sa balaang espiritu?
Gisugo ni Jesus ang iyang mga sumusunod: “Tudloi [ang mga tawo] aron mahimong akong mga tinun-an. Bawtismohi sila sa ngalan sa Amahan ug sa Anak ug sa balaang espiritu. Tudloi ninyo sila sa pagtuman sa tanan nakong gisugo kaninyo.” (Mateo 28:19, 20) Ang mga pulong nga “sa ngalan sa” nagpasabot nga giila sa gibawtismohan ang awtoridad ug posisyon sa Amahan ug sa Anak ug ang papel sa balaang espiritu sa Diyos. Sa pag-ilustrar: Giingnan ni apostol Pedro ang tawong bakol sukad sa pagkahimugso: “Sa ngalan ni Jesu-Kristo nga Nasaretnon, tindog ug lakaw!” (Buhat 3:6) Tin-aw nga gipakita niini nga giila ni Pedro ang awtoridad sa Kristo ug nga tungod ni Jesus, milagrosong naayo ang tawong bakol.
Ang “Amahan” nagtumong kang Jehovac nga Diyos. Ingong Maglalalang, Maghahatag ug Kinabuhi, ug Labing Gamhanang Diyos, siya ang may kinalabwang awtoridad.—Genesis 17:1; Pinadayag 4:11.
Ang “Anak” mao si Jesu-Kristo, nga naghatag sa iyang kinabuhi para nato. (Roma 6:23) Dili ta maluwas kon dili nato ilhon ug dawaton ang importanteng papel ni Jesus sa katuyoan sa Diyos para sa katawhan.—Juan 14:6; 20:31; Buhat 4:8-12.
Ang “balaang espiritu” mao ang aktibong puwersa o gahom sa Diyos.d Gigamit sa Diyos ang iyang balaang espiritu sa paglalang, sa paghatag ug kinabuhi, sa pagpadalag mensahe ngadto sa iyang mga propeta ug sa uban, ug sa paghatag kanilag kusog sa pagbuhat sa iyang kabubut-on. (Genesis 1:2; Job 33:4; Roma 15:18, 19) Gigamit sab sa Diyos ang balaang espiritu sa paggiya sa mga magsusulat sa Bibliya sa pagsulat sa iyang hunahuna.—2 Pedro 1:21.
Sala ba ang pagpabawtismo pag-usab?
Daghang tawo ang midesisyon nga mobalhin ug relihiyon. Pero komosta kon nabawtismohan sila sa ilang kanhing relihiyon? Sala ba kon mabawtismohan sila pag-usab? Ang uban moingon ug oo, tungod tingali sa ilang pagsabot sa Efeso 4:5 nga nag-ingon: “Usa ka Ginoo, usa ka pagtuo, usa ka bawtismo.” Pero kini nga bersikulo wala magpasabot nga dili na puwedeng bawtismohan pag-usab ang usa ka tawo. Ngano?
Konteksto. Gipakita sa konteksto sa Efeso 4:5 nga gipasiugda ni apostol Pablo nga ang tinuod nga mga Kristohanon kinahanglang mahiusa sa tinuohan ug pagtuo. (Efeso 4:1-3, 16) Ang maong panaghiusa mahitabo lang kon sila nagsunod sa usa lang ka Ginoo, si Jesu-Kristo; dunay samang pagtuo, o pagsabot sa gitudlo sa Bibliya; ug nagsunod sa samang mga kinahanglanon nga gibase sa Bibliya para sa bawtismo.
Gidasig ni apostol Pablo ang pipila nga nabawtismohan na nga magpabawtismo pag-usab. Tungod kini kay nabawtismohan sila kaniadto nga wala bug-os masabti ang Kristohanong mga pagtulon-an.—Buhat 19:1-5.
Hustong basehanan sa bawtismo. Aron mahimong dalawaton sa Diyos, ang bawtismo angayng ibase sa tukmang kahibalo sa kamatuoran sa Bibliya. (1 Timoteo 2:3, 4) Kon ang usa nabawtismohan base sa mga pagtulon-an sa relihiyon nga supak sa Bibliya, ang maong bawtismo dili dalawaton sa Diyos. (Juan 4:23, 24) Sinsero tingali ang maong tawo, pero wala siya mabawtismohi “sumala sa tukmang kahibalo.” (Roma 10:2) Aron madawat ang pag-uyon sa Diyos, kinahanglan siyang magkat-on sa kamatuoran sa Bibliya, magpadapat sa iyang nakat-onan, magpahinungod sa iyang kinabuhi ngadto sa Diyos, ug magpabawtismo pag-usab. Sa maong kahimtang, dili sala ang iyang pagpabawtismo pag-usab. Ang tinuod, kini ang angay niyang himoon.
Uban pang bawtismo nga gihisgotan sa Bibliya
Gihisgotan sa Bibliya ang uban pang bawtismo nga lahig kahulogan sa pagbawtismo sa mga sumusunod sa Kristo pinaagig pagtuslob sa tubig. Konsideraha ang pipila ka pananglitan.
Bawtismo nga gihimo ni Juan nga Tigbawtismo.e Ang mga Hudiyo ug mga Hudiyong kinabig gibawtismohan ni Juan ingong simbolo sa ilang paghinulsol sa mga sala nga ilang nahimo dihang misupak sila sa Moisesnong Balaod—ang Balaod nga gihatag sa Diyos ngadto sa mga Israelinhon pinaagi kang Moises. Ang bawtismo nga gihimo ni Juan nagtabang sa mga tawo nga mahimong andam sa pag-ila ug pagdawat sa Mesiyas, si Jesus nga Nasaretnon.—Lucas 1:13-17; 3:2, 3; Buhat 19:4.
Bawtismo ni Jesus. Lahi kaayo ang bawtismo ni Jesus nga gihimo ni Juan nga Tigbawtismo. Si Jesus hingpit ug walay nahimong sala. (1 Pedro 2:21, 22) Busa ang iyang bawtismo wala magkahulogan nga siya naghinulsol ug ‘mihangyo sa Diyos ug maayong konsensiya.’ (1 Pedro 3:21) Hinuon, nagpakita ni nga gihatag niya ang iyang kaugalingon ngadto sa Diyos aron himoon ang Iyang kabubut-on ingong gitagnang Mesiyas, o Kristo. Naglakip ni sa paghatag sa iyang kinabuhi para nato.—Hebreohanon 10:7-10.
Bawtismo sa balaang espiritu. Gihisgotan ni Juan nga Tigbawtismo ang bahin sa bawtismo sa balaang espiritu, ug gihisgotan ni Jesus ang bahin sa bawtismo pinaagi sa balaang espiritu. (Mateo 3:11; Lucas 3:16; Buhat 1:1-5) Ang maong bawtismo dili sama sa bawtismo sa ngalan sa balaang espiritu. (Mateo 28:19) Ngano?
Limitado lang ang gidaghanon sa mga sumusunod ni Jesus nga mabawtismohan sa balaang espiritu. Dinihogan sila sa balaang espiritu kay gipili sila nga mag-alagad uban sa Kristo didto sa langit ingong mga hari ug saserdote ibabaw sa yuta.f (1 Pedro 1:3, 4; Pinadayag 5:9, 10) Ang ilang mga sakop mao unya ang minilyon ka sumusunod ni Jesus nga may paglaom nga mabuhi sa walay kataposan sa Paraiso dinhi sa yuta.—Mateo 5:5; Lucas 23:43.
Bawtismo kang Kristo Jesus ug sa iyang kamatayon. Kadtong mga gibawtismohan sa balaang espiritu “gibawtismohan [sab] kang Kristo Jesus.” (Roma 6:3) Busa kini nga bawtismo mahitabo sa dinihogang mga sumusunod ni Jesus, nga magmando uban kaniya sa langit. Kay gibawtismohan sila kang Jesus, nahimo na silang bahin sa iyang dinihogang kongregasyon. Si Jesus ang Ulo, ug sila ang lawas.—1 Corinto 12:12, 13, 27; Colosas 1:18.
Ang dinihogang mga Kristohanon “gibawtismohan [sab sa] kamatayon” ni Jesus. (Roma 6:3, 4) Ilang gisundog si Jesus pinaagi sa pagpokus sa ilang kinabuhi sa pagtuman sa Diyos imbes sa ilang kaugalingon, ug sama kang Jesus, nahibalo sila nga dili sila magkinabuhi sa walay kataposan dinhi sa yuta. Mahuman ang ilang bawtismo sa kamatayon ni Jesus dihang mamatay sila ug mabanhaw ngadto sa langit ingong espiritung mga linalang.—Roma 6:5; 1 Corinto 15:42-44.
Bawtismo sa kalayo. Si Juan nga Tigbawtismo miingon sa iyang mga mamiminaw: “[Si Jesus] magbawtismo kaninyo sa balaang espiritu ug sa kalayo. Siya nagkupot ug pangpalid nga pala, ug hinloan niya sa bug-os ang iyang giokanan ug tigomon ang iyang trigo ngadto sa kamalig, apan ang tahop iyang sunogon sa kalayo nga dili mapalong.” (Mateo 3:11, 12) Matikdi nga managlahi ang bawtismo sa kalayo ug ang bawtismo sa balaang espiritu. Unsay ipasabot ni Juan niini nga ilustrasyon?
Ang trigo nagrepresentar niadtong mamati kang Jesus ug mosunod kaniya. Duna silay paglaom nga mabawtismohan sa balaang espiritu. Ang tahop nagsimbolo niadtong dili mamati kang Jesus. Bawtismohan sila sa kalayo, nga nagpasabot nga laglagon sila hangtod sa hangtod.—Mateo 3:7-12; Lucas 3:16, 17.
a Ang Gregong pulong nga gihubad ug “bawtismo” nagtumong sa “pagtuslob, paglusbog ug paghaw-as,” sumala sa Vine’s Complete Expository Dictionary of Old and New Testament Words.
b Ang “pagbunyag” nagtumong sa seremonyas nga gihimo sa ubang simbahan diin ang mga masuso hatagag ngalan ug dayon “bawtismohan” pinaagi sa pagwisik o pagbubog tubig diha sa ilang ulo.
c Jehova ang personal nga ngalan sa Diyos. (Salmo 83:18) Tan-awa ang artikulo nga “Kinsa si Jehova?”
d Tan-awa ang artikulo nga “Unsa ang Balaang Espiritu?”
e Tan-awa ang artikulo nga “Kinsa si Juan nga Tigbawtismo?”
f Tan-awa ang artikulo nga “Kinsay Moadto sa Langit?”
g Gigamit sab sa Bibliya ang terminong “bawtismo” para sa pipila ka seremonyal nga pagpanghinlo, sama sa pagtuslob ug mga galamiton diha sa tubig. (Marcos 7:4; Hebreohanon 9:10, footnote) Pero lahi ni sa bug-os nga pagtuslob sa tubig o bawtismo ni Jesus ug sa iyang mga sumusunod.