¿Kácheʼda u chénonla beneficiá ni ley de ni Dios?

1. ¿Kokʼa kʼɨnɨ-kɨkʼala chiktíntikonla?

Aj Jehová, ni kɨ Pap-la ke u yajinonla i yo ke ajnékonla uts. Une u chi u pete kosa, une yuyí más ke ni personajob. Mach u chonla ta ajnékonla tɨ kuxlé nat de une (Jeremías 10:23). Kaʼ ni bijchʼokob kʼɨnɨ ke ni u papob u yelbenob kamba bij debe bixikob, cheʼchi ni personajob kʼɨnɨ ke ni Dios u yelbén kamba bij debe xikonla (Isaías 48:17, 18). Lu ke u yeleʼ ni Biblia u chiktánonla, jin umpʼe mátɨni de aj Jehová. Tsikí tɨ 2 Timoteo 3:16.

Ni ley ta Dios u yeʼbenonla kacheʼda ajnek ni kɨ kuxlela más uts i kacheʼda ajnek tɨkʼala ni bendicionob ke mach u je tɨ xupo tan ba tiempu kɨ u je tɨ te. Kʼa une u chonla, debe kɨ chʼela tʼo chʼajaljin ke une u chiktánonla. Tsikí tɨ Romanos 15:4 i Apocalipsis 4:11.

2. ¿Kácheʼda u kɨnɨntánonla ni ley de ni Dios?

Yaʼan konseju tan Biblia ke puede kʼɨnkak en kachikamba kosajob de ni kɨ kuxlela. Peru ni ley u yelbenonla kɨ chenla seʼ (seʼma) umpʼe kosa (Deuteronomio 22:8). Debe kɨ kʼɨneʼla kɨ kʼajalinla kʼa kɨ chenla entendé kacheʼda debe kʼɨnkak ni konseju ke yaʼan tan Biblia (Proverbios 2:10-12). Kaʼ jinda, ni Biblia u yeʼeʼ ke ni kuxlé jin umpʼe mátɨni de ni Dios. Jimba tʼanob puede u kɨnɨntánonla tan kɨ patanla, tan kototla i jin kʼin ke a kɨ bixela tan otro kajob, ¿kácheʼda? Si a kɨ kʼajtiʼinla ke ni kuxlé jin umpʼe mátɨni de Dios, mach kɨ je kɨ chenla ni umpʼe kosa ke puede u chen ke kɨ sɨteʼla ni kɨ kuxlela o u kuxlé kɨ lotla. Tsikí tɨ Hechos 17:28.

3. ¿Kámba ni leyes más kʼɨnɨ?

Aj Jesús u yelí kamba ni chapʼe leyes más kʼɨnɨ. Najtɨkɨl ley u yeleʼ kokʼa (xuxtuba) yaʼanonla tɨ kuxlé pan Kaʼb: ta kɨ chenla konocé ni Dios, ta kɨ yajinla, i ta kɨ tsʼonbenla. Debe kɨ kʼajtiʼinla jimba tʼanob da tan u pete lu ke a kɨ chenla tan ni kɨ kuxlela (Proverbios 3:6). Katak u tsʼonɨn jimba tʼanob u je u chen-uba u yamigu ni Dios, u je tɨ ajne tʼo chʼajaljin tu tojá i u je tɨ kuxlé u pete tiempu. Tsikí tɨ Mateo 22:36-38.

Ni chapʼelib ley u yelbenonla kacheʼda debe kɨ chenla tratá ni kɨ lotla (1 Corintios 13:4-7). Al kɨ chenla kaini tan ni kɨ kuxlela a kɨ chenla kaʼ u chen ni Dios de ni u tratu tʼo ni personajob. Tsikí tɨ Mateo 7:12 i 22:39, 40.

4. ¿Kácheʼda u chénonla beneficiá ni ley de ni Dios?

Ni ley de ni Biblia u yeʼeʼ kacheʼda ni yajinlé u woyeʼ ni familia (Colosenses 3:12-14). Umpʼe de jimba ley da u kɨnɨntan ni familiajob, u yelbén ni itʼokob ke mach debe u walɨktan-ubajob. Tsikí tɨ Mateo 19:5.

Si a kɨ tsʼononla ni ley ke yaʼan tan Biblia, u je tɨ ajne tɨkʼala lu ke a kɨ kʼɨnɨlesanla ta kuxlíkonla i cheʼchi ni kɨ kʼajalinla u je tɨ ajne tʼo ni paz. Chen pensá de jinda, jimba persona ke u jokʼeʼ tɨ patán otrojob u sakɨn ni personajob ke u tsʼonbenob u tʼan Dios, ke mach u chenob xuchʼ, niʼ jopʼojtiʼ i ke u yolínob u chen patan (Proverbios 10:4, 26; Hebreos 13:18). Cheʼchi, ni u tʼan Dios u yeʼbenonla ajnek chʼaja kɨ jinla tʼo lu ke yaʼan tɨkʼala i kɨ kʼeʼla najtɨkɨ de u pete kosa ni kɨ amistadla tʼo Dios. Tsikí tɨ Mateo 6:24, 25, 33 i 1 Timoteo 6:8-10.

Si a kɨ tsʼonɨnla ni ley ke yaʼan tan ni Biblia jinda u tɨklénonla ta ajnek uts kɨ saludla, kaʼ jinda, si kɨ tsʼonɨnla lu ke Dios u yeleʼ de mach kɨ chenla chibá, mach a kɨ jela tɨ ajne tʼo yebé yajob ke puede u tsɨmsénonla, i mach puede u chénonla pasá kosajob ke mach uts, kaʼ umpʼe akcidente (Proverbios 14:30; 22:24, 25; 23:20). Aj Jehová u chen permití kuchʼenla tsʼitaʼ ni chij mach kʼen (Salmo 104:15; 1 Corintios 6:10). Ni ley ke yaʼan tan ni Biblia u chénonla beneficiá, ta kɨ kɨnɨntanla lu ke a kɨ chenla, cheʼchi kɨ kʼajalinla (Salmo 119:97-100). Peru ni kristianujob tu tojá mach seʼ (seʼma) kɨ chenla respetá ni ley ke yaʼan tan ni Biblia ta ajnékonla uts, a kɨ chenla ta kɨ ɨbenla honra ni kɨ Pap-la tɨ cielu, aj Jehová. Tsikí tɨ Mateo 5:14-16.