Néún Jon Áeúin Taropwe
4 Ámi mi áchengicheng, ousap lúkú iteiten oesini meinisin, nge oupwe etittina iká ra pop seni Kot, pún chómmóng soufós chofona ra pwá wóón ei fénúfan.
2 Oupwe silei iká ekkewe oesini ra pop seni Kot, iká ra erá pwe Jises Kraist a feito wóón fénúfan ussun emén aramas. 3 Nge iká rese erá pwe Jises a feito wóón fénúfan ussun emén aramas, iwe, rese pop seni Kot. Pwal och, oua fen rong pwe ekkena oesini repwe feito seni ewe emén mi ú ngeni Kraist, me iei ra fen chéúló wóón fénúfan.
4 Ámi nei kana mi áchengicheng, oua pop seni Kot, me oua okkufu ekkewe soufós chofona pokiten Kot a álisikemiitá me i a péchékkúl seni ewe Tefil, ewe mi álisaatá ei fénúfan. 5 Iir ra pop seni fénúfan, ina popun ra apasa met mi pop seni fénúfan me fénúfan a aúseling ngeniir. 6 Kich sia pop seni Kot. Ié a silei Kot a aúseling ngenikich. Ié ese pop seni Kot, ese aúseling ngenikich. Ren ei, sia tongeni esilla ewe oesini mi enlet me ewe mi chofona.
7 Ámi mi áchengicheng, sipwe sópweeló le tongfengen lefilach. Pún tong a pop seni Kot, me ié a eáni tong, i a upu seni Kot me silei Kot. 8 Ié ese eáni tong, ese silei Kot, pún Kot i tong. 9 Iei ussun a pwááló án Kot tongekich, ren an a tiinaato Néún we áláemén ngeni fénúfan pwe sipwe kúna manaw ren i. 10 Kot a tiinaato Néún we pwe epwe eú asoren chásefál fán iten ach kewe tipis. A féri ena pokiten a tongekich, nge esap pokiten ach tongei i.
11 Ámi mi áchengicheng, pokiten a ina ussun án Kot tongekich, iwe a pwal wor wisach ach sipwe tongfengen lefilach. 12 Ese wor emén a kúna Kot fán eú. Iká sipwe sópweeló le tongfengen lefilach, Kot epwe nónnóm rech me an we tong epwe unusoló lón kich. 13 Ren ei, sia silei pwe sia nónnóm ren i me i a nónnóm rech, pún a fang ngenikich an we ngún mi fel. 14 Pwal och, kich sia pwisin kúna me pwáraatá pwe ewe Sam a tiinaato Néún we an epwe chón amanaw fán iten chón fénúfan. 15 Ié a apasa pwe Jises i Néún Kot, iwe Kot a nónnóm ren ena emén me i a nónnóm ren Kot. 16 Kich sia fen silei me lúkú pwe Kot a tongekich.
Kot i tong, me ewe emén mi pwáppwári tong a nónnóm ren Kot me Kot a nónnóm ren i. 17 Ren ei, tong a unusoló lón kich pwe sipwe fós fán lúkúlúk lón ewe ránin kapwúng, pún lón ei fénúfan kich sia ussun chék Kraist. 18 Ese wor niwokkus lón tong, nge tong mi unuséch a asúoló niwokkus, pún niwokkus a eppetikich. Ina minne, ewe emén mi niwokkus ese mwo unuséch lón an tong. 19 Sia eáni tong, pokiten i a akkomw tongekich.
20 Iká emén a apasa, “Úa tongei Kot,” nge a oput pwiin, i emén chón chofona. Pún emén ese tongei pwiin, ewe i mi tongeni kúna, ese tongeni tongei Kot, ewe emén i ese tongeni kúna. 21 Iwe, iei ewe allúk seni i, ié a tongei Kot epwe pwal tongei pwiin.