Féffér

4 Atun ekkewe rúúemén ra kakkapas ngeni ekkewe aramas, ekkewe souasor, ewe meilapen ewe imwenfel,* me ekkewe Satusi ra feito rer. 2 Iir ra song pokiten ekkewe aposel ra asukula ekkewe aramas me esilefeili manawsefálin Jises seni máló. 3 Iwe, ra turufiir* me kalapuser tori lón ewe rán mwirin, pún a fen pwin. 4 Iwe nge, chómmóng me lein chókkewe mi rongorong ngeni ekkewe kapas, ra lúkú. Chóchóón ekkewe mwán ra lúkú, ina epwe 5,000.

5 Lón ewe rán mwirin, néúr kewe sounemenem, néúwisin Jus, me ekkewe soumak* ra kochufengen lón Jerusalem, 6 fitifengen me ewe souasor mi lap Anas, Kaifas, Jon, Aleksanter, me meinisin aramasen ewe souasor mi lap. 7 Ra aútáái Piter me Jon lukanaper me poputá le eisiniir: “Fán menni nemenem are lón iten ié oua féri ei?” 8 Mwirin, Piter mi ur ren ewe ngún mi fel, a ereniir:

“Ámi kana sounemenemen aramas me néúwisin Jus, 9 iká áúa etittin ikenái ussun eú féffér múrinné ngeni emén mwán mi pechemá me oua mochen silei ié a apéchékkúla ei mwán, 10 oupwe silei ámi meinisin me meinisin ekkewe aramasen Israel pwe lón iten Jises Kraist ewe re Nasaret, ewe oua chúfélúetá wóón ewe irá nge Kot a amanawaatá seni máló, ren i, ei mwán a útá ikeei ie mwen mesemi fán an péchékkúl. 11 Iei ewe ‘faw, me ren néúmi kewe chón kaú ese wor aúchean, a wiliiti eféú féún lepwokuku mi fókkun aúchea.’ 12 Pwal och, ese wor pwal emén a wor amanaw ren pún ese pwal wor eú it fán láng a kawor ngeni aramas fán iten ach sipwe kúna manaw ren.”

13 Iwe, atun ra kúna án Piter me Jon pwora le kapas me mirititi pwe iir rese fiti sukul* me iir chék aramas kisikis, ra máirú. Me ra poputá le esilla pwe iir ra piin fiffiti Jises. 14 Ese wor met ra apasa le pélúweni ei, atun ra nennengeni ewe mwán mi fen chikaretá mi úkkúútá rer. 15 Iwe, ra allúk ngeniir ar repwe towu seni lón leenien án chón Jus we mwichen soukapwúng mi tekia, me ra poputá le pwúngúpwúngfengen lefiler, 16 ra apasa: “Met ei sipwele fér ngeni ekkeei mwán? Pún ren enletin, eú manaman* mi amwarar a pwá me rer, meinisin aramas lón Jerusalem ra kúna, me kich sise tongeni erá pwe ese pwúng. 17 Iwe, ren an esap chúen pwal chéúló lein ekkeei aramas, ousipwele eniwer me ereniir ar resap chúen kapas ngeni emén ussun ei it.”

18 Iei minne ra kériir me allúkú ngeniir ar resap chúen mwo nge apasa och kapas are asukul mi lóngólóng wóón iten Jises. 19 Nge lón án Piter me Jon pélúweni, ra ereniir: “Ikáámwo mi pwúng mwen mesen Kot án emén epwe aúseling ngenikemi lap seni an epwe aúseling ngeni Kot, oupwe pwisin apwúngaló. 20 Nge ren ám, áúsapw tongeni úkútiw le kapas ussun ekkewe mettóch áúa kúna me rong.” 21 Iwe, mwirin ar ra pwal eniwer, ra omusereló pokiten rese kúna pwal och popun ar repwe eriáfféwúr me fán iten ekkewe aramas, pún iir meinisin ra elingaaló Kot ren minne a fis. 22 Pún ewe mwán mi chikaretá ren ei manaman* a fen lap seni 40 ierin.

23 Mwirin ar musowu, ra feiló ren chiener kewe chón lúkú me ra apwóróusa met ekkewe souasor mi lap me ekkewe néúwisin Jus ra apasa ngeniir. 24 Atun ra rong ei, ra chieppékútá le iótek ngeni Kot me apasa:

“Samol mi Lapalap seni meinisin, en ewe Emén mi féraatá láng me fénúfan me mataw me meinisin masouer kewe, 25 me ewe mi kapas me ren ewe ngún mi fel ren awen semelapem we Tafit, noum we chón angang: ‘Pwata aramasen ekkewe ekkóch fénú ra fókkun osukosuk me ekkewe aramas ra ekilon wóón ekkewe mettóch mi péén? 26 Ekkewe kingen fénúfan ra ammólneeretá me ekkewe sounemenem ra kochufengen lón eú pwe repwe ú ngeni Jiowa* me ú ngeni néún we mi kepit.’* 27 Pún ren enletin, Erot me Pontius Pailat fitifengen me aramasen ekkewe ekkóch fénú me ekkewe aramasen Israel ra kochufengen lón ei telinimw pwe repwe ú ngeni noum we chón angang mi pin Jises, ewe mi kepit me reom, 28 pwe repwe féri ekkewe mettóch óm manaman me minne ka tipeni ra fen apwúngaló me mwen ar repwe fis. 29 Me iei, Jiowa,* kopwe áfánni ar kewe minen enniw me mut ngeni noum kewe slave ar repwe unusen pwora le apasa óm kapas, 30 atun ka echikara ekkewe mi semmwen ren óm manaman me atun a fis ekkewe esissil me manaman me ren iten noum we chón angang mi pin Jises.”

31 Me atun ra iótek,* a chechchech ewe leeni ra chufengen ie, me iir meinisin ra uroló ren ewe ngún mi fel me ra afalafala ewe kapasen Kot fán pwora.

32 Pwal och, ewe mwichen aramas mi lúkú ra eáni eú letip me eú ekiek, me ese mwo nge wor emén me leir a apasa pwe ekkewe mettóch a nóm ren ina pwisin an, nge ra áeáfengen met mi wor rer. 33 Me ren watteen tufich, ekkewe aposel ra sópweeló le pwáraatá ussun manawsefálin ewe Samol Jises, me ewe kirekiréch mi somwoló a nónnóm wóór meinisin a lapalap. 34 Ren enletin, ese wor emén me leir a osupwang, pún meinisin chókkewe mi wor fénúer are imwer ra améméroló me uweato liwinin met mi mééló, 35 me ra wato ren ekkewe aposel. Iwe, a einet ngeni emén me emén me ren úkúúkún met an osupwang. 36 Iwe Josef, ewe ekkewe aposel ra pwal eita ngeni Parnapas (weween, “Emén mi apéchékkúla ekkewe ekkóch”), emén re Lifai, emén chón wesetáán ewe fénú Saipros, 37 a wor eú fénúan, me a améméló me uwei ewe moni me wato ren ekkewe aposel.