Néún Jon Áeúin Taropwe
5 Meinisin chókkewe mi lúkú pwe Jises i ewe Kraist, iir néún Kot, me meinisin chókkewe mi tongei ewe Sam ra pwal tongei néún kewe. 2 Iká sia tongei Kot me álleasochisi an kewe allúk, sia silei pwe sia pwal tongei néún Kot kewe. 3 Pún iei weween ach tongei Kot, sipwe álleasochisi an kewe allúk, nge an kewe allúk resap weires ngenikich, 4 pún meinisin néún Kot kewe ra okkufu fénúfan. Me sia okkufu fénúfan, pokiten ach lúkú.
5 Ié a tongeni okkufu fénúfan? Esap ewe emén mi lúkú pwe Jises i Néún Kot? 6 A wor konik me chcha atun Jises Kraist a feito. Ese chék wor konik, nge a pwal wor chcha. Me ewe ngún mi fel a pwáraatá ena, pokiten a pwáraatá ewe enlet. 7 A wor úlúngát mettóch mi pwáári iká ié Jises: 8 ewe ngún mi fel me ewe konik me ewe chcha. Iir me úlúngát ra tipeeúfengen.
9 Iká sia etiwa án aramas kapasen pwáraatá, a fen kon lapalap án Kot kapasen pwáraatá. Pún Kot pwisin a pwáraatá ussun Néún we. 10 Emén mi lúkú ewe Néún Kot, a amwéchú lón letipan minne Kot a apasa ngeni. Nge emén ese lúkú Kot, a achofonaai Kot, pún ese lúkú met Kot a pwáraatá ussun Néún we. 11 Iei ewe kapasen pwáraatá: Kot a ngenikich manaw esemuch, nge ei manaw a feito seni Néún we. 12 Ewe emén mi tapweló mwirin Néún Kot we, a eáni ena manaw. Nge emén ese tapweló mwirin Néún Kot we, ese eáni ena manaw.
13 Úa makkeei ngenikemi ekkeei mettóch, ámi mi lúkú iten Néún Kot we, pwe oupwe silei pwe oua eáni manaw esemuch. 14 Sia lúkúlúk wóón Kot, pwe ese lifilifil met sipwe tingorei nge mi fich ngeni letipan, i epwe aúselingakich. 15 Iwe, iká sia silei pwe a aúseling ngeni met ekkewe sia tingorei, sia silei pwe sipwe angei, pún sia tingorei i ekkena mettóch.
16 Iká emén a kúna án pwiin féri eú tipis esap emmwen ngeni máló, i epwe iótek fán itan, me Kot epwe fang ngeni manaw. Ena a weneiti chókkewe rese féri tipis mi emmwen ngeni máló. Iwe nge, mi wor eú tipis mi emmwen ngeni máló. Ina ewe tipis úse ereni ena emén an epwe iótek ussun. 17 Meinisin féffér ese pwúng, ina tipis, iwe nge mi wor eú tipis ese atoto máló.
18 Sia silei pwe meinisin néún Kot kewe rese féri tipis, nge Néún Kot we a túttúmúnúúr, me ese wor met ewe mi ngaw epwe tongeni féri ngeniir. 19 Sia silei pwe kich sia pop seni Kot, nge unusen fénúfan a nóm fán nemenien ewe mi ngaw. 20 Nge sia silei pwe Néún Kot we a feito, me a fang ngenikich mirit pwe sipwe angei ewe sile ussun ewe Kot mi enlet. Me ren Néún we Jises Kraist, sia tipeeú ngeni i. Ewer, ina i ewe Kot mi enlet me ewe populapen manaw esemuch. 21 Ámi nei mi áchengicheng, oupwe túmúnúkemi seni uluulun.