Ewe Áeúin Taropwe Ngeni Chón Tesalonika
4 Ámi pwiim kana, oua manaweni ewe manaw mi apwapwaai Kot ussun chék met áúa fen áiti ngenikemi, nge iei áúa pesekemi me tingorekemi lón iten ewe Samol Jises pwe oupwe alapaaló ámi féfféri ena. 2 Pún ámi oua silei ekkewe kapasen emmwen* áúa ngenikemi seni ewe Samol Jises.
3 Pún iei letipen Kot, ámi oupwe pin me ttii senikemi féfférún lisowumwáál.* 4 A lamot emén me emén leimi epwe silei ifa ussun epwe nemeni pwisin inisin pwe epwe chék pin me ésúúfél. 5 Ousap áppirú aramasen ekkewe ekkóch mwú rese silei Kot, iir rese nemeni ar mochenian fefin are mwán, rese fókkun sile menemenéch. 6 Esap wor emén epwe féri minne ese pwúng me efeiengawa pwiin, pún Jiowa* epwe apwúngú meinisin chókkewe mi féri ekkena mettóch, ussun met áúa fen erenikemi me mwan me éúréúrafichi ngenikemi. 7 Kot a kérikich ach sipwe pin, nge esap ach sipwe eáni manaw mi limengaw. 8 Ina minne, ewe mi tunaaló ei, ese tunaaló aramas, nge fen Kot, ewe mi fang ngenikemi an we ngún mi fel.
9 Iwe nge, ren ewe tongen pwipwi, ese pwal lamot ám áúpwe mak ngenikemi ussun pún oua fen káit me ren Kot ámi oupwe tongfengen. 10 Ren enletin, ámi oua fen féfféri ena ngeni meinisin pwiich kewe lón unusen Masetonia. Nge áúa pesekemi, ámi pwiim kana, oupwe pwal alapaaló met oua féfféri. 11 Oupwe achocho le manaweni ewe manawen mosonoson me ousap angolong lón manawen ekkóch me oupwe angang ren pwisin péúmi, ussun chék met áúa fen éúréúra ngenikemi, 12 pwe ekkewe chón lúkún* repwe kúna ámi manaweni ewe manaw mi pwúng me ouse osupwangen och mettóch.
13 Pwal och, ámi pwiim kana, áúa mochen oupwe weweiti met epwe fis ngeni chókkewe mi annut lón máló, pwe ousap letipeta ussun meinisin chókkewe ese wor ar ápilúkúlúk. 14 Pún iká sia lúkú pwe Jises a máló me a manawsefál, sipwe pwal lúkú pwe Kot epwe amanawasefáli chókkewe mi máló lón ar tapweló mwirin Jises pwe repwe nóm ren. 15 Pún iei met áúa erenikemi fán alon Jiowa,* pwe kich ekkewe mi manaw atun án ewe Samol nónnóm, sisap akkomw mwen chókkewe mi annut lón máló. 16 Pún pwisin ewe Samol epwe feitiw seni láng fán néún Kot rappwa me fán mwelian mi léúwommóng, mwelien samolun chónláng. Iwe, néún Kraist kewe chón káé mi máló, repwe akkomw manawetá. 17 Mwirin, kich ekkewe mi manaw, ousipwe feitá lón kuchu me fitiir le chuuri ewe Samol. Iwe, sipwe chék nónnóm ren ewe Samol. 18 Iei minne, oupwe sópweeló le oururufengenikemi ren ekkeei kapas.