Me ren Mattu
20 “Ewe Mwúún láng a ussun chék ewe mastaan imw, ewe a ukosoroló pwe epwe kút néún chón angang lón an we tánipiin kreip. 2 Mwirin an etipeeú ngeni ekkewe chón angang an epwe mééniir wóón eféú denarius* eú rán, a tiiniireló lón an we tánipiin kreip. 3 A pwal feiló ina epwe lón aúlúngátin kulók,* a kúna ekkóch mi úkkúútá lón ewe leenien amémé nge ese wor ar angang, 4 me a ereni chókkana, ‘Pwal ámi oupwe feiló lón ewe tánipiin kreip, me úpwe liiwinikemi wóón minne mi pwúng.’ 5 Iwe, ra feiló. Nge ina epwe lón awonuen kulók* me etiuen kulók,* a feilósefál me pwal féri ussun chék. 6 Iwe, ina epwe lón ewe engol me áeúin kulók,* a feiló me kúna ekkóch iir mi úkkúútá, me a ereniir, ‘Pwata oua chék úkkúútá ikeei unusen rán ouse angang?’ 7 Ra pélúweni, ‘Pún ese wor emén a méénikem.’ A ereniir, ‘Oupwe pwal feiló lón ewe tánipiin kreip.’
8 “Lupwen a tori lekuniol, ewe mastaan ewe tánipiin kreip a ereni néún we chón nemeni chón angang, ‘Kopwe kérato ekkewe chón angang me ngeniir liiwiniir, poputá me wóón ekkewe mi kukumwir tori ekkewe mi akkomw.’ 9 Lupwen ra feito ekkewe chón angang mi poputá seni engol me áeúin kulók, emén me emén iir ra angei eféú denarius.* 10 Iwe, lupwen ekkewe mi akkomw ra feito, ra ekieki pwe repwe angei lap seni, nge pwal iir ra angei liiwiniir úkúúkún eféú denarius.* 11 Lupwen ra angei, ra poputá le ngúnúngúnúngawa ewe mastaan imw 12 me apasa, ‘Ekkeei mwán mi kukumwir ra angang lón eú chék awa, nge ka alélléér ngenikem ám kewe mi angang weires unusen rán fán pwichikkaren akkar!’ 13 Nge a pélúweni ngeni emén leir, ‘Pwii, úse féri och mi mwáál ngonuk. Esap pwe ka tipeeú ngeniei ren eféú denarius?* 14 Kopwe angei liiwinum me feiló. Úa mochen ngeni ekkeei mi kukumwir ussun chék met úa ngonuk. 15 Ese wor ái pwúúng le féri minne úa mochen féri ngeni pwisin mettóchui? Are mesom a lólówó* pokiten úa múrinné?’* 16 Iei ussun, ekkewe mi kukumwir repwe akkomw, nge ekkewe mi akkomw repwe kukumwir.”
17 Lupwen Jises a feitá ngeni Jerusalem, a emmwenaaló ekkewe 12 chón káé seni ekkewe aramas me ereniir me wóón ewe al, 18 “Nengeni! Sipwe feitá ngeni Jerusalem, me emén epwe waalong lepéún ekkewe souasor mi lap me ekkewe soumak ewe Néún aramas. Repwe apwúngú i ngeni máló 19 me waalong lepéún aramasen ekkewe ekkóch mwú ar repwe turunufasa me awata me chúfélúetá wóón efóch iráán ninni, iwe lón ewe aúlúngátin rán epwe manawetá.”
20 Mwirin, pwúlúwen Sepeti we a feito ren fán néún kewe rúúemén, a fotopwásuk me tingorei och mettóch. 21 A ereni: “Met ka mochen?” Neminna a pélúweni: “Kopwe apasa pwe nei keei rúúemén repwe móót lón Mwuum, emén peliefichum me emén pelieméngum.” 22 Jises a pélúweni: “Ámi ouse silei met oua tingor. Oua tongeni ún seni ewe kap úpwele únúmi?” Ra ereni: “Áúa tongeni.” 23 A ereniir: “Oupwe wesewesen ún seni ái kap, nge ren ámi oupwe mómmóót emén peliefichi me emén pelieméngui, esap ái pwe úpwe fangoló, nge Semei we epwe filaatá. I epwe fili ié epwe móót wóón ekkeei leenien móót.”
24 Lupwen ekkewe engol ra rong ussun ena, ra song ngeni ekkewe rúúemén pwipwi. 25 Nge Jises a kériireto ren me apasa: “Ámi oua silei pwe sounemenemen ekkewe mwú ra samol wóón aramas me ekkewe aramas mi lap ra onómu aramas fán ar nemenem. 26 Esap iei ussun remi, nge ié a mochen lap me leimi, epwe emén néúmi chón angang, 27 me ié a mochen epwe akkomw me leimi, epwe emén néúmi slave. 28 Ussun chék án ewe Néún aramas feito, esap fán iten án aramas repwe angang ngeni, nge fán iten an epwe angang ngeniir me fangoló manawan ussun eú méén kepich* fán iten* chómmóng.”
29 Lupwen ra towu seni Jeriko, eú mwichemmóngun aramas a tapweló mwirin. 30 Me nengeni! rúúemén mwán mi chuun mi mómmóót ppen ewe al ra rong pwe Jises a fetáleló me ra léúwommóng le apasa: “Samol, Néún Tafit, kopwe úméúméch ngenikem!” 31 Nge ekkewe aramas ra apwúngúúr me ereniir ar repwe fanafaneló, nge ra fen alapaaló ar púppúchér me apasa: “Samol, Néún Tafit, kopwe úméúméch ngenikem!” 32 Iwe, Jises a kaúló, kériir, me apasa: “Met oua mochen ái úpwe féri fán itemi?” 33 Ra ereni: “Samol kopwe ánennelóói mesem.” 34 A chúng letipen Jises, ina minne a attapa meser, iwe mwittir chék ra kúna mwer, me ra tapweló mwirin.