Ewe Oruuen Taropwe Ngeni Chón Korint
9 Iwe, ren ewe angang fán iten ekkewe chón pin, ese pwal lamot ái úpwe mak ngenikemi ussun, 2 pún úa silei ussun ámi mochen álillis. Ngang úa sikásinikemi ngeni chón Masetonia, úa ereniir pwe lón unusen eú ier, ámi mi nóm lón Akaia oua fen mmólnetá le álillis. Pokiten ámi fókkun mochen álillis, iwe chómmóng me leir ra pwal mochen álillis. 3 Nge úpwe tiinaaló pwiich keei pwe epwe leteló pwe ám sikásinikemi lón ei mettóch esap chék kapas péén me oupwe pwal fókkun mmólnetá, ussun met úa fen apasa ussumi. 4 Nge iká ekkewe chón Masetonia repwe fitieiló me kúna pwe ouse mmólnetá, ám áúpwe sáw ren ám lúkúlúk wóómi, me ámi oupwe pwal sáw. 5 Iei minne, úa ekieki pwe mi lamot ái úpwe pesei pwiich keei ar repwe akkomwoló mwei me angei ewe liffang oua fen pwon pwe oupwe ammólnatá. Iwe iká áúa war, ei liffang epwe fen mmólnetá me epwe pwá pwe oua awora seni ámi fangafangéch nge esap pokiten áúa oumwesikemi.
6 Iei weween aloi ei: Ié a amwora chókúkkún epwe pwal kini chókúkkún, me ié a amwora chómmóng epwe pwal kini chómmóng. 7 Emén me emén epwe féri ussun met a fen filaatá seni lón letipan, esap fán osenimu are echchimw, pún Kot a tongei emén mi fang fán pwapwa.
8 Pwal och, a wor án Kot manaman le pwáári ngenikemi watteen kirekiréch mi somwoló pwe ousap fókkun osupwangen och mettóch, nge epwe fen somwoló meinisin met mi lamot ngenikemi lón ámi féffér múrinné. 9 (Iei met a makketiw: “I a fangoló chómmóng liffang. I a fang ngeni chón wéúngaw. An pwúng a nónnóm tori feilfeiló.” 10 Iwe, ewe Emén mi awora chómmóng féún pwikil ngeni ewe chón amwora me awora pilawa fán iten mwéngé epwe awora me alapaaló ekkewe féún pwikil pwe oupwe amwora me epwe watteeló uwaan ámi pwúng.) 11 Kot a efeiéchúkemi lón mettóch meinisin pwe oupwe tongeni fang chómmóng, me aramas repwe kilisou ngeni Kot pokiten ámi liffang, ewe áúpwe ngeni ekkewe ekkóch. 12 Pún ei angangen álillis fán iten feiéchún ekkewe ekkóch, esap chék álisi osupwangen ekkewe chón pin nge pwal fán iten án chómmóng aramas repwe kilisou ngeni Kot ren. 13 Ren ámi awora ei liffang, oua pwáraatá met sókkun aramas ámi, iwe repwe mwareiti Kot pokiten ámi féffér a tipeeú ngeni ewe kapas allim oua esilefeili ussun Kraist, me oua fangafangéch ngeniir me meinisin aramas. 14 Pwal och, repwe tongekemi me iótek ngeni Kot fán itemi pokiten án Kot kirekiréch mi somwoló mi nónnóm wóómi.
15 Kilisou ngeni Kot ren an we liffang ese kamé, ewe mi fókkun múrinné sise tufichin áweweei.