Me ren Mattu

15 Mwirin, ekkewe Farisi me soumak seni Jerusalem ra feito ren Jises me apasa: 2 “Pwata noum kewe chón káé ra puratiw éérenien ekkewe aramasen lóóm? Áwewe chék, rese télú* péúr mwen repwele mwéngé.”

3 Lón an pélúweniir, a ereniir: “Pwata oua puratiw allúkún Kot pokiten ámi kewe ééreni? 4 Áwewe chék, Kot a apasa: ‘Asamolu semom me inom,’ me, ‘Ié a eáni kapas mi ngaw ngeni seman are inan, epwe ninniiló.’ 5 Nge ámi oua apasa, ‘Ié a apasa ngeni seman are inan: “Met a nóm rei mi tongeni álisuk, a fen káimuuló fán iten eú asor ngeni Kot,” 6 ese pwal lamot an epwe álisi seman.’ Iwe oua féri pwe án Kot kapas a lamotongaw pokiten ámi kewe ééreni. 7 Ámi chón likótuputup, a fich met Aisea a osuni ussumi, lupwen a apasa: 8 ‘Ekkeei aramas ra asamoluei ren túnawer nge letiper a towaw seniei. 9 Ese wor lamoten ar fel ngeniei, pún ra asukula kapasen aramas ussun itá nge ái kapas.’ ” 10 Ren ena, a kérato ekkewe aramas me ereniir: “Oupwe aúseling me weweiti weween: 11 Met a tolong lón awen aramas, esap ina met a elimengawa i, nge met mi towu seni lón awan, ina met a elimengawa i.”

12 Mwirin ekkewe chón káé ra feito me ereni: “En mi silei pwe ekkewe Farisi ra chepetek ren ar rong met ka apasa?” 13 Lón an pélúweni, a apasa: “Iteiten irá Semei we lón láng ese fótuki, epwe úttútá. 14 Oupwe likitiireló. Iir chón emmwen mi chuun. Iká emén mi chuun a emmweni emén mi chuun, iir me rúúemén repwe turulong lón eú pwaang.” 15 Piter a pélúweni: “Kopwe ámecheresi ngenikem óm na kapas áwewe.” 16 Ren ei a apasa: “Pwal ámi, ouse mwo weweiti? 17 Ouse silei pwe met chék a tolong lón aw a feiló lón nuuk me towu lón ewe suwer? 18 Iwe nge, met chék a towu seni lón aw a feito seni ewe letip, me ekkena mettóch ra elimengawa emén aramas. 19 Pún áwewe chék, seni lón ewe letip a feito ekiek mi fókkun ngaw: nieló aramas, lisowu lúkún pwúpwúlú, tipisin lisowumwáál,* solá, kapas chofona, kapasen turunufas. 20 Ikkeei ekkewe mettóch ra elimengawa emén aramas, nge án emén epwe mwéngé wóón péún ese téttél* ese elimengawa i.”

21 Jises a ló seni ikena. Iei a feiló lón kinikinin Tair me Siton. 22 Me nengeni! emén fin Finisia seni ena kinikin a feito me kechiw ngeni: “Samol, Néún Tafit, kopwe úméúméch ngeniei. Nei we nengngin a fókkun riáfféú pokiten timon a wááni.” 23 Nge ese apasa eú kapas le pélúweni neminna. Ina minne, néún kewe chón káé ra feito me poputá le ereni: “Kopwe asúoló, pún a chék kechiweto me mwirich.” 24 A pélúweni: “Úse tiitiito ngeni emén, lúkún chék ekkewe siip mi mwálecheló lón ewe mwúún Israel.” 25 Nge ewe fefin a feito me asamolu* i, a apasa: “Samol, álisiei!” 26 Lón an pélúweni a apasa: “Ese pwúng án emén epwe angei enen ekkewe semirit pilawa me manei ngeni ekkewe kúkkún kolak.” 27 Neminna a apasa: “Ewer, Samol, nge ren enletin, ekkewe kúkkún kolak ra áni met mi mworetiw seni án néúr we masta cheepel.” 28 Mwirin Jises a ereni neminna: “Fefin, a ifa me watteen óm lúkú! Epwe fis ngonuk minne ka mochen.” Me néún we nengngin a chikaretá lón ena chék kulók.

29 Jises a ló seni ikena ie, mwirin a ló ngeni arapakkan ewe Setin Kalili, iwe mwirin an feitá wóón ewe chuuk, a móót ikena ie. 30 Mwirin, eú mwichemmóngun aramas a etto ren me uweato ekkewe aramas mi pechemá, ter, chuun, awemwéch, me pwal chómmóng mi semmwen, me ra onómuur únúkkún pechen me i a echikareretá. 31 Iwe, ekkewe aramas ra mwaar ren ar kúna ekkewe mi awemwéch ra kapas, me ekkewe mi ter ra chikar, me ekkewe mi pechemá ra fetál, me ekkewe mi chuun ra kúner, me ra mwareiti ewe Koten Israel.

32 Nge Jises a kérato néún kewe chón káé me erá: “Úa tongei ekkeei aramas, pún ra fen nónnóm rei ren úlúngát rán me ese chúen wor met repwe áni. Úse mochen tiiniireló fán ar echik* pún eli ra tongeni mammasaroch me wóón ewe al.” 33 Iwe nge, ekkewe chón káé ra ereni: “Ia me lón ei leeniapé áúpwe ló kút pilawa ie epwe naf ngeni ei mwichemmóngun aramas ar repwe mwéngé me métúló?” 34 Iwe, Jises a ereniir: “Fiteféú pilawa mi wor remi?” Ra erá: “Fúúféú me fitemén kúkkún iik.” 35 Iwe, mwirin an ereni ekkewe aramas ar repwe móttiw wóón ewe pwúl, 36 a angei ekkewe fúúféú pilawa me iik, me mwirin an iótekin kilisou, a kiniiretiw me poputá le ngeni néún kewe chón káé, me ekkewe chón káé ra ngeni ekkewe aramas. 37 Me iir meinisin ra mwéngé me métúló, me ra ionifengeni ekkewe lusun, fisu watteen chúúk mi ur. 38 Chókkana mi mwéngé, ina epwe iir 4,000 mwán me lúkún fefin me semirit. 39 Iwe, mwirin an tiinaaló ekkewe aramas, a tétá wóón ewe waa me ló ngeni ewe leeni itan Makatan.