Eú Pwáraatá Ngeni Jon

14 Iwe, úa kúna ewe Laam a úkkúútá wóón ewe Chuuk Sion, nge 144,000 aramas ra eti i me a mak itan me iten Seman we wóón chamwer. 2 Úa rong eú méngúngú seni láng ussun úngúúngún chómmóng konik me pwal ussun úngúúngún chopulap mi léúwommóng. Ena méngúngú úa rong, a ussun chék ngingiin ekkewe soukél atun ra kél fiti néúr kewe kitar.* 3 Me ra kélú eché kél ussun eché mineféén kél mwen ewe leenien móótun king me ekkewe fémén ménúmanaw me ekkewe souakkomw.* Ese wor emén a tongeni káé ena kél me lúkún ekkewe 144,000, iir kewe ra kaméto seni fénúfan. 4 Ikkeei iir ekkewe rese elimengawa pwisin iir ren fefin, ren enletin, iir mi limeliméch. Ikkeei iir ekkewe ra tattapweló mwirin ewe Laam ekis meinisin ia a feiló ie. Iir chókkewe mi kaméto me lein aramas pwe repwe ussun mwenuwa mi asor ngeni Kot me ewe Laam, 5 me rese eáni kapasen likótuputup, ese wor limengawer.

6 Iwe, úa kúna pwal emén chónláng mi ákkáás fán láng, me a uwei ewe kapas allim esemuch pwe epwe esilei ngeni chókkewe mi nónnóm wóón fénúfan, ngeni meinisin mwú, einang, kapas, me aramas. 7 A apasa fán mwelian mi léúwommóng: “Oupwe niwokkusiti Kot me elingaaló i, pún a war an we fansoun kapwúng. Oupwe fel ngeni ewe Emén mi féri láng me fénúfan me mataw me ekkewe puwachen konik.”

8 Mwirin, ewe pwal arúúeménún chónláng a apasa: “Neminnewe a turutiw! Papilon mi Lapalap a turutiw, i ewe mi efisi án aramasen ekkewe mwú meinisin repwe ún únúman we wain mi efisi ar repwe fókkun mochen féri tipisin lisowumwáál!”*

9 Mwirin, ewe aúlúménún chónláng mi tapw mwiriir a apasa fán mwelian mi léúwommóng: “Iká emén a fel ngeni ewe manmwacho me uluulun we me angei eú esissil wóón chamwan are wóón péún, 10 epwe pwal ún án Kot wain, ina an we song mi lap. Ina ewe wain ese wor nofitin, ewe Kot epwe ninaalong lón an we kapen song. Epwe pwal kúna riáfféú ren ekkei me primiston mwen mesen ekkewe chónláng mi pin me mwen mesen ewe Laam. 11 Me étúétún ar we riáfféú epwe étútá tori feilfeiló chék, me chókkewe mi fel ngeni ewe manmwacho me uluulun we me angei esissillen itan we, resap asésé lerán me lepwin. 12 Ina popun, a lamot ngeni ekkewe chón pin ar repwe likiitú, iir kewe mi álleasochisi án Kot kewe allúk me kémwéchúnúk án Jises lúkú.”

13 Iwe úa rong eú méngúngú seni láng a apasa, “Kopwe makkeetiw ekkeei kapas: Seni iei feiló, néún ewe Samol kewe chón káé* mi máló repwe pwapwa. Ewer, ewe ngún mi fel a apasa, repwe asésé seni ar kewe angang, pún ekkewe mettóch ra féri repwe etiir.”

14 Iwe, úa kúna eú kuchu mi pwechepwech, me a wor emén mi ussun néún aramas a móót wóón ena kuchu. A wor epa mwárin king seni kolt wóón mékúran me a wor efóch kama* mi kken lón péún.

15 Pwal emén chónláng a towu seni lón ewe imwenfel, me a léúwommóng le kékkéló ren ewe mi mómmóót wóón ewe kuchu: “Kene néúnéú noum na kama me kinikin, pún a tori ewe fansoun kinikin, uwaan rásin fénúfan a nnupuló.” 16 Iwe, ewe emén mi mómmóót wóón ewe kuchu a eitiewu néún we kama wóón fénúfan me kini uwaan rásin fénúfan.

17 Pwal emén chónláng a towu seni ewe imwenfel mi nóm láng, me a pwal wor efóch néún kama mi kken.

18 Iwe, pwal emén chónláng a towu seni ewe róóng, me a wor an nemenem wóón ewe ekkei. A léúwommóng le kékkéló ren ewe emén mi wor néún kama mi kken, a apasa: “Kene néúnéú noum na kama mi kken me ionfengeni ekkewe umwun kreip wóón fénúfan pún ra nnupuló.” 19 Ewe chónláng a eitiewu néún we kama ngeni fénúfan me ionifengeni ekkewe kreip wóón fénúfan me otururelong lón ewe watteen leenien kata féún kreip, ewe mi wewe ngeni án Kot song. 20 Ekkewe oris ra atatakkisi ekkewe féún kreip lúkún ewe telinimw, me ewe chcha mi puwu seni ena leeni a lélétá tori chamwen ekkewe oris, me a pupuuló arapakkan 200 mwail.*