Ewe Áeúin Taropwe Ngeni Chón Korint
15 Ámi pwii kana, iei úpwe áchchema ngenikemi ewe kapas allim úa fen afalafala ngenikemi, ewe oua fen pwal etiwa, me ewe oua fen útá núkúchar ren. 2 Iká oupwe sópweeló le akkamwéchú ámi lúkú ei kapas allim úa afalafala ngenikemi, ámi oupwe kúna manaw. Nge iká ouse, iwe epwe lamotmwáál ámi oupwe lúkú.
3 Pún me lein ekkewe mettóch úa akkomw ngenikemi ina met úa pwal angei, pwe Kraist a máló fán iten ach kewe tipis ussun met a mak lón ekkewe Taropwe mi Pin, 4 me i a peiás, me a manawetá lón ewe aúlúngátin rán ussun met a mak lón ekkewe Taropwe mi Pin, 5 me i a pwá ngeni Kefas,* mwirin ngeni ekkewe Engol me Rúúemén. 6 Mwirin ena, a pwá ngeni lap seni 500 pwiich kewe fán eú chék, chómmóng me leir ra chúen nóm rech, nge ekkóch ra fen máló.* 7 Mwirin ena a pwá ngeni Jemes, mwirin, ngeni meinisin ekkewe aposel. 8 Nge amuchúlóón, a pwal pwá ngeniei, ngang ussun emén ménúkol mi uputiw nge esaamwo tori maraman.
9 Pún ngang kisifóchófóch me lein ekkewe aposel, me ese fichiitiei ái úpwe iteni emén aposel, pún úa eriáfféwúmwááli ewe mwichefelin Kot. 10 Nge pokiten án Kot kirekiréch mi somwoló ngeniei, úa tufichin féri ei angang. Me ewe kirekiréch mi somwoló a pwáári ngeniei, a álilliséch ngeniei pwe úa angang weires lap seniir meinisin. Nge esap seni pwisin ái tufich, pwe seni án Kot we kirekiréch mi somwoló mi nóm rei. 11 Iei minne, ese lifilifil iká ngang are iir, nge iei napanapen ám afalafal, me iei napanapen ámi lúkú.
12 Iwe, iká a fen afalafalfeil pwe Kraist a fen manawetá seni máló, pwata ekkóch me leimi oua apasa pwe ese wor manawsefálin ekkewe mi máló? 13 Ren enletin, iká ekkewe mi máló resap manawsefál, iwe, Kraist ese pwal manawsefál. 14 Nge iká Kraist ese manawsefál, ám angangen afalafal a lamotmwáál, me ámi lúkú a pwal lamotmwáál. 15 Pwal och, iká ekkewe mi máló resap wesewesen manawsefálitá, Kot ese pwal amanawasefáli ewe Kraist, iwe, ussun nge áúa chofona ussun Kot atun áúa apasa pwe i a amanawasefáli ewe Kraist. 16 Pún iká ekkewe mi máló resap manawsefál, iwe, Kraist esap pwal manawsefál. 17 Pwal och, iká Kraist ese manawsefál, ámi lúkú a lamotmwáál. Iwe, oua chék nónnóm lón ámi tipis. 18 Iwe, pwal ekkewe mi máló* iir néún Kraist kewe chón káé, repwe péútmwááliló. 19 Iká ach ápilúkúlúk lón Kraist fán iten chék ei manaw sia manaw lón iei, sia attong lap seni aramas meinisin.
20 Nge iei Kraist a fen manawsefál seni máló, i ewe mwenuwaan chókkewe ra fen máló.* 21 Pún ussun chék án máló feito seni emén mwán, manawsefálin ekkewe mi máló a pwal feito seni emén mwán. 22 Meinisin ra máló pokiten Atam, iwe pwal meinisin repwe manawsefál pokiten Kraist. 23 Nge en me lón pwisin tettelin: Kraist ewe mwenuwa, mwirin chókkewe iir néún ewe Kraist lón fansoun an nónnóm. 24 Iwe, lesópwólóón, i epwe eliwini ewe Mwú ngeni Kot, Seman we. Epwe fis ei mwirin an a arosaaló meinisin ekkewe mwú me chókkewe mi wor ar nemenem. 25 Pún i epwe nemenem ussun king tori án Kot epwe isettiw fán pechen meinisin chón oputa i. 26 Iwe, i epwe amóeló ewe amuchúlóón chón oput, máló. 27 Pún Kot “a fen isettiw mettóch meinisin fán pechen Kraist.” Nge ei itiitin kapas ‘Kot a isettiw mettóch meinisin fán Kraist,’ a affata pwe ewe Emén mi isettiw mettóch meinisin fán nemenian ese kapachelong. 28 Nge mwirin án Kot onómu mettóch meinisin fán nemenien néún we, ena Naw epwe pwal onómu pwisin i fán Kot, ewe Emén mi onómu mettóch meinisin fán nemenien ena Naw, pwe Kot epwe mettóch meinisin ngeni aramas meinisin.
29 Iká ekkewe mi máló resap manawetá, iwe ifa ussun ren chókkewe mi eáni ewe papatais ngeni máló? Iká ekkewe mi máló resap manawetá, iwe pwata ra eáni ena sókkun papatais? 30 Pwata sia pwal nóm lón efeiengaw iteiten awa?* 31 Iteiten rán úa sereni feiengawen máló. Mi enlet ena ussun chék ái enletin pwapwa remi pwii kana lón Kraist Jises ach Samol. 32 Iká úa fiu ngeni ekkewe manmwacho lón Efisus ussun met ekkewe ekkóch ra pwal féri, epwe met lamotan ngeniei? Iká ekkewe mi máló resap manawetá, iwe “ousipwe mwéngé me ún, pún lesor sipwe máló.” 33 Ousap tupuló. Chiechi mi ngaw a angawaaló féffér múrinné. 34 Oupwe miritiló lón minne mi pwúng me ousap éérenaaló le féfféri tipis, pokiten ekkóch me leimi ese fókkun wor remi ewe enletin sile ussun Kot. Úa apasa ei pwe oupwe meefi sáw ren.
35 Iwe nge, emén epwe apasa: “Ifa ussun ekkewe mi máló repwe manawetá? Ewer, met sókkun inis repwe manawetá lón?” 36 En emén mi umwes! Minne ka fótukatiw esap manaw iká ese akkomw máló. 37 Kese fótuki met a fen mááritá, nge ka fótuki féún pwikil ese lifilifil iká pwikilin wiich are pwal ekkóch sókkun pwikil. 38 Nge Kot a ngeni eú inis ussun chék met i a tipeni, me epwe ngeni eféú me eféú ekkewe pwikil en me pwisin inisin. 39 Esap meinisin futuk a lélléfengen futuker, mi wor eú ren aramas, mi pwal wor eú futuk ren ekkewe man fetál, mi wor pwal eú ren ekkewe machchang, me pwal eú ren iik. 40 Me a wor inis minen láng me inis minen fénúfan, nge lingen ewe inis minen láng eú sókkun, me lingen ewe inis minen fénúfan pwal eú sókkun. 41 Lingen ewe akkar eú sókkun, me lingen ewe maram pwal eú sókkun, me lingen ekkewe fúú pwal eú sókkun. Ren enletin, eféú me eféú fúú en me wóón lingan.
42 Iwe, epwe iei ussun ren ekkewe repwe manawsefál. Ewe inis mi máló a ngawoló, nge ewe inis mi manawetá esap tongeni ngawoló. 43 A fótetiw lón an ese wor súfélún, a manawetá lón an ling. A fótetiw lón an apwangapwang, a manawetá lón an manaman. 44 A fótetiw lón eú inisin aramas, a manawetá lón eú inisin ngún. Iká mi wor inisin aramas, mi pwal wor eú inisin ngún. 45 A makketiw: “Ewe áeménún aramas, Atam, a wiliiti emén mi manaw.” Ewe amuchúlóón Atam, a wiliiti emén ngún mi awora manaw. 46 Minne mi akkomw esap eú inisin ngún, nge eú inisin futuk. Ewe inisin ngún a tapwoto mwirin. 47 Ewe áeménún aramas i seni fénúfan me a ffér seni pwúl. Ewe arúúeménún aramas i seni láng. 48 Chókkewe Kot a fériir seni pwúl ra chék ussun ewe emén Kot a féri seni pwúl. Me chókkewe mi nóm lón láng ra pwal ussun chék ewe emén mi feito seni láng. 49 Iwe, ussun chék ach sia napanapeni napanapen ewe emén mi ffér seni pwúl, sipwe pwal napanapeni napanapen ewe emén seni láng.
50 Nge ámi pwii kana, úa erenikemi ei, pwe futuk me chcha resap tongeni álemwiri án Kot we Mwú, me minne mi ngawoló esap tongeni álemwiri minne esap ngawoló. 51 Nengeni! Úa erenikemi eú monomonun Kot: Kich meinisin sisap máló,* nge kich meinisin sipwe siwil 52 lón ekis chék fansoun, lón eú ommorupen maas. Epwe fis ei, atun ewe sáingoon rappwa. Atun a ttik ewe rappwa me ekkewe mi máló ra manawetá, repwe inisini eú inis esap ngawoló, me kich sipwe siwil. 53 Ewe emén mi ngawoló a siwil ngeni emén esap ngawoló, me ewe emén mi tongeni máló, a siwil ngeni emén esap tongeni máló. 54 Nge lupwen ewe mi ngawoló a siwil ngeni ewe esap ngawoló me ewe mi tongeni máló a siwil ngeni ewe esap tongeni máló, iwe epwele pwénúetá ei kapas mi makketiw: “Máló a móróló feilfeiló chék.” 55 “Máló, ifa winnom? Máló, ifa máchewom?” 56 Ewe máchew mi efisi máló ina tipis, me tipis a angei an manaman seni ewe Allúk.* 57 Nge kilisou ngeni Kot, pún i a ngenikich ach win me ren ach Samol Jises Kraist!
58 Ina minne, ámi pwii kana mi áchengicheng, oupwe núkúchar, ousap mwékútúkút. Fansoun meinisin oupwe achómmónga minne oua féri lón angangen ewe Samol, pún oua silei pwe esap lamotmwáál ámi angang lón ewe Samol.