Ewe Oruuen Taropwe Ngeni Chón Korint
10 Úa fókkun mochen ámi oupwe álleasochisi ekkewe mettóch úa erenikemi. Ngang úa áppirú án Kraist tipetekison me kirekiréch lón ái kapas ngenikemi. Iwe, a wor ekkóch me leimi ra erá pwe úa apwangapwang atun úa nóm leimi, nge atun úa mak ngenikemi úa pwora. 2 Úa áneán pwe atun úpwe war, chókkewe mi ekieki pwe áúa feffetál lón pekin futuk repwele fen ekkesiwil, pwe úsapw apwúngúúr fán péchékkúl. 3 Pún inaamwo iká áúa feffetál lón pekin futuk, nge áúse maun me ren met napanapem lón ewe futuk. 4 Pún ám kewe pisekin maun esap pekin futuk, nge ikkena ekkewe pisekin maun mi manaman Kot a fang ngenikem pwe repwe atai ekkewe leeni mi péchékkúl. 5 Pún áúa ataieló ekkewe ekiek me iteiten minen eppet mi eppeti aramas ar repwe silei Kot, me áúa fétekini sókkun ekiek meinisin pwe repwe álleasochisi ewe Kraist. 6 Áúa pwal mmólnetá le apwúngú iteiten álleasolap mwirin ámi oua pwáraatá pwe oua unusen álleasochis.
7 Ámi oua apwúngú mettóch me ren napanaper me lúkún. Iká emén a lúkúlúk wóón pwisin i pwe i néún Kraist chón káé, i epwe ekiekisefáli ei mettóch: Ám pwal néún Kraist chón káé, ussun chék i. 8 Pún ikáámwo a luló ái sikásini ewe nemenem ewe Samol a ngenikem pwe áúpwe áeá le apéchékkúlakemi nge áúsapw eletipengawakemi, ngang úsapw sáw ren. 9 Pún ngang úse mochen oupwe ekieki pwe úa mochen eniwakemi ren nei kewe taropwe. 10 Pún ra apasa: “Kapasen lón néún kewe taropwe ra péchékkúl me a wor manamanan, nge lupwen a nóm rech a napen apwangapwang me an kapas ra aúcheangaw.” 11 Chókkana mi apasa ena, repwe silei pwe met áúa apasa lón néúm kewe taropwe, ina met áúpwe pwal féri atun áúa nóm. 12 Ám áúse ussun ekkewe mi lamalamtekia, me áúse mochen aléllééi pwisin ám ngeni iir. Ra apwúngú pwisin iir me ren met pwisin iir ra apasa pwe mi múrinné, iwe ren ei, a pwá pwe ese wor ar wewe.
13 Ám áúsapw eingeing wóón met me lúkún ewe angang áúa kewis ngeni pwe áúpwe féri. Áúpwe eingeing wóón ewe angang Kot a ewisa ngenikem, kapachelong ám áúpwe afalafal ngenikemi. 14 Áúse féri och mettóch Kot ese ewisa ngenikem ám áúpwe féri atun áúa feiló remi, nge ám akkomw ewe áúa afalafala ngenikemi ewe kapas allim ussun ewe Kraist. 15 Iwe, áúse eingeing wóón án ekkóch angang me lúkún ewe angang a kewis ngenikem, nge áúa lúkúlúk pwe atun ámi lúkú a lallapoló, iwe ewe angang áúa féri leimi epwe pwal lallapoló. Iwe, áúa pwal tongeni féri chómmóng angang, 16 pwe ewe kapas allim epwe esilefeil tori ekkewe fénú pekilóón leeniemi. Iwe ren ena, áúsapw eingeing wóón met emén a fen féri lón an leenien afalafal. 17 “Nge ewe emén mi eingeing, epwe eingeing wóón Jiowa.”* 18 Pún Jiowa* ewe a filaatá ié epwe ketiw me ren, nge esap ewe emén mi sikásini pwisin i epwe filaatá iká a ketiw.