Me ren Luk
10 Mwirin ekkeei mettóch, ewe Samol a filaatá pwal 70 me a tiiniireló ákkárúúemén pwe repwe akkomwoló mwan ngeni iteiten telinimw me leeni ia pwisin i epwe feiló ie. 2 Mwirin a ereniir: “Ewer, ewe ráás mi watte nge ekkewe chón angang iir mi chókúkkún. Ina minne, oupwe tingormaw ngeni ewe Mastaan ráás an epwe tiinaato chón angangen an we ráás. 3 Feiló! Nengeni! Úa tiinikemiwu ussun chék siip lein ekkewe wolif. 4 Ousap uwou pwotoun moni are pwotoun mwéngé are ipwemi, me ousap kapwong ngeni emén* me wóón ewe al. 5 Ese lifilifil menni imw oupwe tolong lón, oupwe akkomw apasa: ‘Amwo epwe wor kinamwe lón ei imw.’ 6 Nge iká emén mi efich kinamwe* mi nóm ikena, ámi kinamwe epwe nónnóm ren. Nge iká ese wor, epwe liwinitikemi. 7 Iwe, oupwe chék nónnóm lón ena imw, mwéngé me ún ekkewe mettóch ra awora, pún a fichiiti ewe chón angang an epwe angei liwinin. Ousap mwékút seni eú imw ngeni eú imw.
8 “Pwal och, ese lifilifil menni telinimw oupwe tolong lón me ra etiwakemi, oupwe mwéngé met a mmólnetá mwemi 9 me echikara ekkewe mi samaw lón me ereniir: ‘Ewe Mwúún Kot a kkanoto remi.’ 10 Nge ese lifilifil menni telinimw oupwe tolong lón nge rese etiwakemi, feiliwu wóón alelapan we me apasa: 11 ‘Áúa télú pwal mwo ewe súsúún pwúl mi pacheri apachapachem seni lón ámi telinimw. Iwe nge, oupwe silei ei, pwe ewe Mwúún Kot a kkanoto.’ 12 Úa erenikemi pwe kapwúngún Sotom epwe ppán lón ena rán lap seni ena telinimw.
13 “Feiengawom Koresin! Feiengawom Petsaita! Pún iká ekkewe manaman mi fis ngenikemi ra fis lón Tair me Siton, repwele fen chék áier me lóóm ren ar úféúf tuuk me móót lón falangen ekkei. 14 Ina minne, kapwúngún Tair me Siton epwe ppán lón ewe kapwúng lap senikemi. 15 Me en Kaperniom, kopwe tekiatá lón láng? Kopwe feitiw lón Peiás!*
16 “Ié a aúselingakemi a aúselingaei. Me ié a tunakemiiló a pwal tunaeiló. Pwal och, ié a tunaeiló a pwal tunaaló ewe Emén mi tiinieito.”
17 Mwirin ekkewe 70 ra liwinsefál fán pwapwa, me apasa: “Samol, pwal mwo ekkewe timon ra nóm faam ren ám néúnéú itom.” 18 Ren ena a ereniir: “Úa kúna Setan a fen turutiw ussun inefi seni láng. 19 Nengeni! Úa fen ngenikemi nemenem le puri fán pechemi ekkewe serepenit me scorpion, me wóón meinisin manamanen ewe chón oput, me ese fókkun wor epwe efeiengawakemi. 20 Iwe nge, ousap pwapwa pokiten ekkewe ngún mi fókkun ngaw ra álleasochisikemi, nge oupwe pwapwa pún itemi kewe ra fen makketiw lón láng.” 21 Lón ena kulók, Kot a fang ngeni Jises ewe ngún mi fel, ina minne a fókkun pwapwa me apasa: “Semei, ewe Samolun láng me fénúfan, úa mwareituk mwen mesen aramas pokiten ka opaaéchúoló ekkeei mettóch seni ekkewe mi tipáchem me silelap, nge pwáriireló ngeni ekkewe semirit. Ewer Semei, pún iei met ka tipeeú ngeni. 22 Semei a fen ngeniei mettóch meinisin, me ese wor emén a silei ié ewe Naw pwe ewe chék Sam, me ese wor emén a silei ié ewe Sam pwe ewe chék Naw me ié ewe Naw a mochen pwáár ngeni.”
23 Ren ena, a kul ngeni ekkewe chón káé me ereniir nge iir chék: “Ra pwapwa ekkewe maas mi kúna ekkewe mettóch oua kúna. 24 Pún úa erenikemi, chómmóng soufós me king ra tipeni le kúna ekkewe mettóch oua nennengeni nge rese kúner, me rong ekkewe mettóch oua rongorong nge rese rong.”
25 Iwe nengeni! emén mwán mi silefichi ewe Allúk a útá pwe epwe sótuni i me a apasa: “Sense, met a lamot úpwe féri pwe úpwe álemwiri manaw esemuch?” 26 A ereni: “Met a makketiw lón ewe Allúk? En mi weweiti met ka álleani?” 27 Lón an pélúweni a erá: “ ‘Kopwe tongei Jiowa* óm Kot ren unusen letipom me ren unusen manawom me ren unusen péchékkúlom me ren unusen ekiekum’ me ‘chón órum ussun óm tongei pwisin en.’ ” 28 A ereni: “Mi pwúng óm pélúweni, sópweeló le féri ei me kopwe kúna manaw.”
29 Nge ewe mwán a mochen ánneta pwe i emén mi pwúng, iwe, a ereni Jises: “Ié wesewesen chón órui?” 30 Lón án Jises pélúweni a erá: “Emén mwán a feitiw seni Jerusalem ngeni Jeriko me a sereni ekkewe chón solá, iir kewe ra angei seni pisekin meinisin, awata i me feiló, ra likitaaló i lón an arap ngeni epwele máló. 31 Iwe, a sereni án emén souasor a feitiw wóón ena al, nge atun a kúna i, a pwere seni ren an fetál ewe epek. 32 Pwal ina ussun ren emén chón Lifai, lupwen a tori ena leeni me kúna i, a pwere seni ren an fetál ewe epek. 33 Nge emén chón Sameria a fetál wóón ena al me seretá wóón, iwe atun a kúna i, a mwékút letipan ren an tongei. 34 Iwe, a feiló ren me finiti kinásan kewe, a ninatiw lépwuk* me wain wóór. Mwirin a ekietá wóón néún we man me uwealó ngeni eú imw* me túmúnú i. 35 Sorotá, a uwawu rúúeféú denarii* a ngeni ewe chón túmún, me erá: ‘Kopwe túmúnú i, me met ka néúnéú me lúkún ei, úpwapw méén ngonuk atun úa liwin.’ 36 Ié me lein ekkeei úlúmén me reom a féraaló pwe chón órun ewe mwán mi feiengaw ren ekkewe chón solá?” 37 A apasa: “Ewe emén mi pwáári úméúméch ngeni átewe.” Mwirin Jises a ereni: “Kopwe feiló me pwal féri ina ussun.”
38 Atun ra feiló, a tolong lón eú sóópw. Emén fefin ikena itan Marta a etiwa i an epwe waséla lón imwan. 39 A pwal wor emén pwiin itan Meri, ewe a móót únúkkún pechen ewe Samol me akkaúseling ngeni met i a apasa.* 40 Nge Marta a tánecheló ren an féri chómmóng angang. Iei minne, a etto ren me apasa: “Samol, kese pwal ekieki án pwii na likitieiló ái úpwe áláemén le túmúnú ekkewe mettóch? Kopwe ereni pwe epwe etto me álisiei.” 41 Lón án ewe Samol pélúweni, a ereni: “Marta, Marta, en ka aúrek me osukosuk ren chómmóng mettóch. 42 Nge fitu chék mettóch a lamot, are fen eú chék. Nge ren Meri, i a filaatá ewe kinikin mi múrinné,* me emén ese tongeni angei seni.”