Me ren Luk
17 Mwirin, a ereni néún kewe chón káé: “Epwe chék ppiitá mettóch epwe efisi án ekkewe ekkóch repwe chepetek. Nge riáfféú ngeni ewe emén mi efisi ena! 2 Epwe fen múrinné ngeni i iká eféú féúmmóngun faw* epwe féféétá wóón úwan me kóturutiw lemataw lap seni an epwe áchepeteki emén me lein ekkeei kúkkún. 3 Oupwe pwisin túmúnúkemi. Iká pwiium a féri tipis, apwúngú i, me iká a áier, omusaaló tipisin. 4 Ikáámwo epwe tipis ngonuk fán fisu lón eú rán me liwinituk fán fisu me apasa, ‘Úa áier,’ kopwe omusaaló tipisin.”
5 Iwe, ekkewe aposel ra ereni ewe Samol: “Kopwe álisikem pwe epwe lapóló ám lúkú.” 6 Mwirin ewe Samol a apasa: “Iká mi wor ámi lúkú lélléén eféú féúkúkkúnún pwikil,* oua tongeni ereni ei irá,* ‘Kopwe wiiketá me fótukuketiw lón ewe mataw!’ iwe, epwe álleasochisikemi.
7 “Ié leimi a wor emén néún slave mi ttu pwúl are túmún siip epwe ereni i atun a waroto seni ewe tánipi, ‘Mwittir feito ikeei me mwéngé ren ei cheepel’? 8 Esap pwe epwe fen ereni, ‘Kopwe ammólnatá enei mwéngéén lekuniol, me úféúfolong maikake me angang ngeniei tori ái wes le mwéngé me ún, mwirin ka tongeni mwéngé me ún’? 9 I epwe itá meefi kilisou ngeni ewe slave pokiten a féri ekkewe mettóch mi kewis ngeni? Ái lúkú aapw. 10 Pwal ina chék ussun, lupwen oua áwesi meinisin ekkewe mettóch mi kewis ngenikemi, oupwe apasa: ‘Ám chón angang mi lamotongaw. Met áúa féri, ina úrúrún met áúpwe féri.’ ”
11 Atun an a feiló ngeni Jerusalem, a fetáleló lón kiánin Sameria me Kalili. 12 Atun a tolong lón eú sóópw, engol mwán mi úriir keinepan ra kúna i, nge ra chék útááto me towaw. 13 Me ra léúwommóngetá me apasa: “Jises, Sense, kopwe úméúméch ngenikem!” 14 Lupwen a kúner, a ereniir: “Oupwe feiló me pwáárikemiiló ngeni ekkewe souasor.” Iwe, atun ra feiló, ra liméchúló. 15 Iwe emén me leir, lupwen a kúna pwe a chikar, a liwinsefál, me elingaaló Kot fán léúwan mi léúwommóng. 16 Me a chapetiw órun pechen Jises me kilisou ngeni. Nge pwal och, i emén chón Sameria. 17 Lón án Jises pélúweni, a apasa: “Esap pwe meinisin ekkewe ra liméch iir engol? Iwe, ikkefa iir ekkewe pwal tiwemén? 18 Ese pwal wor emén a liwinsefál an epwe elingaaló Kot me lúkún chék ei mwán seni pwal eú mwú?” 19 Mwirin a ereni: “Kopwe útá me feiló, óm lúkú a echikaróketá.”
20 Lupwen ekkewe Farisi ra eisini ineet ewe Mwúún Kot epwe war, i a pélúweniir: “Ewe Mwúún Kot esap waroto lón eú napanap meinisin repwe mirititi, 21 are aramas repwe apasa, ‘Nengeni ikeei!’ are, ‘Ikenan!’ Pún nengeni! ewe Mwúún Kot a nóm lukanapemi.”*
22 Iwe, a ereni ekkewe chón káé: “Epwe war ekkewe rán lupwen oupwe áneánei ewe fansoun atun ewe Néún aramas epwe nóm remi, nge ena esap fókkun tufich. 23 Me aramas repwe apasa ngenikemi, ‘Nengeni ikenan!’ are, ‘Nengeni ikeei!’ Ousap feiló are tapweló mwiriir. 24 Ussun chék án inefi fiiwu seni eú kinikinin láng ngeni pwal eú kinikinin láng, iwe epwe ina ussun ewe Néún aramas lón ránin we. 25 Iwe nge, akkomw, a lamot epwe kúna chómmóng riáfféú me esap ketiw me ren ei pilóón aramas. 26 Pwal och, ussun chék minne a fis lón ránin Noa we, epwe pwal ina ussun lón ránin ewe Néún aramas: 27 ra mwémmwéngé, ra úkkún, mwán ra pwúpwúlú, fefin ra akkapwúpwúlú tori ewe rán lupwen Noa a tolong lón ewe waimw, me ewe Noter a war me arosereló meinisin. 28 Pwal ina chék ussun minne a fis lón ránin Lot we: ra mwémmwéngé, ra úkkún, ra kakkamé, ra akkamémé, ra fóffót, ra kakkaú imw. 29 Nge lón ewe rán Lot a towu seni Sotom, a púngútiw ekkei me primiston seni láng me arosereló meinisin. 30 Epwe iei ussun lón ena rán lupwen ewe Néún aramas epwe pwáraaló pwisin i ngeni aramas.
31 “Lón ena rán ewe aramas mi nóm asen eú imw nge pisekin ra nóm lón ewe imw, esap tétiw an epwe angeiir, me pwal ina chék ussun, ewe aramas mi nóm lón tánipi esap pwal liwin. 32 Oupwe chechchemeni pwúlúwen Lot we. 33 Ié a kúkkútta an epwe akkamwéchú manawan, epwe péút seni, nge ié a péút seni, epwe manaw. 34 Úa erenikemi, lón ena pwinin rúúemén aramas repwe nóm wóón eú peet, epwe angealó emén nge likitaaló ewe pwal emén. 35 Epwe wor rúúemén fefin repwe úsúús féún wiich wóón eú leenien úsúús, epwe angealó emén nge likitaaló ewe pwal emén.” 36* —— 37 Iwe, lón ar pélúweni ra ereni: “Samol, ia?” A ereniir: “Ia a nóm ie ewe inis, pwal ikena ekkewe ikel repwe kochufengen ie.”