Eú Pwáraatá Ngeni Jon
18 Mwirin ei, úa kúna pwal emén chónláng a feitiw seni láng fán péchékkúlen an nemenem, me a saram fénúfan ren an ling. 2 Me a kékké fán léúwommóng, a apasa: “Neminnewe a turutiw! Papilon mi Lapalap a turutiw, me a wiliiti leenien ekkewe timon me leenien iteiten ngún mi limengaw meinisin, me leenien iteiten machchang mi limengaw me ánnioput! 3 Aramasen ekkewe mwú meinisin ra sakawoló ren únúmen neminna we wain mi efisi an epwe fókkun mochen féri tipisin lisowumwáál,* me ekkewe kingen fénúfan ra lisowumwáál ngeni, nge ekkewe chón amémé me kamé wóón fénúfan ra pisekisekiló pokiten án neminna ese sáw le achómmóngaaló pisekin mi mémmóng.”
4 Me úa rong pwal eú méngúngú seni láng a apasa: “Ámi nei aramas, oupwe towu seni neminnewe, iká ouse mochen fiti lón an kewe tipis, me iká ouse mochen fiti lón an kewe riáfféú. 5 Pún an kewe tipis ra apposetá tori láng, me Kot a chemeni an kewe féffér mi ngaw. 6 Oupwe liwini ngeni neminna liwinin met a féri ngeni ekkewe pwal ekkóch, ewer, oupwe liiwini ngeni fán ruu. Oupwe nofiti ngeni neminna únúman fán ruu lón ewe kap a ffér minen ún lón. 7 Pokiten neminna a fókkun átekiatáái pwisin i me ese meefi sáwin an achómmóngaaló pisekin mi mémmóng, iwe i epwe pwal fókkun kúna riáfféú me letipeta. Pún a kan soun apasa lón letipan: ‘Ngang emén kiwin, esap ngang emén mi máló pwúlúwan, me úsapw fókkun tongeni letipeta.’ 8 Ina minne, an kewe riáfféú epwe tori lón chék eú rán, máló me letipeta me lengita. Me i epwe unusen kareló ren ekkei, pokiten Jiowa* Kot, ewe mi apwúngú i, a péchékkúl.
9 “Iwe, ekkewe kingen fénúfan mi lisowumwáál ngeni neminnewe me fiti i lón an ese meefi sáwin an achómmóngaaló pisekin mi mémmóng, repwe kechiweiti me éfénú pwisin iir fán letipeta atun ra kúna étúétún an kareló. 10 Repwe útááto me towaw pokiten ra niwokkus iká repwe eti neminna lón an riáfféú, me apasa: ‘Attongom, attongom, en ewe telinimw mi lapalap, ewe telinimwen Papilon mi péchékkúl, pokiten kapwúngum a toruk lón eú chék awa!’
11 “Pwal och, ekkewe chón amémé me kamé wóón fénúfan repwe kechiw me letipeta fán itan, pokiten ese chúen wor ié epwe mééni meinisin ar kewe pisekin amémé, 12 kolt, silifer, faw mi aúchea, féún lón pwei, mangaak mi múrinné, mangaak mi forket, mangaak mi mitimit, me mangaak mi parochól. Meinisin pisek mi ffér seni irá mi pwokkus. Sókkopaten mettóch mi ffér seni ngiin áláfán, me irá mi aúchea, piras, mechá, me faw mi énúwénúwekis, 13 pwal sinamon, irá mi pwoéch seni India, appach mi pwokkus, lémmis, mettóch mi pwokkus,* wain, apúra seni féún olif, pilawa mi ámás mi múrinné, wiich, kou, siip, oris, woken, slave, me aramas. 14 Ekkewe mettóch mi múrinné* ka mocheniaitiir rese chúen nóm, me meinisin mwéngé mi anné me mettóch mi ling ra móró sonuk, kosap fókkun chúen kúnasefáliir.
15 “Ekkewe chón amémé ekkena mettóch mi pisekisekiló ren neminnewe, repwe útááto me towaw pún ra niwokkus iká repwe eti lón an riáfféú me repwe kechiw me letipeta, 16 me apasa: ‘Attongan, attongan, ewe telinimw mi lapalap, ewe mi úféúf úf mi múrinné, forket, me parochól, ewe mi foutei ngeni chómmóng kolt, faw aúchea, me féún lón pwei, 17 pún lón eú chék awa, wéún kewe mi chómmóng ra taló!’
“Me meinisin káptin wóón ekkewe siip me meinisin chón sáifetál wóón mataw me sááló, me meinisin chókkewe mi amémé me kamé wóón mataw ra útááto me towaw 18 me kakkatol étúétún ewe ekkei mi kenaaló neminnewe me apasa fán léúwommóng: ‘Menni telinimw epwe ussun ewe telinimw mi lapalap?’ 19 Ra uwoutá pwúl wóón mékúrer me púchér, kechiw, me letipeta, me apasa: ‘Attongan, attongan, ewe telinimw mi lapalap, ewe meinisin chókkewe mi wor waar siip lemataw ra pisekisekiló ren wéún, pún lón eú chék awa neminna a taló!’
20 “Láng, kopwe fókkun pwapwa ren met a fis ngeni neminnewe, pwal ámi ekkewe chón pin me ekkewe aposel me ekkewe soufós, pún Kot a apwúngú neminna fán ásengesimi!”
21 Iwe, emén chónláng mi péchékkúl a ekietá eféú féúmmóngun faw* me manewu lemataw, me apasa: “Epwe iei ussun mwittirin ar repwe manetiw Papilon, ewe telinimw mi lapalap, me esap fókkun chúen pwásefál. 22 Esap chúen wor emén epwe rong léúwen ekkewe chón kél fiti ttikin kitar,* chón ettik nikáttik, fluut, me rappwa lón Papilon. Ese pwal chúen wor emén me ikena epwe eáni och angang, me esap pwal chúen wor emén epwe rong úngúúngún eféú féún kata wiich me ikena. 23 Esap chúen wor saramen eú lamp epwe ttinesefálituk, me esap chúen wor méngúngúún mwán apwúpwúlú me fin apwúpwúlú me ikena. Epwe fis ena, pokiten ekkewe chón amémé me kamé, iir aramas mi iteféúló seni wóón fénúfan, me pokiten óm angangen roong, aramasen ekkewe mwú meinisin ra tupuló. 24 Ewer, a pwá me lón neminna chchaan ekkewe soufós me ekkewe chón pin me chchaan meinisin chókkewe ra fen ninniiló wóón fénúfan.”