Ewe Áeúin Taropwe Ngeni Chón Korint
1 Paul, a ké me ren letipen Kot an epwe emén néún Kraist Jises aposel, pwal pwiich Sostenes, 2 ngeni ewe mwichefelin Kot lón Korint, ngenikemi ekkewe mi epinipiniló pwe oupwe néún Kraist Jises chón káé, mi fil pwe oupwe aramas pin, fitifengen me meinisin chókkewe mi nóm ekis meinisin mi kékkéri iten ach Samol Jises Kraist, ar we Samol me pwal ach:
3 Amwo epwe nónnóm remi ewe kirekiréch mi somwoló me kinamwe seni Kot Semach me ewe Samol Jises Kraist.
4 Fansoun meinisin úa kilisou ngeni ái we Kot fán itemi pokiten ewe kirekiréch mi somwoló, ewe Kot a fang ngenikemi lón Kraist Jises. 5 Pokiten lón i oua wéú lón mettóch meinisin, kapachelong ewe tufichin arongafichi ewe kapasen Kot me silefichi ewe kapasen Kot. 6 Ewe pwáraatá ussun ewe Kraist a anúkúcharakemi, 7 pwe ousap fókkun osupwangen och me lein ekkewe liffang, atun oua wikkitiwiti pwálóón ach we Samol Jises Kraist. 8 Kot epwe pwal anúkúcharakemi tori ewe sópwólóón pwe esap tongeni wor minne repwe tipi ngenikemi wóón lón ewe ránin ach Samol Jises Kraist. 9 Kot mi túppwél, ewe mi kérikemi pwe oupwe chiechi ngeni Néún we, Jises Kraist ach Samol.
10 Úa pesekemi, ámi pwii kana, me ren iten ach we Samol Jises Kraist, pwe ámi meinisin oupwe kapas fán tipeeú me esap wor kinikinfesen lefilemi, nge oupwe unusen tipeeú lón eú chék ekiek pwal lón ámi apwúngaló mettóch. 11 Pún ámi pwii kana, ekkóch seni leimwen Kloe we ra apwóróusa ngeniei pwe a wor tipefesen lefilemi. 12 Weween aloi ei, pwe emén me emén ámi oua apasa: “Ngang néún Paul,” “Nge ngang néún Apolos,” “Nge ngang néún Kefas,”* “Nge ngang néún Kraist.” 13 Met, ewe Kraist a kinikinfesen? Met, Paul a ninniiló wóón ewe irá fán itemi? Are, oua papatais lón iten Paul? 14 Úa kilisou ngeni Kot pwe úse papataisi emén me leimi me lúkún chék Krispus me Kaius, 15 pwe esap wor emén epwe apasa pwe oua papatais lón itei. 16 Ewer, ngang úa pwal papataisi chón leimwen Stefanas we. Nge me lúkúúr, úse silei iká a pwal wor emén úa papataisi. 17 Pún Kraist ese tiinieito ái úpwe féri angangen papatais, nge ái úpwe afalafala ewe kapas allim, esap ren kapasen aramas mi tipáchem pwe án ewe Kraist we máló wóón ewe iráán ninni* esap lamotongawoló.
18 Pún ewe pwóróus ussun án Kraist máló wóón ewe iráán ninni,* a chék umwes me ren ekkewe repwe péútmwááliló, nge ren kich ekkewe sipwe kúna manaw, ena pwóróus a pwáári manamanen Kot. 19 Pún a makketiw: “Ngang úpwe amóeló ewe tipáchem án ekkewe aramas mi tipáchem, me úpwe péútaaló sileien ekkewe mi silelap.” 20 Lón ei ótóten fénúfan,* ifa i ewe mi tipáchem? Ifa i ewe soumak?* Ifa i ewe souáák?* Esap pwe Kot a pwáári pwe ewe tipáchemen ei fénúfan a umwes? 21 Pún aramasen ei fénúfan rese silei Kot pokiten ra lúkúlúk wóón pwisin ar tipáchem. Nge Kot a pwáári an tipáchem ren an seláni chókkewe mi lúkú pokiten ewe pwóróus sia afalafala, ewe me ren ekiekin aramasen ei fénúfan, mi umwes.
22 Pún ekkewe chón Jus ra tingor esissil, nge ekkewe chón Krik ra kútta tipáchem. 23 Nge kich, sia afalafala án Kraist ninniiló wóón ewe irá, ina eú minen chepetek ngeni ekkewe chón Jus, nge ngeni aramasen ekkewe ekkóch mwú, mi umwes. 24 Iwe nge, ngeni ekkewe mi ké, ekkewe chón Jus me ekkewe chón Krik, án Kot tipáchem me manaman ra pwááló ren Kraist. 25 Ekkewe mettóch seni Kot aramas ra ekieki pwe mi umwes, ra tipáchem lap seni aramas, me ekkewe mettóch seni Kot aramas ra ekieki pwe mi apwangapwang, ra péchékkúl lap seni aramas.
26 Ámi pwii kana, oua kúna an kérikemi, pwe ese wor chómmóng mi tipáchem me ren aramas, ese wor chómmóng mi wor ar nemenem, ese wor chómmóng mi uputekia,* 27 nge Kot a filaatá minne mi umwes me lón fénúfan pwe epwe ásáwa ekkewe mi tipáchem, me Kot a filaatá minne mi apwangapwang lón fénúfan pwe epwe ásáwa minne mi péchékkúl. 28 Me Kot a filaatá minne mi lamotongaw me lón fénúfan me minne aramas ra netiw wóón me ekieki pwe mi lamotmwáál, pwe epwe ataieló minne aramas ra ekieki pwe mi lamot, 29 pwe esap wor emén* epwe sikesik mwen mesen Kot. 30 Nge ren Kot, oua néún Kraist Jises chón káé, ewe a pwáár ngenikich án Kot tipáchem me pwal an pwúng. Ren Jises sia tongeni pin, i a pwal tongeni angasakicheló ren an méénikich seni tipis, 31 pwe epwe chék ussun minne a makketiw: “Ewe emén mi eingeing, epwe eingeing wóón Jiowa.”*