Eú Pwáraatá Ngeni Jon

10 Iwe, úa kúna pwal emén chónláng mi péchékkúl mi feitiw seni láng, a finifin lón eú kuchu, me eú resim a nóm asen mékúran. Wóón mesan a ussun akkar, nge pechen* kewe ra ussun úren ekkei, 2 me a wor eú kúkkún puk* mi suuk lón péún. Me a eipwatiw peliefichin pechen wóón mataw, nge pelieméngún pechen wóón fénú, 3 me a léúwommóng le púchér ussun emén laion atun a wérúwér. Nge atun a púchér, úngúúngún fisu chopulap ra kapas.

4 Iwe, lupwen ekkewe fisu chopulap ra kapas, itá úpwele poputá le mak, nge úa rong eú méngúngú seni láng a apasa: “Kopwe chék pwauni* minne ekkewe fisu chopulap ra apasa, nge kosap makkeetiw.” 5 Ewe chónláng úa kúna mi útá wóón mataw me wóón fénú a eitietá peliefichin péún láng, 6 me a ékképélú ewe Emén mi manaw tori feilfeiló chék, ewe mi féraatá láng me masouan, fénúfan me masouan, me mataw me masouan: “Esap chúen wor fansoun witiwitiló. 7 Nge lón ekkewe rán atun ewe afúménún chónláng epwele ettiki néún we rappwa, ewe monomonun Kot a pwénúetá. Ei monomonun Kot, iei ewe kapas allim Kot a esilei ngeni néún kewe slave, ekkewe soufós.”

8 Iwe, úa rong ewe méngúngú seni láng a kapassefál ngeniei me apasa: “Kopwe feiló me angei ewe puk mi suuk lepéún ewe chónláng mi útá wóón mataw me wóón fénú.” 9 Úa feiló ren ewe chónláng me ereni an epwe ngeniei ewe kúkkún puk. Iwe, a ereniei: “Kopwe angei me áni. Epwe kipwin me lón lukom, nge epwe ngar me lón awom ussun ngaren chénún pulech.” 10 Úa angei ewe kúkkún puk seni lepéún ewe chónláng me áni. Iwe, a ngar me lón awei ussun ngaren chénún pulech, nge a kipwin me lón lukei. 11 Iwe, ra ereniei: “Kopwe osuni sefál ussun ekkewe aramas me mwú me fós me chómmóng king.”