Ngeni Chón Ipru
1 Lóóm lóóm, Kot a fós ngeni semelapach kewe fán chómmóng me lón chómmóng napanap ren an néúnéú soufós. 2 Nge lón ekkeei rán,* i a fós ngenikich me ren Néún we, ewe a seikaatá an epwe chón álemwiri mettóch meinisin, nge ren i, I a féraatá ekkewe mettóch wóón fénúfan me lón láng.* 3 Ewe naw a pwáraaló lingen Kot me a wesewesen napanapeni napanapen Kot, me a anúkúchara mettóch meinisin ren an kapas mi manaman. Iwe, mwirin an limetikich seni ach kewe tipis, i a móttiw lepeliefichin ewe Kot mi Lapalap lón ewe leeni mi tekia. 4 Ina minne, i a lap seni ekkewe chónláng pún a álemwiri eú it mi fókkun múrinné seni iter kewe.
5 Áwewe chék, ié me lein ekkewe chónláng Kot a fen ereni: “En nei, ikenái úa wiliiti semom”? Me pwal: “Ngang úpwe wiliiti semom, nge en kopwe wiliiti nei”? 6 Nge lupwen epwe tiinsefálieto Néún we Mwánichi ngeni ei fénúfan, i epwe apasa: “Ámi meinisin néún Kot chónláng oupwe asamolu i.”*
7 Pwal och, iei met a apasa ussun ekkewe chónláng: “I a féri néún kewe chónláng pwe repwe fókkun manaman* me a féri án néún kewe chón angang repwe ussun pulopulen ekkei.” 8 Nge iei met a apasa ussun ewe Naw: “Kot i óm leenien móótun king feilfeiló chék, me ewe wokun nemenem lón Mwuum, ina ewe wokun pwúng. 9 En ka aúcheani minne mi pwúng me oputa minne mi ngaw. Ina minne Kot, óm we Kot, a epiti ngonuk lépwuk* me fang ngonuk watteen pwapwa lap seni chienom kewe.” 10 Me: “En Samol, me lepoputáán ka féri lóngólóngun fénúfan, me láng ina férien poum. 11 Iir repwe móróló, nge en kopwe chék nónnóm. Iir meinisin repwe mesiló ussun chék eché úf, 12 me kopwe énnúfengeniir ussun chék eché úf mi ttam me kopwe ekkesiwiliir. Nge en kese siwil me esap fókkun muchúló ierin manawom.”
13 Nge ié me lein ekkewe chónláng Kot a fen ereni: “Kopwe móttiw peliefichi tori ái úpwe isettiw chón oputom pwe leenien pecheom”? 14 Esap pwe meinisin ekkewe chónláng iir ngún mi angang ngeni Kot? Esap pwe iir ekkewe Kot a ewisa ngeniir ar repwe álisi chókkewe repwe kúna manaw?