Ewe Áeúin Taropwe Ngeni Chón Korint

5 Ngang úa rong pwe a wor emén mwán leimi a nóm ren pwúlúwen seman. Ei sókkun lisowumwáál* a kon ngaw seni met aramasen ekkewe ekkóch mwú ra féri. 2 Met, oua pwapwa? Esap pwe oupwe letipeta? Esap pwe oupwe asúoló me leimi ena mwán mi féri ei tipis? 3 Ikáámwo úse wesewesen nóm ikena nge letipei a nóm, me úa fen apwúngú ewe mwán mi féri ei féffér, ussun nge úa wesewesen nóm remi. 4 Atun oua mwichfengen lón iten ach Samol Jises, ngang, ewe mi angei ewe manaman seni ach Samol Jises, úa etikemi lón ái ekiek. 5 A lamot oupwe atolonga ena sókkun aramas lepéún Setan pwe ewe etipetip mi ngaw i a wato lón ewe mwichefel epwe móróló,* pwe péchékkúlen ewe mwichefel lón pekin lúkú epwe túmún lón ránin ewe Samol.

6 Ámi sikesik ese múrinné. Ouse silei pwe ekis chék iis a apwotáái unusen ewe pilawa mi éúwéú? 7 Iwe, oupwe limetawu ena iis, pwe oupwe wiliiti pilawa mi fé mi éúwéú ese wor iis lón. Ren enletin, Kraist a fangoló manawan ussun eú asor, pwe epwe wiliiti ach we lamen Pasofer. 8 Ina minne, ousipwe féri ewe ránin chulap, nge sisap áeá ewe iis minen lóóm are ewe iis mi liosuetá tipis me ngaw. Nge sipwe chék mwéngé ewe pilawa ese wor iis lón, ewe mi liosuetá minne mi múrinné me enlet.

9 Lón nei we taropwe, úa mak ngenikemi pwe oupwe úkútiw le chichchiechi ngeni ekkewe aramas mi lisowumwáál,* 10 esap weween nge meinisin ekkewe chón lisowumwáál* lón ei fénúfan are aramas mi tipemmóng are chón kafang* are chón fel ngeni uluulun. Pún iká ina, weween oupwe fókkun towu seni ei fénúfan. 11 Nge iei úa mak ngenikemi pwe oupwe úkútiw le chichchiechi ngeni emén mi eita ngeni chienemi chón lúkú nge i mi lisowumwáál* are mi tipemmóng are chón fel ngeni uluulun are chón kapas mi ngaw fán iten ekkóch are chón únnúpuch are chón kafang,* ousap mwo nge mwéngé ren ena esin aramas. 12 Pún met úpwe eáni apwúng ngeni chókkewe rese nóm lón ewe mwichefel? Esap pwe ámi oupwe apwúngú chókkewe mi nóm lón, 13 nge Kot epwe apwúngú chókkewe mi nóm lúkún? “Oupwe atowu ewe aramas mi ngaw seni me leimi.”