Féffér
11 Iwe, ekkewe aposel me chiener kewe chón lúkú mi nóm lón Jutia ra rong pwe aramasen ekkewe ekkóch mwú ra pwal etiwa án Kot kapas. 2 Iwe, lupwen Piter a wareiti Jerusalem, chókkewe mi álisaatá angangen sirikomsais ra poputá le esiita* i, 3 ra apasa: “Ka tolong lón imwen ekkewe mwán rese sirikomsais me fitiir le mwéngé.” 4 Iwe, Piter a áweweei ngeniir tichikin ewe pwóróus, a apasa:
5 “Úa nóm lón ewe telinimw Joppa me úa iótek. Iwe, úa kúna lón kúnaei we och mettóch a feitiw seni láng mi ussun eché chéwatteen mangaak mi úrútiw me rúáánú lepwokukuun, me a feitiw rei. 6 Atun úa nengenifichi lón, úa kúna ekkewe man wóón fénúfan mi wor fófóch pecher, manmwacho, ekkewe man mi té wóón upwer,* me ekkewe machchang fán láng. 7 Úa pwal rongorong eú méngúngú a apasa ngeniei: ‘Piter, kopwe útá, nireló me ochooch!’ 8 Nge úa apasa: ‘Aapw Samol, pún ese fókkun wor och mettóch mi pinepin me limengaw me ren allúk a tolong lón awei.’ 9 Lón ewe oruuen fansoun, ewe méngúngú seni láng a pélúweni: ‘Kopwe úkútiw le apasa pwe a limengaw ekkewe mettóch Kot a fen eliméchúroló.’ 10 A fis ei fán úlúngát, me meinisin a úrúsefálitá láng. 11 Pwal lón chék ena atun, úlúmén mwán ra útáló ren ewe imw áúa nónnóm ie, iir ra tiitiito rei seni Seseria. 12 Mwirin, ewe ngún mi fel a ereniei ái úpwe fitiireló, úsapw fókkun tipemwárámwár. Nge chienei keei wonomén chón lúkú ra pwal fitiei, me áúa tolong lón imwen Kornelius we.
13 “I a apwóróusa ngenikem ussun an kúna ewe chónláng mi útá lón imwan we me apasa: ‘Kopwe tiinaaló ekkóch mwán ngeni Joppa me kérato Simon ewe mi iteni Piter, 14 me i epwe erenuk ekkewe mettóch en me meinisin chón lón imwom oupwe tongeni kúna amanaw ren.’ 15 Nge lupwen úa poputá le kapas, ewe ngún mi fel a ninitiw wóór ussun chék an we ninitiw wóóch me lepoputáán. 16 Ren ei, úa chemeni án ewe Samol akkapasa: ‘Jon a féri angangen papatais ren konik, nge ámi oupwe papatais ren ngún mi fel.’ 17 Iwe, iká Kot a fang ngeniir ewe pwal chék liffang ese kamé a ngenikich ekkewe mi lúkú ewe Samol Jises Kraist, ngang ié pwe úpwe tongeni eppeti Kot?”
18 Lupwen ra rong ekkeei mettóch, ra kaúló le appélúwa,* me ra elingaaló Kot, ra apasa: “Iwe, a ffat! Kot a pwal mochen án aramasen ekkewe ekkóch mwú repwe áier pwe repwe tongeni kúna manaw.”
19 Iwe, chókkewe mi toropasfeil pokiten ewe angangen eriáfféú mi tori Stifen, ra fetálfeil tori lón Finisia, Saipros, me Antiok. Nge ra afalafala ewe kapas ngeni chék ekkewe chón Jus. 20 Iwe nge, ekkóch me lein ekkewe mwán mi etiir, iir seni Saipros me Sairine, ra feiló Antiok me poputá le fós ngeni ekkewe aramas mi fós lón kapasen Krik, ra afalafala ewe kapas allim ussun ewe Samol Jises. 21 Pwal och, péún Jiowa* a etiir, me chómmóng ra wiliiti chón lúkú me kul ngeni ewe Samol.
22 Ewe pwóróus ussur a tori ewe mwichefel lón Jerusalem, ina minne ra tiinaaló Parnapas ngeni Antiok. 23 Lupwen a war, me a kúna án Kot kirekiréch mi somwoló, a pwapwa me poputá le peseer meinisin ar repwe sópweeló le álleasochisi ewe Samol seni unusen letiper, 24 pún i emén mwán mi múrinné me ur ren ngún mi fel me péchékkúl an lúkú. Iwe, eú mwichemmóngun aramas ra lúkú lón ewe Samol. 25 Iwe, a feiló ngeni Tarsus pwe epwe kúttafetálei Saul. 26 Lupwen a kúna i, a uwealó ngeni Antiok. Iwe ren unusen eú ier, ra fiti chón ewe mwichefel le mwichfengen me asukula eú mwichemmóngun aramas. Iwe, me lón Antiok fán emmwenien Kot, ina ákkáeúin án ekkewe chón káé ra iteni Chón Kraist.
27 Lón ekkena rán, ekkewe soufós ra feitiw seni Jerusalem ngeni Antiok. 28 Emén me leir itan Akapus a útá me osuni fán emmwenien ewe ngún mi fel pwe eú watteen lengita epwe fis wóón unusen fénúfan. Ren enletin, a fis lón fansoun Klautius we. 29 Ina minne, ekkewe chón káé ra apwúngaló ar repwe tiinaaló álillis ngeni pwiir kewe mi nónnóm lón Jutia, alóngólóng wóón met emén me emén a tufich ngeni. 30 Iwe, ra féri ei ren ar tiinaaló ekkewe álillis ngeni ekkewe mwán mi ásimaw,* nge Parnapas me Saul ra wisen uwealó.