Me ren Mark
4 A pwal poputá le asukul órosset, me eú watteen mwichemmóngun aramas a mwicheto arap ngeni i. Iwe, a tétá wóón efóch waa me mómmóót wóón, ekis towawowu nge unusen ewe mwichen aramas a nóm órosset. 2 Iwe, a poputá le asukuler chómmóng mettóch lón kapas áwewe, nge atun a asukul a ereniir: 3 “Oupwe aúseling. Nengeni! Ewe chón amwora a feiló pwe epwe amwora. 4 Atun an amwora ekkewe féún pwikil, ekkóch ra mworetiw ppen ewe al, me ekkewe machchang ra changeto me ániir. 5 Ekkóch ra mworetiw lón leeni mi kitiféúféú ese kon watte pwúlún, me ra mwittir pwúkútá pokiten ese kon maanún ewe pwúl. 6 Nge atun ewe akkar a tétá, a kon pwichikkar ngeni ekkena irá, me pokiten ese wor wareer ra eioloon. 7 Ekkóch pwikil ra mworetiw lein ekkewe irá félúfél me ekkewe irá félúfél ra mááritá me pwélúroló, me ese wor uwaar. 8 Nge ekkóch ra mworetiw lón pwúl mi múrinné, iwe ra mámmááritá me chóchchómmóngoló me ra poputá le uwa. A wor ekkóch ra uwaani 30, a wor ekkóch ra uwaani 60, me ekkóch 100 seni eféú pwikil.” 9 A pwal erá: “Emén mi wor selingan an epwe aúseling, epwe aúseling.”
10 Iwe, lupwen a chék áláeménúló, chókkewe mi nóm únúkkún eti ekkewe Engol me Rúúemén ra poputá le kapas eis ngeni ussun ekkewe kapas áwewe. 11 A ereniir: “A fen mumutá ngenikemi pwe oupwe weweiti ewe monomonun Kot, ewe Mwúún Kot, nge ren ekkewe ekkóch, mettóch meinisin lón kapas áwewe, 12 pwe ikáámwo ra nengeni, resap kúna, me ikáámwo ra rong, resap weweiti met weween. Resap pwal kulsefál me kúna musoló.” 13 A pwal ereniir: “Ouse weweiti ei kapas áwewe, iwe, ifa ussun ámi oupwe weweiti meinisin ekkewe ekkóch kapas áwewe?
14 “Ewe chón amwora a amwora ewe kapas. 15 Ekkewe pwikil mi mworetiw ppen ewe al, iir ra ussun ekkewe aramas ewe kapas a kamwor lón iir, nge ewe chék atun ra rong ena kapas, Setan a feito me angealó ewe kapas mi mworetiw lón letiper. 16 Pwal ina chék ussun ren ekkewe pwikil mi mworetiw lón pwúl mi kitiféúféú, iir chókkewe lón ewe chék atun ra rong ewe kapas, ra etiwa fán pwapwa. 17 Iwe nge ese wor wareer, nge ra sópweeló ren och fansoun, iwe atun chék a ppiitá riáfféú are riáfféúmwáál pokiten ewe kapas, ra chepetek. 18 A pwal wor ekkóch ekkewe pwikil mi mworetiw lein irá félúfél. Ikkeei iir ekkewe ra rong ewe kapas, 19 nge aúrekin ótóten ei fénúfan* me otuputupun manamanen wéú me sókkopaten mochenia ra tolong lón letiper me pwélúoló ewe kapas, me ese uwa. 20 Sáingolóón, ekkewe pwikil mi mworetiw lón pwúl mi múrinné, iir ekkewe mi aúseling ewe kapas me etiwa me uwa. Ekkeei ra uwaani 30, ekkóch ra uwaani 60, me ekkóch ra uwa tori 100 seni eféú pwikil.”
21 A pwal ereniir: “Ese katowu eú lamp an epwe éppwélúló* are nóm fán eú peet, iká met? Esap pwe a katowu pwe epwe nóm wóón eú leenien lamp? 22 Pún ese wor och mettóch mi opoló esap pwápwááló. Ese wor met mi pwélúéchúló esap sárifiló. 23 Emén mi wor selingan an epwe aúseling, epwe aúseling.”
24 A pwal ereniir: “Minne oua aúseling ngeni, oupwe aúselingéch ngeni. Me napanapemi ngeni ekkewe ekkóch, epwe pwal ina napanaper ngenikemi, ren ena, oupwe pwal angei lap seni. 25 Pún ié a wor an, Kot epwe pwal ngeni chómmóng. Nge ié ese wor an, Kot epwe angei seni pwal mwo nge met mi nóm ren.”
26 Iwe, a pwal sópweeló le apasa: “Ewe Mwúún Kot a ussun chék emén mwán mi amwora pwikil wóón ewe pwúl. 27 I a méúr lepwin me pwáátá lerán, me ekkewe pwikil ra fasaretá me mááritá, nge ren ifa ussun, i ese silei. 28 Ewe pwúl a pwisin awora uwaan ekis me ekis, a akkomw mááritá, mwirin a pwúk etin, sáingolóón a uwa. 29 Nge atun chék ewe uwa a maw, a pwomweetá ewe weiweito pún a tori ewe fansoun kinikin.”
30 Iwe, a pwal sópweeló le apasa: “Met sia tongeni apépééi ewe Mwúún Kot ngeni, are menni kapas áwewe sia tongeni áwewe ngeni? 31 A ussun chék eféú féúkúkkúnún pwikil,* ewe atun a kamwor lón pwúl a féúkúkkún seni meinisin pwikil wóón fénúfan. 32 Nge lupwen a kamwor, a mááritá me a watte seni meinisin ekkewe ekkóch iásái me a pwúkuwu palan kewe mi watte pwe ekkewe machchang fán láng ra tongeni féri fáser fán núrún lein palan kewe.”
33 A afalafala ewe kapas ren chómmóng ena sókkun kapas áwewe, a alóngólóng wóón ar tufichin weweiti. 34 Ren enletin, ese fós ngeniir me lúkún an áeá kapas áwewe, nge a áweweei mettóch meinisin ngeni néún kewe chón káé.
35 Iwe, lón ena rán, atun a pwiniló, a ereniir: “Sipwele feiló epek ewe sáát.” 36 Iwe mwirin ar áfeilóói ekkewe aramas, ra uwealó i wóón ewe waa, nge a pwal wor ekkóch waa ra etaló. 37 Iwe, a fis eú watteen mélúmél mi efeiengaw, me ekkewe lóó ra kan púngúpúngúri ewe waa, iwe arap ngeni ewe waa epwele kokoló. 38 Nge i a nóm mwirin ewe waa, a méúr wóón ewe pillu. Iwe, ra féngúnatá me ereni: “Sense, kese ekieki ach ei sipwele máló?” 39 Iwe ren ena, a pwáátá me apwúngú ewe ásepwál me ereni ewe mataw: “Kaúló! Kopwe mosonosonoló!” Iwe, ewe ásepwál a maséséló, me a fókkun lúaló. 40 Iwe a ereniir: “Pwata oua fókkun niwokkus?* Ese mwo nge wor ámi lúkú?” 41 Nge ra fókkun niwokkus, me ra eráfengen lefiler: “Wesewesen ié ei? Pwal mwo nge ewe ásepwál me ewe mataw ra álleasochisi i.”