Féffér
25 Iei minne, mwirin án Festus wareiti ewe fénú me poputá le nemenem, a feitá seni Seseria ngeni Jerusalem mwirin úlúngát rán. 2 Iwe, ekkewe souasor mi lap me ekkewe mwán mi aúchea lein ekkewe chón Jus ra apasa ngeni ar kewe otuttur fán iten Paul. Iwe ra poputá le tingormaw ngeni Festus 3 an epwe etiwa ar tingor me tiiti Paul pwe epwe feito ngeni Jerusalem. Nge iir ra akkóta ar repwe rawei Paul me nieló i me wóón al. 4 Iwe nge, Festus a erá pwe Paul epwe chék nónnóm Seseria me pwisin i epwe liwinsefáliló ikena ekiseló chék. 5 A apasa: “Ina minne, chókkewe mi wor ar nemenem me leimi, repwe fitieitiw me etipisi iká enletin pwe ewe mwán a féri och mettóch mi mwáál.”
6 Iwe, mwirin an nóm rer ina epwe wanú ngeni engol rán, i a feitiw ngeni Seseria, nge lón ewe rán mwirin a móttiw wóón ewe leenien móótun apwúng me allúkú ar repwe uwawu Paul. 7 Lupwen a tolong, ekkewe chón Jus mi feitiw seni Jerusalem ra útá únúkkún i, ra apasaatá chómmóng ar kapasen tipi ngeni nge rese tongeni ánnetatá pwúngún.
8 Nge Paul a pwisin pélúweni fán itan: “Úse féri och tipis ngeni án chón Jus we Allúk are ngeni ewe imwenfel are ngeni Sisar.” 9 Festus a mochen kútta chenin me ren ekkewe chón Jus, ina minne a ereni Paul: “Ka mochen feitá ngeni Jerusalem me kúna kapwúng seniei me ikenan wóón ekkeei mettóch?” 10 Nge Paul a apasa: “Úa fen útá mwen án Sisar we leenien móótun apwúng, ikewe itá úrúrún úpwe kapwúng ie. Iei ka pwal fókkun silei pwe úse féri och mi mwáál ngeni ekkewe chón Jus. 11 Iká ngang wesewesen emén chón féfféringaw me úa féri och mettóch mi fich ngeni máló, úsapw ttii seniei máló. Nge iká ese pwúng ekkewe kapasen otuttur ekkeei mwán ra apasaatá fán itei, ese wor emén a tongeni oturueilong lepéúr pokiten ina met ra tipeni. Úpwe feiló ren Sisar!” 12 Iwe, mwirin án Festus kapas ngeni ewe mwichen chón awora fén, a apasa: “Pokiten ka mochen án Sisar epwe apwúnguk, kopwe kapwúng ren Sisar.”
13 Mwirin ekkóch rán a ló, King Akripa me Pernis ra wareiti Seseria pwe repwe chuuri Festus. 14 Pokiten ra nónnóm ikena ekkóch rán, iwe Festus a apwóróusa ngeni ewe king pwóróusen Paul, a apasa:
“A wor emén mwán Feliks a likitaaló lón kalapus, 15 nge lupwen úa nóm lón Jerusalem ekkewe souasor mi lap me ekkewe néúwisin Jus ra uweato pwóróusan, ra tingor pwe úpwe apwúngú i. 16 Nge úa ereniir pwe esap ina tettelin án chón Rom repwe oturaalong emén lepéún ekkóch pokiten chék ina met ra tipeni nge esaamwo wor atun an epwe pwisin peni i mwen mesen ekkewe chón etipisi. 17 Iwe, atun ra wareiti ikeei, úa mwittir mwékút, lón ewe rán mwirin úa móót wóón ewe leenien móótun apwúng me allúkú ar repwe uweato ewe mwán. 18 Ekkewe chón etipisi ra útá nge rese oturu wóón och mettóch mi fókkun ngaw úa ekieki ussun i. 19 A chék wor ekkóch mettóch ra ánini wóón mi weneiti pwisin ar lamalam me mi weneiti emén mwán itan Jises, emén mi máló nge Paul a péchéúló pwe mi manaw. 20 Nge pokiten úse silei ifa ussun úpwe angang wóón ei osukosuk, úa eisini iká a mochen feiló Jerusalem me kapwúng ikena ie wóón ekkeei mettóch. 21 Nge lupwen Paul a tingor pwe epwe chék nónnóm atun a witiwiti pwúngúlóón me ren ewe Akustus,* ngang úa allúkú pwe epwe chék nónnóm tori ái úpwe tiinaaló i ren Sisar.”
22 Iwe, Akripa a ereni Festus: “Úa mochen pwisin rongorong seni ena mwán.” A apasa: “Lesor kopwe rongorong seni i.” 23 Iwe, lón ewe rán mwirin, Akripa me Pernis ra feito fán napanap mi esikesik me ra tolong lón ewe ruumwen mwiich fitifengen me ekkewe meilapen mwichen soufiu pwal ekkewe mwán mi iteféúló lón ewe telinimw. Iwe, Festus a ereni ekkewe soufiu ar repwe uwealong Paul. 24 Iwe, Festus a apasa: “King Akripa me meinisin ámi mi nóm rech, o katol ei mwán, lón ewe telinimw Jerusalem, me ikeei, meinisin ekkewe chón Jus ra púchérútá fán léúwommóng le tingoreei pwe ei mwán epwe máló. 25 Nge úa meefi pwe ese féri och mi fichiiti an epwe máló. Ina minne, lupwen ei mwán a pwisin tingor an epwe ló ngeni ewe Akustus, úa apwúngaló pwe úpwe tiinaaló i. 26 Nge ese wor met úpwe makkeei fán itan ngeni ái Samol. Ina minne, úa uweato mwen mesemi meinisin, nge ákkáeúin mwen mesom King Akripa, pwe mwirin fisin ei etittin, neman epwele wor met úpwe makkeei. 27 Pún me rei ese pwúng ái úpwe tiinaaló emén chón kalapus nge úse pwal affata ekkewe kapasen otuttur fán itan.”