Eú Pwáraatá Ngeni Jon
5 Úa kúna me lón peliefichin péún ewe Emén mi móót wóón ewe leenien móótun king eú puk* mi mak me rúúepek, me a unusen pwaau ren fisu pwaau. 2 Úa pwal kúna emén chónláng mi péchékkúl a apasa fán mwelian mi léúwommóng: “A fich ngeni ié an epwe suuki ewe puk me atai ekkewe pwaau wóón?” 3 Nge ese wor emén lón láng are wóón fénúfan are fán fénúfan a tongeni suuki ewe puk are nennelong lón. 4 Úa fókkun kechiw pokiten ese wor emén a fich ngeni an epwe suuki ewe puk are nennelong lón. 5 Nge emén me lein ekkewe souakkomw* a ereniei: “Chipeló le kechiw. Nengeni, ewe Laion seni ewe einangen Juta, ewe mwirimwirin Tafit, a pworacho. Iwe, epwe suuki ewe puk me ekkewe fisu pwaau wóón.”
6 Me úa kúna emén laam ussun itá mi ninniiló a útá lukanapen ewe leenien móótun king me ekkewe fémén ménúmanaw me lukanapen ekkewe souakkomw, a wor fúúfóch mecháán me fúúféú mesan, nge ekkena maas ra wewe ngeni án Kot kewe fisu manaman mi tiitiiló ngeni wóón unusen fénúfan. 7 A mwittir feiló me angei ewe puk seni me lón peliefichin péún ewe Emén mi móót wóón ewe leenien móótun king. 8 Atun a angei ewe puk, ekkewe fémén ménúmanaw me ekkewe 24 souakkomw ra chapetiw me mwen ewe Laam, emén me emén leir a wor rer eú kitar* me sepi seni kolt mi ur ren appach mi pwokkus. (Ewe appach mi pwokkus a wewe ngeni án ekkewe chón pin iótek.) 9 Iwe, ra eáni eché kél mi fé, ra apasa: “A fich ngonuk óm kopwe angei ewe puk me suuki ekkewe pwaau wóón, pún en ka ninniiló me ka mééni aramas ren chchaom fán iten Kot, seni iteiten einang me fós me aramas me mwú, 10 me ka féri pwe repwe eú mwú me souasor ngeni ach Kot, me repwe nemenem lón ewe wis king wóón unusen fénúfan.”
11 Me úa kúna me rong méngúngúún chómmóng chónláng pwellin únúkkún ewe leenien móótun king me ekkewe ménúmanaw me ekkewe souakkomw, nge chóchóór ngéréú me ngéréú, ewer, iir fitepúkú million, 12 ra léúwommóng le apasa: “A fich ngeni ewe Laam mi ninniiló an epwe angei manaman me wéú me tipáchem me péchékkúl me súfél me ling me feiéch.”
13 Iwe, úa rong án ekkewe ménúmanaw lón láng me wóón fénúfan me fán fénúfan me lón mataw, me ekkewe mettóch meinisin mi nóm lóór, ra apasa: “Feiéch ngeni ewe Emén mi móót wóón ewe leenien móótun king me ewe Laam, pwal súfél me ling me manaman tori feilfeiló chék.” 14 Ekkewe fémén ménúmanaw ra apasa: “Amen!” me ekkewe souakkomw ra chapetiw me fel ngeni Kot.